←  2Kings (15/25)  →
1. Israel lal Jeroboam pahnina inlala inthoka kum sawmhni le pasarinaa chun Juda lal Amazia naupa Azaria chu lalin a hung inthung a.
2. A hung inlal chun kum sawm le kum ruk mi a na, Jerusalemah kum sawmnga le kum hni ro a rel a. A nu chu Jerusalem mi, a hming chu Jekoli a nih.
3. A pa Amazia ang bokin LALPA mithmuah thil indik a thaw a.
4. Amiruokchu, hmun sanga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlan zing tho.
5. LALPAN lal Azaria chu a thi chenin phar hriin a hrem a, in hranah a um a, a naupa Jotham chun a aiin lal in chu a enkol a, a ram mihai chu ro a relpek a.
6. Azaria inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong.
7. Azaria chu a thlahai kuomah a chawl a, Davida khawpuia chun an phum a, a naupa Jotham chun a lalna chu a hung hluo ta a.
8. Juda lal Azaria inlala inthoka kum sawmthum le parietnaa chun Jeroboam pahnina naupa Zekaria chu Samaria-ah Israel lalin a hung inthung a, thla ruk a'n lal a.
9. A pa ang bokin LALPA mithmuah thil suol a thaw a. Israelhai thil suol inthawtirtu Nebat naupa Jeroboam lampui hraw chu an kiengsan nawh.
10. Jabesh naupa Salum chun Zekaria chu a phier ruk a, mipui hmaah a bei a, a that a, a hmunah lalin a hung um a.
11. Zekaria inlal sunga thil tlung danghai chu Israel lalhai inlal lai chanchin inziekna lekhabuah a chuong.
12. Chuongchun Jehu kuoma LALPAN, "I thlahai chu suon lina chenin Israel lalthungphaah inthung an tih" tia a lo hril chu a hung tlung kim tah a nih.
13. Juda lal Uzia inlala inthoka kum sawmthum le pakuonaa chun Jabesh naupa Salum chu Israel lalah a hung inthung a, Samaria-a inthokin thla khat a'n lal a.
14. Chun, Gadi naupa Menahem chu Tirza khuoa inthokin Samaria-ah a fe a, Salum chu a that a, a hmunah lalin a hung um ta a.
15. Salum inlal sunga thil tlung danghai le a thil phier rukhai chanchin chu Israel lalhai inlal lai chanchin inziekna lekhabuah a chuong.
16. Chuong lai chun Menahem chu Tirzaa inthokin a suok a, Tipsa khuoin kot an lo hongpek nuom naw leiin a khuo le a se vel po po chu a bei a, a suksiet vong a, nuhmei inrai lai phing chenin a phir thler vong a.
17. Juda lal Azaria inlala inthoka kum sawmthum le pakuonaa chun Gadi naupa Menahem chu Israel lalah a hung inthung a, Samaria khuoah kum sawm ro a rel a.
18. LALPA mithmuah thil suol a thaw a, Israelhai thil suol inthawtirtu Nebat naupa Jeroboam lampui hraw chu a'n lal sung po poin a petsan nawh.
19. Assuria lal Pul, Tiglat-Pilesar an ti bok chun ram chu a hung run a, Menahem chun a rama ama lalna a suknghet theina dinga thangpuitu dingin tangkaruo kilogram singthum le sangli pein a lo tlon a.
20. Tangka a pek chu Menahemin Israel rama mi hausa pakhat peiah tangka shekel sawmnga seng phut luia a'n thawtir a nih. Chuongchun, Asuria lal chu a ramah sawt um loin a kir nawk ta a.
21. Menahem inlal sunga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong.
22. Menahem chu a thlatuhai kuomah a chawl a, a naupa Pekahia chun a lalna chu a hung hluo ta a.
23. Juda lal Azaria inlala inthoka kum sawmnganaa chun Menahem naupa Pekahia chu Israel lalah a hung inthung a, Samari khuoa inthokin kum hni ro a rel a.
24. Pekahia chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a'n kiengsan ngai nawh.
25. A sipai hotuhai laia pakhat, Remalia naupa Peka chun ama chu a phier ruk a, Gilead mi sawmnga thuoiin Samaria-a lal in kul sungah Pekahia chu Argob le Arie hai leh a that a, Peka chu lalin a hung um ta a.
26. Pekahia inlal laia thil tlung dang le a thilthawhai po po chu Israel lalhai inlal lai chanchin inziekna lekhabuah a chuong.
27. Juda lal Azaria inlala inthoka kum sawmnga le pahninaa chun Remalia naupa Peka chu Samaria-ah Israel lalin a hung inthung a, kum sawmhni ro a rel a.
28. Ama chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a'n kiengsan ngai nawh.
29. Israel lal Peka inlal lai chun Assuria lal Tiglat-Pilesar chun Ijon hai, Abel Beth Maaka hai, Janoa hai, Kedes hai le Hazor khuohai po po dam, Gilead le Galili biel le Naftalia ram chenin a lak vong a, a ram mihai chu Assuria ramah salin a thuoi a.
30. Juda lal Uzia naupa Jotham inlal kum sawmhninaa chun Ela naupa Hose chun Remalia naupa Peka chu a phier ruk a, a bei a, a that a, a lalna chu a hung hluo ta a.
31. Peka inlal sunga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong.
32. Israel lal Remalia naupa Peka inlala inthoka kum hninaa chun Uzia naupa Jotham chu Juda lalah a hung inthung a.
33. A hung inlal chun kum sawmhni le panga mi a na, Jerusalemah kum sawm le kum ruk a'n lal a. A nu hming chu Jerusa a na, Zadok naunu a nih.
34. A pa Uzia ang bokin LALPA mithmuah thil tha a thaw a.
35. Amiruokchu, hmun sanga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlan zing tho. Jotham chun LALPA Tempul lutna korkhar sakhnung lem chu a siem tha a.
36. Jotham inlal laia thil tlung danghai le a thilthawhai po po chu Juda lalhai inlal laia an chanchin inziekna lekhabuah a chuong.
37. Chuong lai hun chun Aram lal Rezin le Remalia naupa Peka chu Judahai bei dingin LALPAN a tir tan ta a.
38. Chun, Jotham chu a thlatuhai lai a chawl a, a pi le puhai lai Davida khawpuia chun an phum a, a naupa Ahaz chun a lalna chu a hung hluo ta a.
←  2Kings (15/25)  →