←  2Kings (3/25)  →
1. Juda lal Jehosafat inlala inthoka kum sawm le kum rietah Ahab naupa Joram chu Samaria khuoah Israelhai lalin a hung um a, kum sawm le kum hnih ro a rel a.
2. Ama chun LALPA mithmuah thil suol a thaw hlaka chu a nu le pa ang em chun a thaw ve nawh. A pain Baal lung a lo phun chu a pei hmang a.
3. Sienkhom, Nebat naupa Jeroboam suolnaa chun a kop ve a, Israelhai thil suol a'n thawtir a, chu lampui chu a maksan ta nawh.
4. Moab lal Mesa chu beram vai mi a na, Israel lal kuomah sie chawinain beramte nuoi khat le beram nuoi khat hmul a pek hlak a.
5. Amiruokchu Ahab thi hnungin Moab lal chu Israel lal lakah a hel a.
6. Chuong lai chun lal Joram chu Israelhai po po khawm dingin Samaria-a inthokin a suok a.
7. Chun, Juda lal Jehosafat kuomah, "Moab lal ka lakah a hel leiin i mi hang beipui thei naw di'm a nih?" tiin mi a tir a. Ama chun, "Hang beipui thei e. Nang le kei, ka mihai le i mihai le ka sakorhai le i sakorhai chu thang hmunkhat vong ei ni annawm" a ta.
8. Chun, ama bok chun, "Khaw tieng panga inthokin am hang bei ding i ti a?" a ta, Joram chun, "Edom thlaler tienga inthokin" a ta.
9. Chuongchun, Israel lal chu Juda lal le Edom lal leh an inthok suok a, ni sari sung an fe kuol hnung chun anni le an ranhai dawn ding tui an nei ta naw a.
10. Israel lal chun, "Iem ei chang top ding an ta leh! Lal pathumhai hi Moabhai kuta inhlan dingin LALPAN a mi ko khawm am an ta ding maw?" a ta.
11. Jehosafat ruok chun, "Ama hmanga Pathien ei rawn theina dingin hi taka hin LALPA zawlnei pakhat khom an um naw a ni maw?" a ta. Israel lal hnuoia ofisar pakhat chun, "Safat naupa Elisa a um. Ama chu Elija kut tuia buokpek hlaktu kha a nih" a ta.
12. Jehosafat chun, "A kuomah LALPA thu a um chu" a ta. Chuongchun, Israel lal le Jehosafat le Edom lal chu ama hmu dingin an fe thla a.
13. Elisa chun Israel lal kuomah, "Nang le kei iem inmatna ei nei a? I pa zawlneihai le i nu zawlneihai kuoma fe lem rawh" a ta. Israel lal chun, "Fe lo e. Lal pathum hi Moab-hai kuta pek dingin LALPAN a mi thuoi khawm a nih" a ta.
14. Elisa chun, "A rong ka bawl Iengkim LALPA hringna salin ka hril, nangni laia hung thang Juda lal Jehosafat hmel inza ni naw lang chu en khom en nawng ka ti che a, ngaisak bok nawng ka ti che.
15. Chuong a ni ta si leh tingtang tum thiem hung ko ro" a ta.Tingtang tum thiemin a hang tum chun LALPA kut chu a chungah a hung tlung a.
16. Ama chun, "Hi hi LALPA thu chu a nih: 'Hi ruoma hin khur cho teu ro.
17. Thli ri amanih ruo sur ri amanih hre naw ti niu a, sienkhom hi ruom hi tuiin hung sip a ta, nangni le in ran haiin dawn ro.
18. Chu chu LALPA ngaia chu thil chin tham a nih. Moab-hai khom in kutah ka pek bok ding a nih.
19. Kul nei khuo po po le khawpui deu hlek po chu sukse vong unla, an thing thahai phur vong unla, an tuikhurhai hruk ping unla, lo tha lai po po chu lungin deng se vong ro' tiin" a ta.
20. A zinga inthawina thilhlan hun vel lai chun, ngai ta, Edom ram tienga inthokin tui a hung luong ta huou huou a, a ram chu tuiin a sip ta a.
21. Anni bei dingin lalhai an hung inthok ti Moab-haiin an hriet chun raldo thei chin po po chu an ko khawm a, ramri-a chun thang an lo khaw a.
22. Zing inhma takin Moabhai chu an tho a, an hma zawna tui nisain a zuk el chu thisen anga sen kukin an hmu a.
23. Anni chun, "Thisen a ni saw. Lalhai chu anni le anni an indo a, an inthat tawl a ni ngei saw. Thaw ro, Moabhai, rallak sum va'n khawm ei tiu" an ta.
24. Israelhai inkulna hmun an hung tlung chun Israelhai chu an che thut a, an lo bei a, an hnot zam a, an ram chu an run a, Moab mihai chu an that a.
25. An khawpuihai chu an suksiet a, lo thatna hmun taphot chu lungin an deng siet a, lung an deng bum hner hnur a. An tuikulhai chu an hruk bit vong a, thing tha taphot chu an phur a. Khuo an sukchim lo um sun chu Kir Hareset chauh a na, chu khom chu saihli chawi pawlin an inhuol a, an per hrep a.
26. Moab lal chun a ngam tawl naw ding a nih ti a hrietin Edom tienga baw tlang tumin kawlhnam chawi mi zasari ruol a thuoi suok a, amiruokchu an hlawsam a.
27. Chu phing leh a naupa upa tak, a ro hluotu ding chu a thuoi a, kul tlanga chun pumraw inthawinaiin a'n hlan a. Israelhaiin chu chu an hmuin rapthlak an ti a,a an intawl kir a, an ram tieng an kir nawk ta a.
←  2Kings (3/25)  →