←  2Kings (8/25)  →
1. Elisa chun a naupa thi hnung a sukdampek nuhmei kuoma chun, "Tho la, nang le i sunghai leh in um theina hmun hmunah lo va um hri phot ro, LALPAN hi rama hin kum sari tam a'n tlaktir ding a nih" a ta.
2. Pathien mi hril ang chun nuhmei chun a thaw a, ama le a sunghai chu Filistinhai ramah kum sari an va um a.
3. Kum sari hnungin nuhmei chu Filistinhai rama inthokin a hung kir a, a in le lo pekir dinga hni dingin lal kuomah a hung a.
4. Chu lai chu lalin Pathien mi siehlaw Gehazi kuoma, "Elisan thil ropui a thawhai po po chu mi hril rawh" tia a lo indon lai tak a nih.
5. Nuhmei naupa thi hnung Elisan a sukhring nawk thu Gehaziin a lo hril lai taka chu nuhmei ngei lal kuomah a hung a hmu chun, "Aw laltak, ka pu, hi nuhmei naupa hi annawm Elisan a sukhring nawk chu! Hi a naupa ngei hi annawm a sukhring nawk chu" a ta.
6. Lal chun nuhmei chu a chanchin a'n don a, ama chun a hril a. Chun, a thil hni chungchanga chun lal chun a thoktu pakhat kuomah, "A ta po po le a lo tharsuok po po chenin, hi ram a suoksana inthoka a hung kir nawk chen sunga mi chu pe kir vong rawh" a ta.
7. Elisa chu Damaska khuoah a fe a, Aram lal Ben Hadad chu a lo damnaw a, Pathien mi a hung thu chu an hril a.
8. Ama chun Hazael kuomah, "Thilpek chawi la, Pathien mi chu va hmu rawh. Ka natna hi ka dam suok thei ding am ti ama hmangin LALPA mi lo rawnpek rawh" a ta.
9. Hazael chu Elisa hmu dingin a fe a, Damaskaa an thil nei tha tinreng, sanghawngsei sawmli phur tawk a chawi a, a hmaa chun a va ngir a, "I naupa Ben Hadad, Aram lalin, 'Ka damnaw hi ka tha suok nawk ding?' ti indon dingin i kuomah a mi tir a nih" a ta.
10. Elisa chun, "Fe la, a kuomah, 'Hung tha suok ngei i tih' ti va hril rawh. Chun, a thi ngei ding thu khom LALPAN a mi hril a nih" a ta.
11. Hazael chu ving hiel khopin Elisha chun mit la son der loin a en a. Chu zoah Pathien mi chu a tap ta a.
12. Hazael chun, "Pu, ieng dinga i tap am?" a ta. Elisa chun, "Israelhai poi i la tawk nasat dingzie ka hmu tlang vong lei a nih. An kulhai rawpek i ta, an tlangvalhai kawlhnamin that i ta, an naupanghai chu hnuoi vuoknan hmang i ta, nuhmei nau pai lai hai phing chen phir thler i tih" a ta.
13. Hazael chun, "Kei i siehlaw uicho mei mei hin chuong ang thil nasa chu ieng tin am a thaw thei ding?" a ta. Elisa chun, "Aram lal i la hung ni dingzie LALPAN a mi'n hmutir a nih" a ta.
14. Chuongchun, Elisa kuoma inthok chun a suok a, a pu kuom tieng chun a fe a. A pu Ben Hadad chun, "Elisan ieng tin am a lo hril che a?" a ta, ama chun, " 'Tha suok nawk mol a tih' tiin a mi hril a nih" a ta.
15. Sienkhom a zingah Hazael chun puon sa tak hi tuiah a'n chie a, chu chun Ben Hadad chu a hmaiah a hup hlum a, a lalna chu a hung hluo ta a.
16. Israel lal Ahaba naupa Joram a'n lala inthoka kum ngana, Juda lala Jehosafat a thang lai chun a naupa Jehoram chun a lalna chu a hung hluo a.
17. Juda lal a hung ni chun kum sawmthum le kum hni mi a na, Jerusalemah kum riet ro a rel a.
18. Ahab sunghai ang bokin, Israel lalhai lampui hraw chu a hung hraw ve a, Ahab naunu chu nuhmeiah a nei a, LALPA mithmuah thil tha lo tak a thaw hlak a.
19. Amiruokchu, a siehlaw Davida leiin LALPAN Judai ram chu a suksiet nuom naw a, kumkhuoa Davida le a thlahai ta dinga roreltu inneitir zing chu a lo tiem ta si a.
20. Jehoram hun lai chun Edom mihai chu Judahai lakah an hel a, lal an insiem chop a.
21. Chuongchun, Jehoram chu a tawlailir po po leh Zair khuoah a va fe a. Edomhai chun a tawlailir kawmandarhai leh an inhuol vong a, sienkhom zana chun an tawn tlang a, an suok thei hram a, a sipaihai chu an in tieng seng an tlan dar ta vong a.
22. Edomhai chu tu chen hin Judahai lakah an la hel ta zing a nih. Chuong lai bok chun Libna khuo khom an lo hel ve a.
23. Jehoram inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong.
24. Jehoram chu a thlatuhai kuomah a chawl a, Davida khawpuiah an phum a, a hmuna chun a naupa Ahazia chu lalin a hung um ta a.
25. Israel lal Ahab naupa Joram inlal kum sawm le pahninaa chun Juda lal Jehoram naupa Ahazia chu a hung inlal tan a.
26. Ahazia-in ro a rel tan chun kum sawmhni le kum hni mi a na, Jerusalemah kum khat ro a rel a. A nu hming chu Athalia a na, Israel lal Omri tunu a nih.
27. Ahazia chu Ahab sungkuohai makpa a ni ang hrimin an lampui hraw chu a hraw ve a, LALPA mithmuah thil tha lo tak a thaw hlak a.
28. Ahab naupa Joramin Gilead biel Ramot khuoa Aram lal Hazael a hang beinaa chun Ahazia chu a thang ve a, Aramhai chun Joram chu an lo inhliem a.
29. Aram lal Hazael a beinaah Joram chu Aram haiin Ramot khuoa an lo inhliem tak lei chun insukdam dingin Jezreel-ah a kir nawk a. Chuongchun, Jehoram naupa Juda lal Ahazia chu Ahab naupa Joram hliem chu kan dingin Jezreel khuoah a zu fe a.
←  2Kings (8/25)  →