←  2Kings (2/25)  →

---

1.

LALPAN thawngaleivira van tieng Elija a lak tawm chun Elija le Elisa chu Gilgal panin an fe a.

2.

Elija chun Elisa kuomah, "Hi taka hin lo um rawh, LALPAN Bethelah a mi tir a nih" a ta. Elisa ruok chun, "LALPA hringna le i hringna salin ka hril hi, um hmangsan nawng ka ti che" a ta. Chuongchun, Bethelah an zu fe tlang a.

3.

Bethela zawlnei ruol chu Elisa kuomah an hung a, "Voisun hin i pu hi LALPAN a lak ding a nih ti i hriet am?" an ta. Elisa chun, "Hre e, sienkhom hril puok naw ro" a ta.

4.

Chun, Elija chun, "Elisa, hi taka hin lo um rawh, LALPAN Jeriko khuoah a mi tir a nih" a ta. Elisa ruok chun, "LALPA hringna le i hringna salin ka hril hi, um hmangsan nawng ka ti che" a ta. Chuongchun, Jerikoa chun an zu fe tlang a.

5.

Jerikoa zawlnei ruol chu Elisa kuomah an hung a, "Voisun hin i pu hi LALPAN a lak ding a nih ti i hriet am?" an ta. Elisa chun, "Hre e, sienkhom hril puok naw ro" a ta.

6.

Chun, Elija chun Elisa kuomah, "Hi taka hin lo um la, LALPAN Jordan vadungah a mi tir a nih" a ta. Elisa ruok chun, "LALPA hringna le i hringna salin ka hril hi, um hmangsan nawng ka ti che" a ta. Chuongchun, an pahni chun Jordan panin kein an fe tlang a.

7.

Jordan kama Elija le Elisa ngirna ep taka chun hla deu hlekah zawlnei ruol sawmnga an ngir ve a.

8.

Elija chun a silpuon chu a hlip a, a ziel tom a, tui chu a vuok a, khing tieng khing tieng a hung inthe a, an pahni chun hnuoi charah an fe kai a.

9.

An kai hnung chun Elija chun Elisa kuomah, "I kuoma inthoka lak hmanga ka um hma hin ieng am thawpek lang che i nuom a? a ta. Elisa chun, "I thlarau chang let hni hi chang ka nuom" a ta.

10.

Elija chun, "Thil khir tak i hni a, amiruokchu lak hmanga ka um lai i mi hmu chun chang i ta, i mi hmu naw chun chang naw ti nih" a ta.

11.

Chuonga titi pum zinga an fe lai chun mei tawlailir le mei sakor an hung inlang thut a, an inkarah tlain a hung sukthe a, Elija chu thawngaleivirin vanah a kai a.

12.

Chu chu Elisa chun a hmu zing a, "Pa, pa, aw Israelhai santu ropui, i fe an ta maw?" tiin a ko zui a. Elisa chun ama chu a hmu ta si nawh. Chu phing leh a silpuon chu a pot thler a.

13.

Elija silpuon hung tla chu a lak a, a kir a, Jordan vadung kama chun a ngir a.

14.

Elija silpuon hung tla chun tui chu a vuok a, "LALPA, Elija Pathien kha khaw lai am a um ta a?" a ta. Tui a zuk vuok chun khing tieng khing tieng a hung inthe a, Elisa chu a kai ta a.

15.

Jerikoa inthoka hung zawlnei hon, lo thlir zingtuhai chun, "Elija thlarau chu Elisa chungah a cheng ta ngei leh!" an ta. Ama chu be dingin an va hnai a, hnuoi sikin chibai an buk a.

16.

Anni chun a kuomah, "I siehlawhai hin pa ngal hrat tak tak mi sawmnga kan nei a, i pu zong dingin tir tawl raw khai. LALPA thlarauin thuoi a ta, khaw lai tlang amanih ruom amaniah a'n thum nawk el khom a ni thei a nih" an ta. Elisa chun, "Tir lo e, tir der naw ro" a ta.

17.

Amiruokchu, hang sel pei inzakum khopa an nor lui tlat leiin "Tir el ro" a ta. Chuongchun, mi sawmnga an tir a, ni thum an zong a, an hmu zo naw a.

18.

Jeriko tieng Elisa kuomah an hung kir chun, "Fe naw ro ka ti reng cheu an naw maw?" a ti a.

19.

Chu khuoa mihai chun Elisa kuomah, "En ta, pu, i hmu ang hin hi khuo hi a lawilen inhoi hle sienkhom kan tui tlan hi a tha naw a, thlai khom a suok tha thei naw a nih" an ta.

20.

Ama chun, "Tuium thar hung la unla, chi thun ro" a ta, chuongchun an hung lak a.

21.

Tuikhurah a va fe a, chi a phul a, mihai kuoma chun, "LALPA chun hieng hin a tih: 'Tui hi ka sukthieng tah. Tuta inthok chu a thipui um ta naw ni hai a, a ram tharsuok khom hlawk tang a tih' a ti a nih" a ta.

22.

Elisa hril ang chun, voisun chen hin a tui chu a hrisel ta zing a nih.

23.

Chu taka inthok chun Elisa chu Bethelah a fe a. Lampuia a thang lai chun khuoa inthokin tleirawl ruol an hung suok a, "Fe tung rawh, lukawkpa, Fe tung rawh, lukawkpa" tiin an lo nuisaw a.

24.

A ngha kir a, anni chu a hmu a, LALPA hmingin tongsie a'n phur a. Chu phing leh ram hnuoia inthokin savom pahni an hung suok a, anni laia naupang sawmli le pahni chu an hung pot chen neng a.

25.

Chun, Karmel tlangah a fe a, chu taka inthok chun Samaria khuoah a kir nawk ta a.

---

←  2Kings (2/25)  →