←  2Kings (24/25)  →
1. Jehoiakim inlal lai chun Nebukadnezzar, Babulon lalin a hung run a, Jehoiakim chu sie khuoah a siem a, sienkhom kum thum a um hnung chun a lungril a thlak a, Nebukadnezzar laka chun a hel a.
2. LALPA chun ama do dingin Babulon hai, Aram hai, Moab hai le Amon hai chu a tir suok a. LALPA thu, a siehlaw zawlneihai a lo inpuongtir tah anga Judai ram chu sukse dingin a tir tawl a nih.
3. Manase thil suol thaw po po lei le Jerusalemah poi tawk lo mi a that teuh leiin LALPAN a ngaidam nuom naw a,
4. a hmu phak loa anni chu son hmang dingin hieng thil hi Judahai chungah LALPA thupekin a'n tlungtir a nih.
5. Jehoiakim inlal laia thil tlung dang le a thilthawhai chu Juda lalhai inlal laia an chanchin inziekna lekhabuah a chuong.
6. Jehoiakim chu a thlatuhai kuomah a chawl a, a naupa Jehoiachin chun a lalna chu a hung hluo ta a.
7. Babulon lalin Eufretis vadunga inthoka Aigupta ruom chen chu a ramah a siem vong leiin Aigupta lal chu a rama inthokin mi run dingin a'n thok suok nawk ta ngai nawh.
8. Jehoiachin a hung inlal chun kum sawm le pariet mi a na, Jerusalemah thla thum a'n lal a, a nu hming chu Nehusta a na, Jerusalem mi, Elnathan naunu a nih.
9. A pa thaw dan ang bokin LALPA mithmuah thil suol a thaw hlak a.
10. Chuong lai chun Nebukadnezzar mihai chu Jerusalemah an hang fe a, khuo chu an inhuol a.
11. An inhuol lai chun Nebukadnezzar chu Jerusalema chun a hang fe a.
12. Juda lal Jehoiachin chu a nu hai, a mi hai, a thoktu hai, a khawnbawl hai le rongbawltu hai leh a kuoma chun an hung inpek a. Babulon lal inlala inthoka kum rietnaa chun Jehoiachin chu a man a.
13. LALPAN a lo hril tah angin, Jerusalema LALPA Tempula rosum po po le lal ina thil hlu po po chu a lak a, LALPA Tempula Israel lal Solomonin rangkachak bur le bel a siem po po chu a hawn vong a.
14. Jerusalema mi po po, mi lien po po, mi hrat le huoisen po po le kut themthiem le thil siem thiemhai po po chu mi singkhat zet salah a thuoi a. A rama mi rethei mong khawnhai chauh an maksan a nih.
15. Nebukadnezzar chun Jehoiachin chu Babulon tieng a thuoi a, a nu hai, a nuhmei hai, a thoktuhai le mi challang po po chu a thuoi sa bok a.
16. Sipaia thang tlak mi sangsari le kut themthiem le thil siem thiem mi sangkhat zet a thuoi a nih.
17. Jehoiachin pate Matania chu a aiin lalah a sie a, a hming chu Zedekia tiin a thlakpek a.
18. Zedekia a hung inlal chun kum sawmhni le pakhat mi a na, Jerusalemah kum sawm le kum khat a'n lal a, a nu hming chu Hamutal a na, Libna khaw mi Jeremia naunu a nih.
19. Jehoiakim thaw dan po po ching vein, LALPA mithmuah thil suol a thaw hlak a.
20. LALPA lungsenna leiin Jerusalem le Judahai chungah hieng po po hi a hung tlung a, a tawpah a hmu phak loah a hnawl hmang tawl ta a. Chuongchun, Zedekia chu Babulon lal chunga chun a hel ta a.
←  2Kings (24/25)  →