←  2Kings (21/25)  →
1. Lal a hung ni chun Manase chu kum sawm le pahni mi chauh a la ni a, Jerusalemah kum sawmnga le kum nga ro a rel a. A nu hming chu Hefziba a nih.
2. Israelhai hmaa LALPAN hnam a hnot suokhai thil ching tirdakum takhai chu thaw vein LALPA mithmuah thil tha lo takhai a thaw hlak a.
3. A pa Hezekia-in a thiek ta hnung hmun sanga an bawlhmunhai chu a'n din thar nawk a; Israel lal Ahab thaw dan angin Baal ta dingin maicham a siem a, pathiennu Asera lim thing a siem a, vana ni le thla le arasihai a biek a, an rong a bawl a.
4. LALPAN, "Jerusalemah ka hming inumtir ka tih" a tina hmuna chun maicham hrang hrang a siem a.
5. LALPA tempul inhuonna sung tuol zawl pahnia chun vana um po po ta dingin maicham a siem a.
6. A naupa ngei chu meia inthawinaah inhlanin, dawithiem a hmang a, aisan thiemhai a ruoi a, rau ko thiem le be thiemhai a rawn hlak a. Chuong ang chun thil suol tak el thawin LALPA suklungsen dingin a cho phawk hlak a.
7. LALPAN Davida le Solomon kuoma, "Hi Tempul le Israel hnamhai hmun po po laia ka thlang suok Jerusalema hin kumkhuoin ka hming inumtir ka ta,
8. ka thupek po po le ka siehlaw Mosie-in Dan a pekhai po po kha an zawm phot chun, an pi le puhai ka pek tah rama inthok hin Israelhai ke chu inpen suoktir ta naw ning" a lo ti ta sa hmuna ngei chun Asera lim thing kerhai chu a sie a.
9. Mipuihai chun LALPA thu an zawm naw a, Manase chun a thuoi hmang tawl a, Israelhai hmaa LALPAN a hnot suok hnamhai nek hmana nasain thil tha lo an thaw a.
10. Chun, LALPAN a siehlaw zawlneihai hmangin thu a hril a:
11. "Juda lal Manase hin hieng thil suol tirdakum tak hi a thaw a. A hmaa Amor mihai nek hmanin thil suol a thaw nasa lem a, milem bieknaah Judahai a thuoi lut a.
12. Chuleiin, LALPA, Israelhai Pathien chun hieng hin a tih: 'Ngai ta u, a hre taphot na khawk rum rum khopin Jerusalem le Judai ram chungah sietna ka hung intlungtir ding a nih.
13. Samaria ka hremna ang le Israel lal Ahab le a sungkuohai chunga ka thaw ang charin Jerusalem chunga khom thaw veng ka ta, miin thleng a hruk faia a'n khup angin, Jerusalem chu hrut fai ka ta, inkhup ka tih.
14. Ka rochana ka la hla sunhai khom zamsan ka ta, an hmelmahai kutah pe suok ka tih.
15. Aiguptaa inthoka an pi le puhai ka thuoi suoka inthokin voisun ni chen hin ka mithmuah thil suol an thaw a, ka lung suksen dinga an mi cho phawk leiin an hmelmahai po poin rok an ta, suom an tih' tiin" a ta.
16. Chu bakah, Manase chun thil suol tak tak thawin, Judahai chu milem a'n biektir el chauh khom ni loin, poi tawk lo mi a that rawn em em a, Jerusalem khaw dung le le vaiah an thisen a luong nguoi nguoi a nih.
17. Manase inlal laia thil tlung danghai, a thilthawhai le a suol thawhai chu Juda lalhai inlal lai chanchin inziekna lekhabuah a chuong.
18. Manase chu a thlatuhai kuomah a chawl a, a lal ina huon, Uza huona chun an phum a, a naupa Amon chun a lalna chu a hung hluo ta a.
19. Lal a hung ni chun Amon chu kum sawmhni le kum hni mi a nih; Jerusalemah kum hnih a'n lal a, a nu hming chu Mesulemet a na, Jotba khuoa Haruz naunu a nih.
20. A pa Manase ang bokin LALPA mithmuah thil suol a thaw a.
21. A pa lampui hraw po po a hraw ve a, milemhai bein an rong a bawl a.
22. LALPA, a thlatuhai Pathien chu a maksan a, LALPA lampui hrim a hraw nawh.
23. A thoktuhaiin Amon chu an phier ruk a, lal inah an that a.
24. Chu zoah mipuiin lal Amon phiertu po chu an that vong a, a naupa Josia chu ama hmunah lalah an sie a.
25. Amon inlal sunga thil tlung danghai le a thilthawhai po po chu Juda lalhai inlal lai chanchin inziekna lekhabuah a chuong.
26. Ama thlan Uza huona chun an phum a, a naupa Josia chun a lalna chu a hung hluo ta a.
←  2Kings (21/25)  →