←  2Kings (9/25)  →
1. Zawlnei Elisa chun zawlnei ruol laia pakhat chu a ko a, a kuomah, "Dier kei la, hi hriek bur hi chawi la, Gilead biela Ramot khuoah va fe rawh.
2. I tlung pha leh Nimsi naupa Jehosafat naupa Jehu indon suok la, i hmu pha leh a ruolhai laia inthokin ko bing la, pindan sungah lutpui rawh.
3. Chun, hriek bur hi la la, a lu chungah hriek bur la, "LALPAN hieng hin a hril: 'Israel lal ni dingin hriek ka nal che' tiin. Chu zoah kot hong la, muongchang loin hung tlan kir nawk vang vang rawh" a ta.
4. Chuongchun, zawlnei tlangval chu Gilead biela Ramot khuoa chun a fe a.
5. A tlung chun sipai ofisar ruol thung khawm a hmu a. "Kawmandar, i kuomah thucha hril ding che ka nei" a ta. Jehu chun, "A tu tak hi'm ie?" a ta, ama chun "Nangma kuomah" a ta.
6. Jehu chu a tho a, pindanah an lut a, zawlnei chun a luah hriek a bur a, "LALPA, Israel Pathienin hieng hin a tih: LALPA mipui, Israelhai chunga lal dingin hriek ka nal che.
7. Ka siehlaw zawlneihai thisen le LALPA siehlawhai po po thisen phuba chu Jezebel laka ka lak theina dingin i pu Ahab sunghai chu i sukbohmang vong ding a nih.
8. Ahab sungkuo chu an ram ngei ding a nih. Israel rama mi Ahab thla pasal taphot chu, bawi le bawi naw khom, ka sukbohmang vong ding a nih.
9. Ahab sungkuohai chu Nebat naupa Jeroboam sungkuohai le Ahija naupa Baasa sungkuohai ang bokin siem ka tih.
10. Chun, Jezebel ruong chu Jezreel khaw kul bulah uiin fang an ta, phumtu ding hrim um naw ni hai' tiin" a ta. Chuongchun, kot a hong a, a tlan suok ta nghal a.
11. A ruolhai kuoma Jehu a hung nawk chun an ni laia pakhat chun, "Iengkim a tha de maw? Ieng leia kha mi invetpa kha i kuomah a hung tlat am a na?" a ta. Jehu chun, "Ama kha in hriet mi a na, a thu hril ding awm in hriet tho annawm" a ta.
12. Anni chun, "Hre teu hlak kan tim ie! Mi hang hril ta" an ta. Jehu chun, "Hi hi a thu mi hril chu a nih: 'LALPAN hieng hin a tih: Israelhai chunga lalah hriek ka nal che' tiin" a ta.
13. Chuongchun, inrang takin an silpuonhai an hlip a, kailawn chunga chun an pha a, tawtawrawt an mut a, "Jehu lal a ni tah" tiin an khek a.
14. Nimsi naupa Jehosafat naupa Jehu chun Joram chu a phier tan ta a (Chu chu Joram le Israel mi po poin Aram lal Hazael laka Gilead biela Ramot khuo an veng lai a nih.
15. Lal Joram ruok chu Aram lal Hazael leh an indonaah Aram mihaiin an inhliem a, insukdam dinga Jezreel khuoa a kir nawk hun lai a nih). Jehu chun a ruolhai kuomah, "Keima tienga thang in ni chun mi tu khomin hi thu hi Jezreel khuoa an zu hril nawna dingin Ramot khuo insuoktir naw hrim hrim ro" a ta.
16. Chuongchun Jehu chu tawlailirah a chuong a, Jezreel khuoah a fe a. Chu taka chun Joram chu nat khuma zal a na, Juda lal Ahazia khom ama en dingin a zu fe a.
17. Jezreel kula ralvengtuin Jehu le a sipaihai hung thlak lai a hmu chun, "Sipai tuhai amanih hung thla ka hmuh" a ta. Joram chun, "Sakor chung chuong mi ko la, anni hmuok dingin tir la, 'A tha tieng thu am a ni?' tiin va'n don raw se" a ta.
18. Chuongchun, sakor chung chuong pakhat chu anni hmuok dingin a fe a, "Lalin, 'A tha tieng thila hung am in ni?' ti indon dingin a mi tir a nih" a ta. Jehu chun, "Chu chu nanga hriet ding ieng am a um a? Ka hnunga hin mi zui rawh" a ta. Ralvengtu chun, " Ka mi tir chu a va tlung ngei a, sienkhom a hung kir nawk ta nawh" a ta.
