←  2Kings (19/25)  →
1. Hezekian chu chu a lo hrietin a silfenhai a pot thler a, saiip a'n bel a, LALPA tempulah a lut a.
2. Lal in enkoltu lu Eliakim le lekha ziektu Sebna le thiempu upahai chu saiip inbelin Amoz naupa zawlnei Isai kuomah a tir a.
3. Anni chun a kuomah, "Hezekia-in hieng hin a tih: 'Voisun hi beidongna ni, invauna ni le hmaimawkna ni a na; naute pieng a hun ta sia a hring suokna dingin a nuin tha sang ding a nei ta si naw ang hi kan nih.
4. A pu Asuria lalin Pathien hring hrilsie dinga a tir Rabsake thu hrilhai po po chu LALPA i Pathien chun hre ngei a ta, a thu hriethai lei chun ama chu LALPAN la hal ve rawi nawnim. Chuleiin, hlaa la um sunhai ta dingin tongtaipek rawh' tiin" a ta.
5. Hezekia mi tirhai chun Isai kuom an hung tlung a.
6. Isai chun an kuomah, "In pu chu hieng ang hin hril ro: 'LALPA chun hieng hin a tih: I thu hriet, Asuria lal hnuoia thoktuhai mi hrilsietna chu ti der naw rawh.
7. Ngai ta, a sunga chun thlarau sieng ka ta, thuthang a hriet charin a ram tieng kir nawk a ta, chu taka chun kawlhnamin inthattir ka tih, a tih' tiin" a ta.
8. Rabsake chun Asuria lalin Lakis a suoksan ti a hrietin an hnuk kir a, Libna khuo a lo bei lai chu a va hmu a.
9. Chuong lai bok chun Aigupta lal Kushc mi Tirhaka chu ama run dingin a hung ti Asuria lal Senakerib chun thu a dong leiin Hezekia kuomah mi a tir a,
10. "Hieng ang hin Juda lal Hezekia kuoma chun hril ro: 'I ring Pathien chun 'Jerusalem hi Asuria lal kutah pek ni naw nih' tiin hlem naw raw se che.
11. Asuria lalhaiin ram po po sukse vonga an chunga kut an thlak dan khom i hriet chieng kha.
12. An leh, nang hi san him ni bik dinga inngai i ni? Ka pi le puhaiin Gozan hai, Haran hai, Rezef hai le Tel Assar-a um Eden mihai an sukbohmang lai khan in hnam pathienhai chun an san suok a ni?
13. Hamat lal hai, Arpad lal hai, Sefarvaim khaw lal hai, Hena lal hai le Iva lal hai kha tu hin khaw lai am an um zo ta a?' tiin" thu a'n phurtir a.
14. Chu lekha a hmu chun Hezekian a hang tiem a, LALPA Tempulah a tlan lut a, LALPA hmaah lekha chu a phar a.
15. LALPA kuoma chun, "Aw LALPA, Israelhai Pathien, cherubhai inkara lalthungphaa inthung, nang chauh hi hi hnuoia lalram po po chunga Pathien i nih. Hnuoi le van hi nangma siem a nih.
16. Aw LALPA, i na lo dawin mi ngaithla hram rawh; aw LALPA, i mit mengin mi hung en ta; Senakerib-in Pathien hring a hrilsietna thu hi lo ngaithla hram rawh.
17. "A nih, aw LALPA, Senakeribin hnam le ramhai a sukram nasatzie hi thudik a nih.
18. An pathienhai chu meiah a pei a, a suksiet a, chuonghai chu pathien an ni naw hrim a, mihriem kuta siem thing le lung mei mei an nih.
19. Chuleiin aw LALPA kan Pathien, nangma chauh hi LALPA Pathien i nizie hnuoia lalram po po hin an hriet theina dingin, a kuta inthokin mi hung san suok ngei rawh" tiin a tongtai a.
