←  2Peter (2/3)  →
1. Nisienlakhom, keini mihai lai zawlnei tehlem an um hlak ang khan nangni lai khom zirtirtu indik lo an hung suok ding a na, mi sukse thei, zirtirna indik lo a rukin hung put lut an ta, an Laltak, anni intlantu chu phatsan an ta, anni ngei chungah sietna inrang takin intlungtir an tih.
2. An um dan inzapuium tak chu mi tam takin zui veng an ta, thutak lampui hi sukpawi an tih.
3. Sum an hmu theina dingin huomhap taka thu phuok fawm hmangin, sumdawngnain hmang an ti cheu. An chungthu relna, thiemnaw an changna thu chu an lu chungah a um ta zing a, sietna chun in loin a'n chan ran tawl a nih.
4. Vantirkohaiin thil suol an thaw lai khan Pathienin a hla tawl naw a, hremhmunah a pei a, Rorelna Ni nghak dingin khuorkhurum inthimah a thlak tawl a ni kha.
5. Tien lai khawvel khom a hla bik nawh; khawvel suol tak chungah tui a'n lettir a, felna thu puongtu Nova le mi dang pasari chauh san suok an ni kha.
6. Sodom le Gomora khuohai khom thiemnaw inchangtirin mei vamah a'n changtir a, Pathien ngaisak nawtuhai a hrem dan ding inentirna dingin a hmang a ni kha.
7. Mi fel Lota, mi suolhai um dan porche tak el poiti em em hlaktu ruok chu a san suok a,
8. chu mi tha tak chu anni laia khawsa ve hlak a na, an thilsuol thaw a hmu le a hrietin a lung a na em em hlak a nih.
9. Lalpa chun ama tituhai chu tuorna laka inthoka san suok dan le Rorel Ni a hung tlung hma khoma mi suolhai hrem dan a hriet a,
10. an tisa chakna tirdakum anga umhai le Pathien thuneina hmusittuhai ngat lem chu hrem dan ding a hriet nawkzuol.Hieng zirtirtu indik nawhai hi an invet huoi a, an chapo a, van mi ropuihai khom khi hril siet an ti nawh.
11. Anni neka hrat lem le thil thaw thei lem vantirkohai hmanin, Lalpa hmaah hieng mi ropuihai chungchang hi an hril changin tong sie an hmang ngai nawh.
12. Sienkhom, hienghai ruok hin chu an hriet thiem phak naw taphot hril siet an ching a. Ramsa kol, mani pienvar chauh hmang thei, mana that el dinga hung pienghai ang hi an nih.
13. Poi an tawk ang char chu an suol man la tuor an tih. Inhoi an tizawng chu sunnithlak thlaka nuomchen hi a nih. Nangni le hmangaina ruoi the hi inhoi an tizawng a na, mi tirdakum le mi khawlo, nangni laia inzep an ni si a.
14. An mitin uirepui ding zongin an melkai zing a, suol thaw an nghok thei nawh. Mi lungril nghet nawhai an zawl thluk a, duam hi an chemkalna zawng a na, tongsephur nauhai an nih.
15. Lampui indik chu an petsan a, lam an inhmang a, ritlona ra lawmtu Bosora naupa Balaam lampui chu an hraw a,
16. sienkhom Balaam chu a bawsietnaah zilhauin a um a, sabengtung tong thei lo chu mihriem anga hung tong suokin, zawlnei invet thil thaw tum chu a khappek a ni kha.
17. Hieng mihai hi tuikhur hnar kang char tah le sum leivak, thliin a len vel ang mei mei chauh hi an ni a, thima khom thim sa tak chu an umna dinga ruot a nih.
18. Umzie nei lo thu invetthlak tak takhai chu uong takin an inpawtpui a, mihriem tisa chakna suol tieng chok tho thei thilhai chun mi, an nun suol laka inthoka intal suok hlimhai chu, an zawr a,
19. zalenna pek an tiem a, anni hlak chu an thil ching tha lo bawia intang an ni zing bok si. Tu el khom hi ama thuhnetu bawia intang a nih.
20. Ei Lalpa le Sandamtu Isu Krista hrietna leia khawvel suol nghatsantuhai chu suola an inawk nawk chun a tira an um dan nekin a nuhnunga an um dan chu a se lem dai hlak.
21. Thupek thienghlim dong ta zeta nghatsan nawktuhai chun felna lampui hi lo hre naw law law hai sien, an ta dingin tha lem a tih.
22. An um dana inthokin hieng thuvarhai indikzie hi a'n lang chieng hle: "Ui chu a luoka bok a kir nawk hlak" ti le "Vokpui insiltir chu chirhaka bok a'n buol nawk hlak" tihai hi.
←  2Peter (2/3)  →