19. Mi dang an tir nawk a, ama chun Jehu chu thu ngai bok a'n don nawk a. Jehu chun, "Chu chu nanga hriet ding ieng am a um a? Ka hnunga hin mi zui rawh" a ti nawk a.
20. Ralvengtu chun, "Ka mi tir chu a va tlung ve ngei a, sienkhom a hung kir chuong bik nawh. An thuoitu tawlailir khal dan saw Nimsi naupa Jehu khal dan a hoi khop el, mi invet ang elin a khal hlak a nih" a ta.
21. Joram chun, "Ka tawlailir hung buotsai ro" tiin thu a pek a, an hung buotsai zo chun anni tawlailir ve veah Israel lal Joram le Juda lal Ahazia chu Jehu hmuok dingin an suok a, Jezreel mi Nabot huonah an intuok a.
22. Joramin Jehu a hmu chun, "A tha tieng thil am a ni, Jehu?" a ta. Ama chun, "I nu Jezebelin milem biek le dawi a ching nasat sung hin that tieng thil iengtin am a um thei ding a na?" a ta.
23. Joram chun a tawlailir chu a kei her a, a tlan a, Ahazia kuomah, "Inhlemna a nih, Ahazia" a ta.
24. Chu phing leh Jehu chun a thalngul a kuoi a, Joram dar inchuktuonaah a kap a, thal chun a lungah a dawt tlang a, tawlailira chun a op ta rop el a.
25. Jehu chun tawlailir tienga inrawitu Bidkar kuomah, "Va hnuk thla la, Jezreel mi Nabot huona ngei khan pei hawn rawh. Kha hmaa nang le kei, a pa Ahab tawlailir hnunga ei fe tum khan LALPAN hi thu hi a lo hril lawk tah a nih ti i hriet zing ka ring.
26. LALPAN, 'Zani khan Nabot le a naupahai thisen suok ka hmu ngei annawm' a ti kha. Chun, LALPA bokin, 'Hi hmuna ngei hin ka thungrul ding che a nih' a ti bok. Chuongchun, LALPA thu ang chun a ruong saw va la la, hi hmuna ngei hin dehawn rawh" a ta.
27. Juda lal Ahazia-in chuong thilhai a hmu chun Bet Hagan tieng a tlan tung a. Jehu chun a hnot a, "Ama khom kha that nghal ro" tiin a khek a. Ibleam kawl, Gur panna tungah a tawlailira chuong chu a'n inhliem a, sienkhom Megido tieng a tlan hmang a, chu taka chun a thi a.
28. A siehlawhai chun tawlailirin Jerusalem tieng an phur tung a, Davida khawpuia a thlana chun a thlatuhai lai an phum a.
29. Ahazia chu Ahab naupa Joram inlala inthoka kum sawm le pakhatnaah Judahai chunga hung inlal tan a nih.
30. Chu zoah Jehu chu Jezreel khuoah a fe a. Jezebelin a lo hriet chun a mithai a lo nal a, a sam dam a lo chei a, tukverah a dak a.
31. Kul kotkhara Jehu a lut lai chun, "Mani puhai thattu Zimri, a tha tieng thu am a ni?" a lo ta.
32. Anni umna tukver tieng chu a hang en a, "Tu am ka tienga thang? Tu am?" a ta. Mi tilre pahni pathum vel an hung dak suok a.
33. Ama chun, "Kha nu kha hung the thla ro" a ta, an hung the thlak a, a thisen inkhieng chun bang le sakorhai chu a per khum nuoi a, ama chu an lo chil a.
34. Jehu chu a lut a, fain a dawn a. "Tongsephurnu kha lo va ngaiven unla, lal naunu a ni si a, va phum ro" a ta.
35. Phum dinga an va fe chun a luru dam, a ke bawr dam le kutpha bawr dam chauh naw chu hmu ding a um ta naw a.
36. An hung kir a, Jehu an va hril a, ama chun, "Hi hi LALPAN a siehlaw Tisbe mi Elija hmanga, 'Jezreel hmuna ngei hin uihaiin Jezebel ruong chu la fang an tih.
37. Jezreel hmuna ngei hin Jezebel taksa chu ek tawng angin, 'Hi hi Jezebel a nih' ti tu khom hriet thei lo dingin la'n dar a tih' ti thu a hril kha a ni hi" a ta.
←  2Kings (9/25)  →