←  2Kings (6/25)  →
1. Zawlnei ruol chun Elisa kuomah, "Ngai ta, i bula kan inthung khawmna hmun hi kan intar taluo a nih.
2. Jordan vadungah zu feng kan ta, thing zu put kan ta, kan inthung khawmna ding chu taka chun in bawl kan ti aw?" an ta. Ama chun, "Zu fe ro" a ta.
3. Anni laia pakhat chun, "I siehlawhai lai hin nang khom hung ve ta la" a ta, ama chun "Hung veng ka ti chu" a ta.
4. Chuongchun, anni le chun a fe ve a. Jordan vadung an tlung chun thing an phur a.
5. Mi pakhatin thing a tuk lai chu a hreipui ha a tlong a, tuiah a tla a. Ama chun, "Pu, a va poi de aw! Mi hrei ka haw a ni nawk nghal si a" a ta.
6. Pathien mi chun, "Khaw lai am a na a tlakna?" a ta, ama chun a tlakna lai chu a kawkhmu a. Elisa chun thing kau a sat a, tuia chun a khaw lut a, hrei ha chu a hung inlang suok ta a.
7. Elisa chun, "La raw leh" a ta, a hei ban a, a lak a.
8. Chun, Aram lalin Israelhai a'n dopui a. A ofisarhai a rawn hnung chun, "Chu hmun kha hmuna chun inchan ei tiu" a ta.
9. Pathien mi chun Israel lal kuomah, "Chuong hmuna fe chu fimkhur ro, Aram mihai an hung ding a nih" tiin mi a tir hlak a.
10. Israel lal chun Pathien miin a hrilna hmun chu a va'n thlithlaitir pei hlak a. An hung zatin Elisa chun lal chu a lo hril lawk pei leiin chuong hmuna hai chun an inhum thei pei a.
11. Chu chun Aram lal chu a suklungsen hle a. A ofisarhai chu a ko a, "Eini lai hin a tu tak hi'm a na Israel lal tienga thang ruk, in mi hril thei naw maw?" tiin a'n don a.
12. Anni laia ofisar pakhat chun, "Aw ka lal le ka pu, a thang ruk tu khom kan um nawh. Israel rama um Zawlnei Elisa a ni lem. I khum pindan sungrila i hrilhai chen khom hi Israel lal kuomah a ripawt vong a nih" a ta.
13. Lal chun, "Mi tira ka man theina dingin fe unla, a umna va zong suok ro" a ta. Anni chun, "Dothan khuoah a um" tiin an hung ripawt a.
14. Chuongchun, sakor le tawlailir le sipai tam tak a tir a, zanah an va fe a, khuo chu an inhuol a.
15. Pathien mi siehlaw chu zing inhma takin a tho a, tuolah a va dak a, sipaihaiin sakor leh tawlailir leh khuo an lo inhuol khup chu a hmu a. "E khai, pu, ieng tin am ei thaw ta ding a na?" a ti chul a.
16. Zawlnei chun, "Ti naw ta la. Anni tienga thang nekin eini tienga thang an tam lem dai annawm" a ta.
17. Elisa chu a tongtai a, "LALPA, a hmu theina dingin a mit hung sukvarpek rawh" a ta. LALPA chun siehlaw mit chu a sukvarpek a, Elisa umna vel tlanga mei tawlailir le sakor sip hmur el chu a hmu ve thei ta a.
18. Ama tieng pana hmelmahai an hung thlak lai chun LALPA kuomah Elisa a tongtai a, "Hienghai hi an mit sukdel rawh" a ta, Elisa hni ang chun an mit a sukdel ta vong a.
19. Elisa chun, "Hi chu lampui a ni nawh, hi chu khuo a ni nawh. Mi zui pei unla, in mi zong kuoma chun thuoi ka ti cheu" a ta, Samaria khawpuia chun a thuoi lut vong a.
20. Khawpui an lut hnung chun Elisan, "LALPA, an hmu theina dingin an mit sukvarpek rawh" a ta. Chuongchun, an mit chu LALPAN a hongpek a, an hang ngha vel chun Samaria khawpui sungah an lo um ta der el a.
21. Israel lalin anni rawi a hmu chun Elisa kuomah, "Pa, kan that tawl el ding?" a ti chul a.
22. Elisa chun, "That lo e. Kawlhnam le thalngul hmanga sala in manhai khom in that ngai lem. Bu le dawn ding pe la, fain dawn hai sien, an pu kuomah kir nawk raw hai se" a ta.
23. Chuongchun, fak ding hnienghnar takin an buotsaipek a, faa an dawn zo chun an infetir ta vong a, an pu kuomah an kir nawk a. Aram lal sipaihai chun Israel ram an run nawk ta ngai nawh.
24. Chu hnung chun Aram lal Ben-Hadad chun a sipai po po a khawm a, Samaria khawpui chu an hang inhuol a.
25. An inhuol bet tlat leiin Samaria chu an tam nasa em em a, sabengtung lu hi tangkaruo shekel sawmrietin an zor a, vathu ek khom gram zahniah tangkaruo shekel ngain an zor hiel a nih.
26. Chun, kul tlanga Israel lal a fe lai chu nuhmei pakhatin, "Aw laltak, ka pu, mi thangpui rawh" tiin a ngen a.
27. Ama chun, "LALPAN a thangpui che a ni ngot naw chun kei chun iengtin am ka thangpui ding che a na? Hrizawla inthokin maw? Grep sawrna khura inthokin maw?
28. Iem a na i harsatna chu?" a ta. Nuhmei chun, "Hi nu hin, 'Voisuna ei fak dingin i nau thaw la, zingah ka nau ei fak dingin thaw veng ka tih' a ta.
29. Chuongchun, ka naupa chu kan suong a, kan fak ta a. A tuka chun a kuomah, 'I naupa hung thaw ve ta raw leh' ka ta, sienkhom a thup hmang dai si a" a ta.
30. Lalin chu chu a hrietin a lal thuom a pot thler a. Kul tlanga a fe lai chu mipuiin an en thup a, a zakuo hnuoia chun saiip a lo hak zing a.
31. Ama chun, "Safat naupa Elisa ring voisuna tan a ni naw chun LALPAN a law law mi law sien, chu neka nasa khom chun mi thaw raw se" a ta.
32. Elisa chu a inah a um a, upa ruolin an pan a. Lalin hma lawka a tirhai an hung tlung hma chun upahai kuomah, "Hi tuolthattupa hin ka lu la dingin mi a hung tir ti in hriet ve naw maw? Ngai ta u, mi tirhai an hung tlung pha leh kotkhara khan lo dang tlat ro. A hnunga ke pen ri khom chu a pu ke pen ri a ni nghe nghe ta naw maw?" a ta.
33. Chuonga a biek tawl lai zing chun mi tirhai chu an hung tlung thla a. Lal chun, "Hi sietna hi LALPAA inthok a nih. Ieng leiin am LALPA chu ka nghak zing ding a na?" a ta.
←  2Kings (6/25)  →