←  2Kings (18/25)  →
1. Israel lal, Ela naupa Hosea inlala inthoka kum thumnaa chun Ahaz naupa Hezekia chu Juda lalin a hung inthung a.
2. Lal a hung ni chun kum sawmhni panga mi a na, Jerusalemah kum sawmhni le kum kuo a'n lal a. A nu hming chu Abija a na, Zekaria naunu a nih.
3. A pu Davida thilthaw dan anga thaw vein, LALPA mithmuah thil tha a thaw hlak a.
4. Hmun sanga an bawlhmunhai chu a pei hmang a, an lungphunhai chu a vuok nawi a, Asera lem thinghai chu a phur a. Chuong lai hun chen chun Mosie dar rul siem Nehustan an tia chun Israelhaiin rimtui an la raw hlak leiin a vuok nawi vong a.
5. Hezekia chun LALPA, Israelhai Pathienah ringna a'n nghat a. Juda lalhai lai ama ang hrim a hma khomin, a hnung khomin an um ta nawh.
6. Nghet takin LALPA a chel tlat a, a zui zing a, LALPAN Mosie kuoma thu a pekhai chu a zawm tlat bok a.
7. LALPA chun a umpui zing a, a thilthaw tinrengah a hlawtling a. Assuria lal lakah a hel a, a thu a awi zing nuom ta nawh.
8. Ral veng buk le kul nei khuo Filistinhai ram chin po po chu Gaza chenin a hne vong a.
9. Lal Hezekia inlala inthoka kum lina, Israel lal Ela naupa Hosea inlala inthoka kum sarinaa chun Asuria lal Salmaneser chun Samaria khawpui chu a hung bei a, a'n huol a.
10. Kum thum an inhuol hnungin Asuria-hai chun an lak a. Samaria an lak kum hi Israel lal Hosea inlala inthoka kum kuona a nih.
11. Asuria lal chun Israel mihai chu salah a thuoi a, Hala rama dam, Gozan rama Habor vadung phaia dam le Medes-hai khuoa dam a'n umtir a.
12. LALPA an Pathien thu zawm loa a thuthlung, a siehlaw Mosie hmanga LALPAN thu a pek po pohai chu an bawsiet leiin hieng thil hi an chungah a hung tlung a nih. LALPA thupekhai chu an ngaithlak nuom naw a, an thaw nuom bok nawh.
13. Hezekia inlala inthoka kum sawm le palinaa chun Asuria lal Senakerib chun Judai rama khuo, kula inhuonhai chu a hung bei a, a lak a.
14. Juda lal Hezekia chun Lakis khuoa Asuria lal kuomah, "Ka lo suksuol a nih. Inhnuk kir la, ka laka i thil ngiet po po chu peng ka ti che" tiin thu a thon a. Asuria lal chun Juda lal Hezekia chu tangkaruo kilogram singkhat le rangkachak kilogram sangkhat chawi dingin a tuk a.
15. Hezekia chun LALPA Tempul le lal ina ro siekhawmnaa an nei po po chu a pek a.
16. Hi tum hin Juda lal Hezekia chun LALPA Tempul kotkhar le kotkhar bieng tuomna rangkachakhai chen khom a khok fai vong a, Assuria lal a pek a nih.
17. Asuria lal chun a sipai hotu lien tak tak pathum Tartan hai, Rabsari hai le Rabsakeb hai chu sipai tam tak leh Lakis-a inthokin Jerusalema lal Hezekia bei dingin a tir a. Jerusalem an tlung chun an tui lakna kor chuonchunga tui kul, Puonsawptuhai Hmun panna lampuia chun an chawl a.
18. Chu taka inthok chun lal chu an hang ko a, lal in enkoltu lu tak Hilkia naupa Eliakim hai, lekha ziektu Sebna hai, chanchin ziektu Asaf naupa Joa hai chu an hung suok a.
19. Rabsake chun an kuomah, "Lal Hezekia kuomah hieng hin hril ro: 'Lal ropui tak Asuria lal chun hieng hin a tih: I ringsan, i'n nghatna hi ieng am a na?
20. Indonaa dingin remruot thiem le sipai hrat tak tak kan nei dam i ti a, sienkhom kawk boa inpawt mei mei ang a nih. A tu am ringsanin ka lakah i hel ngam hrim hrim a na?
