←  2Kings (5/25)  →
1. Aram lal sipai kawmandar Naaman a um a. Ama hmangin LALPAN Aramhai chu hnena a'n changtir hlak leiin a pu mita chu mi ropui tak le ngaisangum tak a nih. Ama chu sipai huoisen a na, amiruokchu phar a nih.
2. Aram mihai chu a pawl pawla an ramsuoknaah voi khat chu Israel rama inthokin nuhmei te pakhat hi salah an hung hawn a, Naaman nuhmei rong a bawl hlak a.
3. A pi kuoma chun, "Ka pu hin Samaria-a um zawlnei pakhat va hmu sien ka va ti de aw! A phar hi a lo sukdam el ding a ni si a" a ta.
4. Naaman chu a pu kuomah a fe a, Israel rama inthoka nuhmei naupang an hung thuoiin a hrilhai chu a pu a hril a.
5. Aram lal chun, "Zu fe raw khai, Israel lal kuomah lekhathon ziek ka tih" a ta. Chuongchun tangkaruo cheng singthum, rangkachak cheng sangruk le inthlakna ding thuomhnaw man tam tuok sawm chawiin a'n thok suok a.
6. Israel lal ta dinga a lekha chawia chun, "Hi lekha hi chawiin ka kawmandar Namaan chu a phar i lo sukdampek dingin i kuomah ka hung tir a nih" ti a chuong a.
7. Israel lalin chu lekha a hang tiem zo chun a lal puon a kei thler a, "Kei hi Pathien am ka ni? Mi sukhluma sukhring thei am ka ni? Ieng dinga hi mi hin phar sukdam dinga ka kuoma a hung tir am a na? Ngai ta u, ka chunga buoina siem tuma remchang a zong dan hi!" a ta.
8. Israel lalin a puon a kei thler thu Pathien mi Elisan a lo hriet chun thu a thon a, "Ieng dinga i puon i pot thler am a na? Chu mi chu ka kuomah hung tir la, Israel rama hin zawlnei a um ti hre el a tih" tiin.
9. Chuongchun, Naaman chu a sakor le tawlailirhai leh a fe a, Elisa in kota chun a chawl a.
10. Elisa chun, "Jordan vadungah voi sari inphum la, i vunhai chu hung pangngai nawk a ta, hung dam inthieng el i tih" ti hril dingin mi a tir a.
11. Naaman chu lungsen takin a kir nawk ta a. "Ngai ta u, ama ngei hung suok a ta, ka hmaah ngir a ta, LALPA Pathien hming lam a ta, ka'n pharna hmun hmuna chun a kut thin a ta, ka phar chu sukdam dingin ka lo beisei a na.
12. Damaskaa vadung Abana le Pharpar hai chu Israel rama vadung po po neka thienghlim lem an ni naw am a ni? Chuong vadunga hai chun insilin ka'n sukthienghlim thei naw am a ni?" a ta. Chuongchun, lungsen takin a kir nawk a.
13. Chun, Naaman siehlaw chun a va hnai a, "Pa, zawlnei khan thil khir tak inthawtir ding che ni sien, i thaw el naw ding maw? 'Va'n sil la, va'n sukthienghlim rawh' i kuoma a ti kha thaw ding lem awm a ni naw maw?" a ta.
14. Chuongchun, a tum a, Pathien mi ti ang chun voi sari a zuk inphum a, a pangti chu naute vun ang elin a hung um a, a hung inthieng ta a.
15. Naaman chu a rawihai leh Pathien mi in tieng chun a kir nawk a, a hmaah a ngir a, a kuomah, "Israel rama chauh naw chu khawvel hmun dangah Pathien a um nawh ti tu hin ka hriet tah. Tuhin i siehlaw thilpek hi mi pompek hram rawh" a ta.
16. Elisa ruok chun, "A rong ka bawl LALPA hringna salin ka hril, ieng khom la naw ning" a ta. Naamanin a ngen raka chu a lak nuom chuong nawh.
17. Naaman chun, "Chuong chu a ni si leh i siehlaw hi sabengtung pahni phur tawk bek pil mi pe raw khai; tuta inthok chu i siehlaw hin LALPA kuoma chauh naw chu pumraw thilhlan le inthawina hrim hrim pathien dang kuomah inhlan ta naw ningah.
18. Hi thil pakhata chauh hin LALPAN i siehlaw hi ngaithiem raw se: Aramhai pathien Rimon be dinga ka pu a fe changin a hnung ka zui a ngai a Rimon tempula ka puin ka kut ringsana kuna chibai a buk pha ka kun ve a ngai hlak a, chu chungthua kher chun, i siehlaw hi LALPAN ngaidam raw se" a ta.
19. Elisa chun, "Thlamuong takin fe rawh" tiin a'n thla a, a kuoma inthok chun a suok ta a.
20. An la phak hlat hmain Elisa siehlaw Gehazi chun, "Ka pu hin Aram mi Naaman thil hung chawihai la hlek loin a'n fetir nawk el a, LALPA hringna salin ka hril hi, va hnot ka ta, iemani zat bek chu va lapek ka tih" a ta.
21. Chuongchun. Gehazi chun Naaman chu a hnot zui a. A kuom tienga hung tlan mi tu amanih Naamanin a hmu chun lo be dingin a tum a, "Thil tha tieng thu chu ni awm tak maw?" a ta.
22. Ama chun, "Ni e, thil tha tieng thu a nih. Ka puin, 'Efraim tlangrama inthokin zawlnei pahniin an mi hung sir thut a, anni chu tangkaruo cheng sangthum le inthlakna ding silfen pahni pe raw khai' tia hril dingin a mi tir a nih" a ta.
23. Naaman chun "Sangruk hi la lem hram raw khai" a ti tal a. Chuongchun, tangkaruo sangruk chu inthlakna ding silfen pahni le chun ip hniah a thun a, a siehlaw pahnihai chu a'n phurtir a, Gehazi hmaa chun an fe a.
24. Tlang an tlung chun Gehazin ip hnihai chu a lak a, inah a sie hre a. Chuongchun, mi pahnihai chu a tir kir nawk ta a.
25. Gehazi chu inah a lut a, a pu hmaa chun a ngir a. Elisa chun, "Gehazi, khaw laia fe che?" a ta, ama chun, "I siehlaw hi khaw lai khom ka fe nawh" a ta.
26. Sienkhom Elisa chun, "A be ding chea tawlailira inthoka mi a hung tum lai khan ka thlarau chu i kuomah a fe pei a ni naw am a ni? Tu hi tangka hai, silfen hai, oliv huon hai, grep huon hai, bawinu hai le bawipa hai lak hun am a ni?
27. Naamana phar chu nang le i thlahai chungah kumkhuoin kop lem tang a tih" a ta. Gehazi chu Elisa kuoma inthok chun a suok a, vur anga varin a taksa chu a hung inphar ta vong a.
←  2Kings (5/25)  →