←  2Kings (14/25)  →
1. Israel lal Jehoahaz naupa Jehoash inlala inthoka kum hninaa chun Joash naupa Amazia chu Juda lalah a hung inthung a.
2. Lal a ni chun kum sawmhni le panga mi a nih. Jerusalemah kum sawmhni le pakuo lalin a thung a, a nu hming chu Jehoaddin a na, Jerusalem khaw mi a nih.
3. Pathien mithmuah thil tha a thaw a, a pu Davida ruok chu a tluk zo nawh. Iengkimah a pa Joash thaw dan a zui a.
4. Amiruokchu, hmun sanga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlan zing tho.
5. A ram chu a suknghet phing leh a pa thattuhai chu a that ve thung a.
6. Amiruokchu, Mosie Dan bua "Nauhai leiin pahai chu sukhlum ding a ni naw a, pahai leiin nauhai sukhlum ding a ni bok nawh, mi tin mani suol leiin an thi ding a nih" tia LALPA thupek ang dungzuiin, chuong tuolthattuhai nauhai ruok chu a that ve nawh.
7. Ama hin Chi Ruomah Edomhai mi singkhat a that a, an khawpui Sela a lak a, Joktheel tiin a thlak a, chu hming chu tu chen hin a la put zing.
8. Amazia chun Israel lal Jehu naupa Jehoahaz naupa Jehoash kuomah a mi a tir a, "Hung la, pa le pa chu inhmasonin inbei ei tih" tiin chona thu a thon a.
9. Israel lal Jehoash ruok chun Juda lal Amazia kuomah, "Lebanon tlanga hlingin Lebanon tlanga sidar thing kuomah, 'I naunu kha ka naupa nuhmeiah inneitir raw khai' tiin thu a'n cha a. Chun, ram sa huoi hi a hung a, hling chu a hung chil thluk a.
10. Nang hin Edom i zu hne lei sekin i lungril a chapo a ni hi tie! Hnena i chang kha suongin lungawi takin inah intom tok tok rawh. Nangma chopa Juda ram sietna ding ieng leia buoina chok suok i tum tal tal am a na?" tiin a lo don a.
11. Amiruokchu, Amazia chun a lo bengkhon nuom naw leiin Israel lal Jehoash chu a hang fe a, Juda lal Amazia le chun Juda ram Bet Semes-ah hmai intuoin an inbei a.
12. Juda lal chu Israel lal lakah a tlawm a, mi tin chu mani in tieng an tlan kir ta vong a.
13. Israel lal Jehoash chun Juda lal Ahazia naupa Joash naupa Amazia chu Bet Semes-a chun a man a, Jerusalemah a kai tung a, Jerusalem kul chu Efraim Kotkhara inthoka a kil chen, meter zahni vela sei chu, a sukchim a.
14. Chun, LALPA Tempul le lal ina ro an siekhawmnaa mi rangkachak le tangka le bur le bel um taphot chu a lak vong a, hren tang ding mi iemani zat a manhai leh an khawpui Samaria tieng a kir nawk ta a.
15. Jehoash inlal sunga thil tlung danghai le a thilthawhai le a hlen suokhai, Juda lal Amazia le an indo chanchinhai chu Israel lalhai inlal lai chanchin inziekna lekhabuah a chuong.
16. Jehoash chu a thlatuhai kuomah a chawl a, Samaria khawpuia chun Israel lalhai lai an phum a. A lalna chu a naupa Jeroboam pahnina chun a hung hluo ta a.
17. Juda lal Joash naupa Amazia chu Israel lal Jehoahaz naupa Jehoash thi hnungin kum sawm le kum nga a la dam a.
18. Amazia inlal laia thil tlung danghai chu Juda lalhai inlal lai chanchin inziekna lekhabuah a chuong.
19. Jerusalemah ama chu an phier ruk a, Lakis-ah a tlan a, sienkhom a hmelmahai chun an hnot zui a, chu taka chun an that a.
20. A ruong chu sakorin an hung phur a, a thlatuhai lai Davida khawpuiah an phum a.
21. Judai ram mihai chun Amazia naupa Azaria, kum sawm le kum ruk mi chu, an thuoi a, lalah an siem a.
22. A thlatuhai kuoma Amazia a chawl hnungin Azaria chun Elath khuo chu Judai ramah a lak lut nawk a, a siem tha a.
23. Juda lal Joash naupa Amazia inlala inthoka kum sawm le panganaa chun Israel lal Jehoash naupa Jeroboam pahnina chu Samaria-ah Israel lalin a hung inthung a, kum sawmli le pakhat ro a rel a.
24. LALPA mithmuah thil suol tinreng a thaw a, Israelhai thil suol inthawtirtu Nebat naupa Jeroboam suolna po po chu inkiengsan hrim a nei nawh.
25. LALPA, Israelhai Pathienin a siehlaw, Gath Hefer mi, Amitai naupa zawlnei Jona hmanga a lo hril tah angin, Hamath kawna inthoka Tuipui Thi chen chu Israel ramah a hui lut nawk a.
26. Israel mi tu khom, bawi khom bawi naw khomin rinumna nasa tak an tuor chu LALPAN a hmu a, thangpuitu tukhom an um si nawh.
27. LALPA chun Israel hming chu van hnuoiah nuoi bo der a tum naw leiin, sansuoktu dingin Jehoash naupa Jeroboam pahnina kut a hung hmang a nih.
28. Jeroboam pahnina inlal sunga thil tlung danghai, a thilthawhai, a ral bei thuhai, Israel ta lo ni ta hlak, Hamat kawna inthoka Damaska chen Israel rama a hui lut nawk chanchinhai chu Israel lalhai inlal lai chanchin inziekna lekhabuah a chuong.
29. Jeroboam pahnina chu a thlatuhai kuomah a chawl a, a lalna chu a naupa Zekaria-in a hung hluo ta a.
←  2Kings (14/25)  →