2Kings (23/25)  

1. Chuongchun, lal chun Judai ram le Jerusalema upahai po po chu a ko khawm a.
2. Judai rama mi po po, Jerusalema mi po po, thiempuhai le zawlneihai le mipui, a chin taka inthoka a lien tak chen chu thuoiin LALPA Tempulah a fepui a, LALPA Tempula an lekhabu hmu suok thuthlung bua chuong thuhai chu an hriet ngeiah a tiem suok a.
3. Lal chu ban hrulah a ngir a, chu lekhabua chuong thuthlung chu namnghet nawk ding le chu thu anga lungril po po le thlarau po poa LALPA zui ding le a thupek hai, a thu inhriettir hai le a thuruot hai chu zawm dingin LALPA hmaah thu a thlung thar a, mipui po po khomin thuthlung chu zui dingin an intiemkam a.
4. Lal chun thiempu laltak Hilkia le a dottu thiempuhai le kotkhar vengtuhai chu LALPA Tempul sunga Baal hai, Asera hai le vana thil umhai po po biekna dinga siem mi lim le bur le belhai chu la suok vong dingin thu a pek a, Jerusalem khaw kawl, Kidron phula chun an raw hmang a, a vaphai chu Bethelah an fepui a.
5. Juda lalhaiin Judai ram khaw hrang hrang le Jerusalem le a se vel hmun sanga milem betuhai ta dinga rimtui inhlantu dinga thiempu an ruothai po po le Baal hmaa dam, ni le thla le arasi le vana thil umhai po po kuoma dam rimtui inhlantu thiempuhai po po chu a sukbohmang vong a.
6. LALPA Tempula Asera lim thing chu Kidron vadungah a lak thlak a, an raw a, an rawt dip vong a, a diphai chu vantlang thlanmuolah an the dar a.
7. Tempula nuhmeiin Asera ta dinga puon an khawngna, a nuhmei a pasala inzor ruol um khawmna inhai chu a thiekpek bok a.
8. Judai ram Geba le Beersheba inkar khaw hrang hranga thiempuhai po po chu a thuoi khawm a, rimtui an inhlanna hmun sanga bawlhmun po po chu a suksiet vong a. Khawpui lutna kotsuo voi tienga khawpui optu Josua-in kotkhar a bawl bula sakel huoi an biekna hmun sanghai po po chu a sukchim vong bok a.
9. Chuong hmun sanga thiempuhai chun Jerusalema LALPA maichamah rong bawl ve thei naw hai sienkhom, thiempuhai lai chol thang lo bei an fak ve hlak a nih.
10. Molek kuoma meia inthawinaa an naupa le naunu hai an inhlan ta nawna dingin Ben Hinom ruoma an inthawina hmun Tofet chu a suksiet a.
11. Juda lalhaiin nisa kuoma inhlan ding sakor an pekhai chu LALPA Tempul lutnaa kotkhar bula lal in vengtu Nathanmelek pindana inthoka hla lo teah a son hmang a, an nisa pathien an keina tawlailirhai chu a raw bok a.
12. Chun, Ahaz insawng chung zawla Juda lalhai maicham siemhai le Manase-in LALPA Tempul inhuonna sung kot zawl hmun hnia maicham a siemhai chu lal chun a sukchim a, a vuok nawi vong a, a nawihai chu Kidron vadungah a pei a.
13. Chun, Jerusalem sak tienga Sietna Muol sim tienga Sidonhai pathiennu tirdakum Astoret ta ding dam, Moab-hai pathien tirdakum Kemos ta ding dam, Amon-hai pathien tirdakum Molek ta ding dama Israel lal Solomon-in hmun sang a siemhai po po chu a sukchim a.
14. Josia chun an lungphunhai chu a vuok koi vong a, Asera lim thinghai chu a phur thluk a, chuong bawlhmunhai po poa chun mihriem ru a sie a.
15. Israelhai thil suol inthawtirtu Nebat naupa Jeroboamin Bethela maicham le hmun sang a siemhai chen chun a sukchim a, a raw a, a rawt nawi vong a, Asera lim thinghai khom chu a raw a.
16. Chun, Josia chu a hang ngha vel a, tlanga thlanhai chu a hmu a, thlana ruhai chu a va'n laktir a, chuong ang thu chu Pathien miin a lo hril lawk ang ngeiin, maichama chun ruhai chu a raw a, a suksiet a.