20. Chun, Amoz naupa Isai chun Hezekia kuomah, "LALPA, Israel Pathien chun hieng hin a tih: 'Asuria le Senakerib chungthua i tongtaina kha ka lo hriet.
21. A chungchang thua LALPA kalna thu chu hi hi a nih:" 'Zion nunghak thienglam chun,Hmusitin a nuizat che,Jerusalem naunu chun,I tlan siet lai a hmuin,A lu a thin khum che a nih.
22. Tu lak am i rawl suksang a,Vauna le hrilsietna sak suok a,Mit i hang meng sang vel chu?Israel Mi Thienghlim chungah.
23. I mi tirhai chu hmangin,LALPA chu i vau khawng a,'Ka tawlailir tam tak leh,Tlang sangah ka hung kai a,Lebanon tlang sip ka chuon a,An sidar thing insang takhai,An far thing tha thahai le chun,Ka nuom nuomin ka phur a,An ram ril le ngaw thatna,Lut nawna hrim ka nei nawh.
24. Ram dangah tuikhur choin,An ram tuihai ka tlan a;Aigupta vadungte po po,Kein ka pal kangpek vong'Tiin i hril hlak a ni kha.
25. " 'Tiena tlanga inthokaKeiman ka lo ruot ta sa,Ka ruohmang ta sa lei a,Thil hung tlung a nizie hai,Khaw kula lungremhai khom,I sukchim hner hnurzie hai,I hriet fuk naw a ni maw?
26. Tha nei lo mipuihai chu,Chi-aiin an muolpho a,Phula hlo hna ang an na,Hna zik dawng ang an ni a,In chunga hlo a hung mawng,A'n thang lien hmaa nisa'n,A em vuoi ang hi an nih.
27. " 'I chengna hmun ka hriet a,I fe le hung ka hriet vong,Ka chunga i lungsen khom.
28. Ka chungah lung suksen a,Tong uong i mi thaw khum chu,Ka na'n a lo hriet leiin,I hnar le i baua chun,Ka thir bar inbuk ka ta,I hungna lama bok chun,In kirtir nawk ka ti che'tiin" a ta.
29. Chun, Isai chun Hezekia kuomah,"I ta ding chun hienghai hi,Inchikna ding ning a tih:Tu kum bu tuolto ring in ta,Kum nawk ring bok in tih.Kum thumnaah bu tuin,A ra khom sik tang in ta,Grep huonhai siem unla,A ra suokhai chu tlan ro.
30. Hlaa la um Juda sungkuo chun,Hnuoi tieng zung hung kei an ta,A ler tieng ra insuong an tih.
31. Jerusalema inthokin,Hlaa umhai hung suok an ta,Zion tlanga inthokin,A dam sunhai hung suok an tih.Iengkim LALPA thahnemngaina zarin,Chuong ang chun hlen suok a tih.
32. "Chuleiin, Assuria lal chungthua chun LALPAN hieng ang hin a hril:'Hi khawpui hi lut naw ni a,Thal khomin kap bok naw nih.Phaw leh hung inlang naw ni a,Inhuolna ding hlan daw naw nih.
33. A hungna lamah kir nawk a ta,Hi khawpui hi lut naw nih,Ti hi LALPA thu suok a nih.
34. Keima zar le ka siehlaw Davida zarin,Hi khawpui hi huol him ka tih'tiin" a ta.
35. Chu zan chun LALPA vantirko chu a'n thok suok a, Asuria-hai riebuka chun mi nuoi khat le singriet le sangnga a sukhlum a. Zing tieng an hang tho chun mithi ruong ngot an lo ni el ta a.
36. Chuongchun Asuria lal Senakerib chun an riebuk chu a suoksan a, Ninevi khuoah a um a.
37. Chun, tempula an pathien Nisrok a biek laiin a nauhai pahnih, Adramalek le Sarezer chun kawlhnamin an hung sat hlum a, Ararat ramah an tlan lut a, a naupa Esarhadon chun a lalna chu a hung hluo ta a.
←  2Kings (19/25)  →