←  2Kings (4/25)  →
1. Zawlnei ruol laia pakhat nuhmei chun Elisa kuomah, "I siehlaw ka pasal chu a lo thi ta a, ama chu Pathien ti mi a nih ti i hriet. Tu hin a leibatna pa chun ka naupahai pahni chu bawia nei dingin a hung thuoi tum a nih" tiin a beidongna thu chu a hung intlun a.
2. Elisa chun, "Iem ka thawpek thei ding che a na? Inah iem i nei mi hril rawh" a ta. Ama chun, "I bawinu hin sahriek bur khat chauh naw chu ieng khom nei ka nei nawh" a ta.
3. Elisa chun, "Fe la, i tuolbawmhai bel ruok po po haw khawm la, tlawmte chauh haw naw rawh.
4. Chun, i inah lut la, i nauhai leh kot inkal khum unla, chuong bel ruok po poa chun sahriek chu sung sip unla, a sip po a tumin sie pei ro" a ta.
5. Hmeithai chu a inah a'n lawi a, a nauhai leh kot an inkal khum a. Belhai chu a kuomah an hung chawi a, a lo sung sip pei a.
6. Bel a sung sip vong hnung chun a nauhai kuomah, "Bel hung la sa ro" a ta. Anni chun, "Bel dang a um ta nawh" an ta, sahriek chu a kang ta a.
7. Chun anni chun Pathien mi chu an va hril a, ama chun, "Sahriek chu va zor unla, i leibat chu va rul la, a chuong po chu i nauhai le in khawsakna dingin hmang ro" a ta.
8. Ni khat chu Elisa chu Sunam khuoah a'n zin a, chu taka chun nuhmei neinung tak el a um a, bu fa dingin a lo fiel a. Chuong ang chun, a fe le hungah chu ina chun chawlin bu a fak hlak a.
9. Chu nuhmei chun a pasal kuomah, "Ei in hung sir vet pa hi Pathien mi a nih ti ka hriet.
10. A mi hung sir changa a riekna dingin in sawnga khin a pindan ding siempek ei ta, khum dam, dawkan dam, thungna dam le khawnvar siena dam siepek ei tih" a ta.
11. Ni khat chu Elisa a hung nawk a, a pindana chun a kai tung a, a zal a.
12. A siehlaw Gehazi kuoma chun, "Sunam nu kha hung ko ta" a ta, a va ko a, a hmaa chun a hung ngir a.
13. Ama chun a siehlaw kuomah, "Hieng hin hril rawh: 'Hieng khopa buoi hin i mi lo enkol a, thawpek thei che iem kan nei a? Lal kuoma dam sipai kawmandar kuoma dam iem ka hnipek ding cheu?' tiin" a ta. Ama chun, "Ka chipuihai laia in neia khawsa ka ni annawm" a ta.
14. Elisa chun a siehlaw kuomah, "Chuong a ni si chun iem ei thawpek ding aw?" a ta. A siehlaw chun, "Nau pasal nei lo a na, a pasal hlak chu a tar ta bok si a" a ta.
15. Elisa chun, "Va ko nawk rawh" a ta, ama chu kotkhar bieng chelin a hung ngir a.
16. Elisa chun a kuomah, "Tu ang hun a hung tlung pha leh nau pasal pom tang i tih" a ta. Ama chun, "Ni lo pu, nang Pathien mi chun i siehlawnu hi hlem der lul naw rawh" a ta.
17. Chun, nuhmei chu a hung inrai a, Elisan a kuoma a hril ang ngei khan chu hun vela chun nau pasal a nei ta a.
18. Naute chu a hung sei lien pei a. Ni khat chu busiktuhai kana fe a pa chu a zui ve a.
19. A pa kuomah, "Ka lu, ka lu" a ta. A siehlaw kuoma chun, "Pom la, a nu kuomah va thak rawh" a ta.
20. Siehlaw chun a nu kuomah a pom phei a, sunchang lai chen a nu mal chungah a'n thung a, a thi el ta a.
21. A naupa chu Pathien mi pindana chun a pom tung a, a khum chungah a'n zal a, kot a khar a, a suok ta a.
22. A pasal chu a ko a, "Pathien mi kuomah fea ka hung kir nawk nghal theina dingin siehlaw pakhat le sabengtung mi buotsaipek rawh" a ta.
23. A pasal chun, "Voisun khera iem a kuoma fe a tul a na? Thla thar ni khom a ni naw a, Sabat khom a ni bok si nawh" a ta. Ama chun, "A poi chuong lem" a ta.