17. Lal chun, "Saw saw tu lungphun am a na?" tin a'n don a. A khaw mihai chun, "Pathien mi, Judai rama inthoka hung, Bethela maicham chunga i thaw tah hi a hung tlung ding thu lo hril lawktu a nih" an ta.
18. Lal chun, "Sawng son um raw se. Tu khomin a ruhai la son naw raw se" a ta. Chuongchun, a ruhai chu Samaria inthoka zawlnei hung ruhai le chun ieng khom an thaw ve nawh.
19. Bethela a thaw ang chiein Israel lalhaiin LALPA suklungsena an bawl Samaria ram khuo po poa hmun sanghai le an bawlhmun po po chu Josia chun a thiek vong a.
20. Chun, hmun sanga thiempuhai po po chu maicham chungah a that a, mihriem ruhai chu a raw a, Jerusalem tieng a kir nawk ta a.
21. Lal chun mi po po kuomah, "Hi thuthlung bua chuong ang hin LALPA in Pathien ta dingin Fekan Kut hmang ro" tiin thu a pek a.
22. Israelhai chunga roreltuhaiin ro an rela inthok le Israel lalhai le Juda lalhai inlal sungin chuong ang chun Fekan Kut an la hmang ropui ngai nawh.
23. Lal Josia inlala inthoka kum sawm le parietnaa chun Fekan Kut chu Jerusalemah LALPA ta dingin an nei nawk ta chauh a nih.
24. LALPA tempula thiempu Hilkia hmu suok lekhabua dan thuin a phut ang takin Josia chun rau ko thiem le dawi thiemhai le in tina an pathien limhai, milemhai le thil tirdakum po po chu Judai ram le Jerusalema inthokin a sukbo vong a.
25. Mosie dan anga lungril po po, thlarau po po le hratna po poa LALPA rong Josia anga bawltu hi a hma khomin a hnung khomin lal an um ngai nawh.
26. Chuong sa khom chun Manase-in LALPA a lo suklungsenna po po leiin Judahai chunga a lungsenna chu a la re chuong nawh.
27. Chuongchun, LALPAN, "Israel ka son bo ang bokin Judahai khom hi ka hmu phak loah la son bo veng ka tih, hi khuo, ka thlang Jerusalem ngei el, 'Chutaka chun ka hming chu um a tih' ka ti le Tempul ngei khom hi hnawl ka tih" a la ti zing a nih.
28. Josia inlal sunga thil tlung danghai le a thilthaw po po chu Juda lalhai inlal lai chanchin inziekna lekhabuah a chuong.
29. Josia inlal lai hin Aigupta lal Faraw Neko chu Asuria lal thangpui dingin Eufretis vadung chen a hang fe a. Lal Josia chun lo bei dingin a'n thok suok a, Neko leh an inbei a, Josia chu Megido-ah a lo that a.
30. Josia siehlawhai chun a ruong chu Megido-a inthokin Jerusalem tieng tawlailirin an phur tung a, ama thlana chun an phum a. A ram mipuihai chun Josia naupa Jehoahaz chu an thuoi a, hriek an nal a, a pa lalna chu a hung hluo ta a.
31. Lal a hung ni chun Jehoahaz chu kum sawmhni le kum thum mi a na, Jerusalemah thla thum a'n lal a, a nu hming chu Hamutal, Libnaa inthoka hung, Jeremia naunu a nih.
32. A puhai ang bokin LALPA mithmuah thil suol a thaw a.
33. Jerusalema inthoka a'n lal thei nawna dingin Faraw Neko chun Hamat ram Ribla-ah khaidietin a thlung a, a ram chu tangkaruo kilogram sangthum le zali le rangkachak kilogram sawmthum le pali a'n chawitir a.
34. Faraw Neko chun Josia naupa Eliakim chu a pa Josia aiin a'n laltir a, a hming chu Jehoiakim tiin a thlakpek a. Jehoahaz ruok chu Aigupta ramah a thuoi a, chu taka chun a thi ta a.
35. Jehoiakim chun Faraw Neko tuk zat tangkaruo le rangkachak a pek a, chu chu a pek theina dingin a ram mihaia inthok chun an neinung dan zirin sie an chawitir a, tangkaruo le rangkachak an chawi zat ding a tuk a.
36. Jehoiakim an lal chun kum sawmhni le kum nga mi a na, Jerusalemah kum sawm le kum khat a'n lal a, a nu hming chu Zebida a na, Ruma khaw mi Pedaia naunu a nih.
37. Chun, a pi le puhai thaw dan angin, LALPA mithmuah thil suol a thaw hlak a.

  2Kings (23/25)