21. Tu hin ngai rawh, luong hmol por tah, kut chu at thi thei, innghai chun mi sukhliem thei Aigupta ang mei mei chauh hi ka'n hnempui dam i ti maw! Aigupta lal Faraw inhnempuituhai chan chu chuong ang char chu ni vong a tih.
22. Tu hin, 'Kan ringsan chu LALPA kan Pathien a nih' i ti dam a ni chun, Judahai le Jerusalem mihai kuoma Hezekia'n, 'Jerusalema maicham hmaa chauh hin in biek ding a nih' a ti leia hmun sanga a bawlhmun le maichamhai po po a dehawnpekpa kha a ni naw maw?
23. "Chuongchun, ka pu Asuria lal kuomah hung la, indawrpui rawh: a chunga chuong ding mi i hmu indai phot chun sakor sanghnih khom peng ka ti che.
24. Aigupta mihai tawlailir le sakor chung chuonghai i ringsan ringota chu ka pu mihai laia hotu chin tak khom hi i dang kir zo ding am a ni?
25. Chu bakah, LALPA thu thang loin hi hmun hi bei le hne dinga hung am ka ni? LALPA ngei chun hi ram hi hang beia sukse dingin a mi hril a nih' tiin" a ta.
26. Hilkia naupa Eliakim le Sebna le Joa chun Rabsake kuomah, "Lunginsiet takin Aramik tongin mi hrilpek rawh, i siehlawhai hin kan hriet thei tho si a; kul chunga umhai hrieta chu Hebrai tong chun mi be ta naw hram rawh" an ta.
27. Rabsake chun, "Ka pu chun in pu kuoma le nangni kuoma chauh hieng thu hi hril dingin a mi tir am a ni? Kul chunga thunghai, nangni le anni mani ek faa mani zun la dawn dinghai kuoma khom a mi tir naw am a ni?" a ta.
28. Chuongchun, Rabsake chu a ngir a, Hebrai tongin inring takin a khek a, "Lal ropui tak Asuria lal thu hi lo ngaithla ro.
29. Lal chun hieng hin a tih: 'Hezekia hlem bawlin um naw ro, ama chun ka kuta inthokin a san suok thei naw cheu.
30. Hezekia chun, 'LALPAN mi san suok ngei a ta, hi khawpui hi Asuria lal kutah pek ni naw nih' tiin LALPA chu ring dingin thu hne naw raw se cheu.
31. Hezekia thu ngai naw ro. Asuria lal chun hieng hin a tih: Mi'n rempui unla, ka kuomah hung inpe ro. Chuongchun, mi tinin mani huona grep le theichang fain, mani tuibel ngeia tui chu dawn zing thei in tih.
32. Chu chu nangni ram ang boka ram hnienghnar, bu le uoiin thar tamna ram, bei le grep tamna ram, oliv le khuoizu tamna rama ka thuoi hma cheua in khawsak dan ding chu a nih. Thi nekin hring thlang lem ro. Hezekian, 'LALPAN mi san him a tih' tia a thlem cheu khomin a thu la naw ro.
33. Tu hnam pathienin am hi ram hi Asuria lal kuta inthokin a san suok ti in hriet ta hlak a?
34. Hamat le Arpad hai pathien kha khaw lai am an um zo ta a? Sefarvaim hai, Hena hai le Ivva hai pathienhai khom kha khaw lai am an um zo ta a? Samaria chu ka kuta inthokin an san him am a ni?
35. A tu ram pathienin am hi ram hi ka kuta inthokin an san suok thei ta hlak a? LALPA chun ka kuta inthokin Jerusalem khuo hi a san suok telul ding maw?' tiin" a ta.
36. Lal Hezekiain, "Anni chu don der naw ro" tia thu a pek angin mihai chun ieng khom an hril nawh.
37. Chuongchun, Hilkia naupa Eliakim, lal in enkoltu lu tak le lekha ziektu Sebna le chanchin ziektu Asaf naupa Joa hai chu Hezekia kuomah an fe a, an puonhai an pot thler a, Rabsake thu hrilhai chu an hril sawng a.
←  2Kings (18/25)  →