←  2Kings (22/25)  →
1. Lal a hung ni chun Josia chu kum riet mi a ni a, Jerusalemah kum sawmthum le kum khat ro a rel a. A nu hming chu Jedida a na, Bozkat khaw mi, Adaia naunu a nih.
2. LALPA mithmuah thil tha a thaw a, a pu Davida lampui po po a hraw a, voi tieng amanih chang tieng amanih a petsan nawh.
3. Josia inlala inthoka kum sawm le parietnaah Mesulam naupa Azalia naupa Safan, lekha ziektu chu lalin LALPA Tempula chun a tir a.
4. "Thiempu laltak Hilkia kuomah hang fe la, mihaiin LALPA Tempula tangka an hung chawi, kotkhar vengtuin a lo lak khawmhai chu lo tiem fel dingin hang hril rawh.
5. Tangka chu LALPA Tempul ripera thoktuhai inrawitu kuomah inhlan hai sien,
6. LALPA Tempul ripertu karpentar hai, in bawltu mistiri hai le lung sertuhai hlaw bakah Tempul bawlnaa hmang ding thing le lung ser sa inchawkna dingin hmang raw hai se.
7. Tangka an pek suok chu indik taka an hmang hlak leiin an hmang dan en zui dinga an inchik khom ngai chuong lem naw nih" a ta.
8. Chun, thiempu laltak Hilkia chun lekha ziektu Safan kuomah, "LALPA Tempulah Dan Bu ka hmu suok tlat el!" a ta. Dan bu chu Safan a pek a, a tiem a.
9. Lekha ziektu Safan chun lal kuomah, "I mihai chun Tempula tangka um po chu an lak suok a, LALPA Tempul bawltuhai le inrawituhai kuomah an pek tah" a ta.
10. Chun, lekha ziektu Safan bok chun, "Thiempu Hilkia-in lekhabu a mi lo pek annawm" tiin lal chu a hril a, lal hmaa chun a hang tiem a.
11. Lalin Dan lekhabu thuhai a hang hriet chun a lal puon a pot thler a.
12. Thiempu Hilkia hai, Safan naupa Ahikam hai, Mikaia naupa Akbor hai, lekha ziektu Safan le lal enkoltu Asaia hai kuoma chun thu a pek a:
13. "Fe unla, hi lekhabu hmu suoka um sunga thu chuong, keima le mipui le Judahai po po inchuk dinghai chu LALPA mi va rawnpek ro. Hi lekhabu thuhai hi ei pi le puhai khan an lo zawm naw leiin ei chunga LALPA lungsenna chu a'n ling ta hle a nih; eini chungthua zieka umhai angin an lo khawsa si naw a" a ta.
14. Chuongchun, thiempu Hilkia hai, Ahikam hai, Akbor hai, Safan hai le Asaia hai chu lal silfen enkoltu Harhas naupa Tikva naupa Salum nuhmei, zawlnei Hulda, Jerusalem veng thara um kuoma chun an fe a, an va biek a.
15. Ama chun an kuomah, "LALPA, Israel Pathien chun hieng hin a tih, 'Ka kuoma hung tirtu cheu chu hieng hin hril ro:
16. LALPAN hieng hin a tih: 'Ngai ta u, lalin a tiem lekhabua inziek dan ang tak khan, hi hmun le a sunga chenghai chunga hin sietna ka hung intlungtir ding a nih.
17. Mi nghatsan a, pathien danghai kuomah rimtui inhlan a, an kut ngeia an siem milemhai chun ka lungsenna an cho suok leiin, ka lungsenna chu hi hmun laka hin chok a ta, mit el thei naw nih' tiin.
18. LALPA indon dinga hung tirtu cheu Juda lal kuoma chun hieng hin hril ro: 'I thu hriet chungchang thua LALPA, Israelhai Pathien hril chu hi hi a nih:
19. Hi hmun le a sunga chenghai hi tongsephur le sukdara an um ding thu i lo hrietin i lungril i suknem a, LALPA hmaah i'n ngaitlawm a, i puonhai pot thler a, ka hmaah i tap leiin, keikhomin i thu chu ka lo ngaithlak a nih, LALPAN a tih.
20. Chuleiin, i thlatuhai kuomah thuoi ka ti che a, thlamuong taka vui liemin um i ta, hi hmuna sietna ka hung intlungtir dinghai po po chu i mitin hmu ve naw ti nih' tiin" a ta. Chuongchun, chu thu chu lal kuomah an hung hawn a.
←  2Kings (22/25)  →