2Peter (1/3)  →
1. Isu Krista siehlaw le tirko Simon Peter chun, mi sandamtu Isu Krista zar le ei Pathien felna zara ringna hlu tak ei nei ang nei vehai chu chibai ka buk cheu.
2. Pathien le ei Lalpa Isu in hrietnaah lunginsietna le inremna in chungah sukpungin um raw se.
3. A ropuina le thatna chang ve dinga mi kotu ei hrietna zara chun Pathien tina tienga ei hring theina dingin Pathien thilthawtheina chun ei mamaw iengkim a mi pek a.
4. Chuongchun, thilpek ropui tak le hlu tak a tiem chu a mi pek tah leiin, khawvel suol chakna, mi sukse thei laka inthok chun suokin, Pathien zie in intawmpui thei tah a nih.
5. Hi lei hin theitawp suo unla, in ringnaa chun thatna thang sa sien, in thatnaa chun hrietna,
6. in hrietnaa chun mani inthununna, mani inthununnaa chun selna,
7. in selnaa chun Pathien ngaisakna, Pathien in ngaisaknaa chun unauhai lainatna, unauhai in lainatnaa chun hmangaina thang sa raw se.
8. Chuong chu in nei a, a pung pei chun ei Lalpa Isu Krista hrietnaah mi taima tak le tangkai takah siem a ti cheu.
9. Chuong thil nei nawtuhai chu mitdel, khaw hmu tawi, kha hmaa an suolhai kha sawp faipek vong an ni tah ti theinghil tahai chu an nih.
10. Chuongchun, unauhai, a kona le a thlangna cheu hi suklang dingin theitawpin thang la zuol sauh ro; chuong anga thawtuhai chu ieng lai khomin tlu se naw ni hai.
11. Chuongchun, ei Lalpa le Sandamtu Isu Krista chatuon ramah chun lawm takin inluttir a ti cheu.
12. Chuleiin, thutak in hrieta khan nghet takin um tah ni inla khom hieng thu hi inhriet nontir rop cheu ka nuom a nih
13. Hi taksa puon ina ka cheng sung hin, chu thutak inhriet nontir rop cheu chu ka thaw dingah ka ngai tlat a.
14. Ei Lalpa Isu Kristan chieng taka a mi hril angin, hi ka taksa in hi ka suoksan vak ding a ni tah ti ka hriet.
15. Ka suoksan hnunga khom, ieng lai khoma hieng thuhai hi in hriet zing theina dingin theitawp ka suo a nih.
16. Thilthawtheina le ei Lalpa Isu Krista a hung nawk ding thu kan hril lai cheu khan tienami phuok fawm el hril cheu kan ni naw a, mit ngeia a ropuina hmutu kan nih.
17. Pa Pathiena inthoka chawimawina le ropuina a dong lai khan, Ropuina Insangtaka inthokin rawl a hung suok a, " Hi hi ka Naupa, ka Dittak chu a nih, a chungah ka lawm bek bek a nih" a hung ti a.
18. Chu rawl, vana inthoka hung suok chu, keini khomin tlang thienghlima a kuoma kan um laiin kan hriet ve a.
19. Zawlneihai thu lo puong ta kha a'n dik ngei ti keini khomin kan pom nghet zuol a, nangni khom in lungrila Sikhawvar a hung inlang hma chun zan inthim, khaw var hmaa khawnvar eng angin, chu thu chu in lungril entuah hmang inla thang a tih.
20. Pathien Lekha thua hrillawkna thuhai hi zawlneiin ama ngaidana a hril fie anga hung tlung a ni ngai nawh ti hre hmasa phot ro.
21. Hrillawkna hrim hrim hi mihriem thu suok a ni ngai naw a, mihriemin Thlarau Thienghlim thuoia Pathiena inthoka thu suok an puong a ni chauh lem.
      2Peter (1/3)  →