2Samuel (1/24)  →
1. Saula thi hnung, Amalekhaihnea Davida hung inlawi tieng chun Ziklag khuoah ni hnih a cham a.
2. A ni thum ni chun Saula inkulnaa inthokin mi pakhat, silfen inek neng nung le sama pilvut kai luoi hi Davida kuomah a hung a, bokkhupin chibai a buk a.
3. Davida chun a kuomah, "Khaw laia inthoka hung am i na?"a ta, ama chun, "Israelhai inkulnaa inthoka hung tlan suok ka nih" a ta.
4. Davida chun, "Ieng tin am thil a um mi hril rawh khai" a ta. Ama chun, "Indonaah mihai chu an tlansie a, tam tak an thi bok a. Saula le a naupa Jonathan khom an thi" a ta.
5. Chanchin hung hawntu tlangval kuoma chun Davidan, "Ieng tin am Saula le a naupa Jonathan hai an thi ti i hriet thei a?" a ta.
6. Tlangval chun, "Gilboa tlangah ka um ve a, Saula chu a fei innghaia um ka hmu a, sakor tawlailir le a chunga chuonghai chun an hung nangching tep ta a.
7. A ngha vel chun a mi hmu a, a mi hung ko a, kei chun "Ieng am ka thawpek thei che?" tiin ka'n don a.
8. Ama chun, "Tu am i na?" a mi ti a, "Amalek mi ka nih" ka ta.
9. Ama chun, "Hung la, mi hung that raw leh; hi, thi hmun suolin ka um a, ka la dam ting bok si a" a ta.
10. "Chuongchun a bula chun ka ngir a, chuonga inlet der tah chu a ni lei le a dam zo chuong ta naw ding ti ka hriet leiin ka that a, a lua lallukhum le a kuta a banbun chu ka lak a, i kuomah ka hung chawi a nih, pu" a ta.
11. Davida le a mihai chun an silfen an potthler a.
12. Kawlhnama thi Saula le a naupa Jonathan hai, LALPA mihai le Israel sungkuohai chu an sun a, an ta a, zan tieng chen bu an nghei a.
13. Davida chun chanchin hung hawntu tlangval kuomah, "Khaw taka inthoka hung am i na?" a ta, ama chun, "Ram dang mi ka na, ka pa chu Amalek mi a nih" tiin a don a.
14. Davida chun a kuomah, "Ieng dinga Pathien hriek nal sukbohmang dinga a chungah kut i thlak ngam am a na?" a ta.
15. Chuongchun tlangval pakhat a ko a, "Va hnai la, va that rawh" a ta, a va sat hlum ta a.
16. Davida chun, "I thisen insuo maw chu nangma lu chung ngeiah um raw se, nangma bau ngeiin, 'LALPA hriek nal chu ka that' i ti si a" a ta.
17. Davida chun Saula le a naupa Jonathan hai chu sunin a ta a
18. a tap hla chu thal kap hla ti a na, Juda mi po po inchuktir dingin thu a pek a, chu thu chu Jasar Lekhabuah ziek a nih:
19. Aw Israel, i thuoitu ropuihai,I tlang chungah fam khuo changin,Mihranghai sam ang an zal ie!
20. Gath khuohai chu hril naw ro,Askelon kotthlerah puong naw ro;Filistin minuhaiin lo lawm palin,Sertan lo hraileng lanuhaiin,Hlim zai vawr pal rawi an tih.
21. Aw nangni Gilboa tlanghai,In chungah daidaw tla naw sien,Khuongruo sur bok naw sien la,Loin thilhlan ding hrim hrim,Bu le bal insuo naw raw se;Chu taka chun mi lien phaw,Muolpho takin an peihawn a,Saula phaw chun hriek nal leChul tlerh hrim a hlaw ta nawh.
22. Thathai thisena tlai lo le,Mi hrathai thau fa khop loin,Jonathan thal a let ngai naw a,Saula kawlhnam a let ngai nawh.
23. Saula le Jonathan nun kha,A ditumin a va hang mawi ngei!An thi chenin an inkop zing;Muvanlai nekin an tuonrang a,Sakeibaknei nekin an hrat lem.
24. Nangni Israel naunuhai,Saula sunin ta ta ro khai,Puon sendang mawia thuomtu cheu,In silfenhai rangkachakaCheipektu cheu a ni si.
25. Indoa hrat khawkhenghai,An hang tlu el chu a na maw!I tlang sangah Jonathan chu,Fam changin a zal tah ie.
26. Ka unaupa aw Jonathan,Ka va hang sun ngei che de aw!Ka va hang ngaina ngei che de!I mi hmangai dan kha a mak,Nghaknu hmangaina a khum.
27. Mihrang an hang tlu el chu,Ralthuom bo ang ei ni ie!
      2Samuel (1/24)  →