24. Chuongchun, sabengtung chungah a chuong a, a siehlaw kuomah, "Hma thuoi la, fe pei la, thu ka pek che a ni naw chun muongchang der naw rawh" a ta.
25. Chuonga fe peiin Pathien mi umna Karmel tlang chu a tlung a. Rala inthokin Pathien mi chun a lo hmu a, a siehlaw Gehazi kuomah, "En ta, Sunama nuhmei kha a ni tlat el!
26. Tlan la, lo va tuok la, 'I dam maw? I pasal a dam maw? I naupa a dam maw?' lo ti rawh khai" a ta. Ama chun, "Dam e" a ta.
27. Chun, tlanga Pathien mi kuom a hang tlung chun a keah a chel a. Gehazi chun ama chu va nam kieng a tum a, sienkhom Pathien mi chun, "Tosan rawh. Beidongna nasa takin a tlak buok a ni hi. Chu chu LALPAN ka lakah a thup hri a, a mi la hril hri naw a nih" a ta.
28. Ama chun, "Pu, nau pasal ka hni che am a ni? 'Ka beisei suksangin mi hlem der lul naw rawh' ka ti lem che a ni naw maw?" a ta.
29. Elisa chun Gehazi kuomah, "I silpuon kha i kawngah zel la, ka hmol hi chawi la, tlan nghal rawh. Lampuiah tu khom chibai naw la, an chibai che khomin buk ve kher naw la, ka hmol hi naupang hmaiah innghat rawh" a ta.
30. Sienkhom, chu naupang nu chun, "LALPA hringna le i hringna salin ka hril, "Inthla naw top ka ti che" a ta, a tho a, a zui ta a.
31. Chun, Gehazi chun hma a lo khal a, naupang hmaia chun hmol chu a sie a, sienkhom ieng ri khom a suok naw a, a chang bok nawh. Chuongchun, Gehazi chu a tlan kir nawk a, "Naupang chu a la thanghar chuong nawh" tiin Elisa chu a hril a.
32. Elisan in a hung tlung chun naupang chu ama khumah thiin an lo inzal a.
33. A lut a, kot a'n khar khum a, LALPA kuomah a tongtai a.
34. Chun, khumah a kai a, naupang chu hmur le hmur, mit le mit, kut le kut inchuktuoin a chungah a bok a. Chuonga a chunga a hang bok chun naupang pang chu a hung lum tan ta a.
35. Elisa chu a tho a, pindana chun an vak vel a, khuma chun a kai a, naupang chunga chun a bok nawk a. Chuongchun, naupang chu voi sari a hung insim a, a mit a hung meng ta a.
36. Elisa chun Gehazi chu a ko a, "Sunam nu kha hung ko rawh" a ta. A ko a, a hung lut chun, "I naupa hi pom ta raw leh" a lo ta.
37. Amanu chu a ke bulah a bokkhup a, chu zoah a naupa chu a pom a, a suokpui ta a.
38. Elisa chu Gilgal tieng a kir nawk a, chu lai rama chun tam a tla nasa hle a. Zawlnei ruolin an hung inhmupui a, a siehlaw kuoma chun, "Bel lien tak khan bu hruoi suongpek rawh" a ta.
39. Chun, mi pakhat hi ram tieng hmeruo zongin a fe a, ram hrui a hmu a, um ra chu a silpuon sipin a hung fun a, a khoi a, iem a nih ti hre lo chun bu hruoia chun a thlak a.
40. Bu hruoi chu an hang thur a, an fak tan chun, "Aw Pathien mi, bel sunga hin thina a um" tiin an khek chul a, an fak thei naw a.
41. Elisa chun, "Beiphit hung la ro" a ta. Bela chun beiphit chu a phul a, "Hi mihai fak ding hin thur ta ro leh" a ta, bel sunga chun tium ieng khom a um ta naw a.
42. Chun, Baal Salisaa inthokin mi pakhat a hung a, Pathien mi ta dingin bu thar hmasa taka inthoka siem barli beiper sawmhni le bu thar vui iemani zat a hung chawi a. Elisa chun, "Mipui fak dingin sem ro" a ta.
43. A siehlaw chun,"Ieng tin am hieng zat chauh hi mi za zet fak ding chun ka sem ngam ding?" a ta. Elisa ruok chun, "Mipui fak dingin sem ro. Hieng hin LALPA chun a hril: 'Fa seng an ta, an fak bang khom iemani zat um a tih' tiin" a ta.
44. Chuongchun a hang sem a, an fak seng a, LALPA hril ang khan, an fak mahla iemani zat a la chuong a nih.
←  2Kings (4/25)  →