←  2Kings (12/25)  →
1. Israel lal Jehu inlala inthoka kum sarinaah Juda lal Joash chu a hung inlal tan a, Jerusalemah kum sawmli a'n lal a, a nu hming chu Zibia a na, Beersheba khaw mi a nih.
2. Thiempu Jehoiada inchuktirna hnuoia a um sung po chun LALPA mithmuah Joash chun thil indik a thaw hlak a.
3. Hmun sanghai ruok chu a la sukbo chuong naw a, mihai inthawiin rimtui an la raw zing a.
4. Joash chun thiempuhai kuomah, "LALPA Tempula mi thil hung chawi le inhlan-thutiem hlenna dam, intiemnaa thang phak chin chawi dinga bituk dam, mani lung puok dan ang peia pek-hai po po chu la khawm vong ro.
5. Thiempu tinin rong an bawlpekhai thil hung chawi lo lak khawm chu an mawphurna seng ni sien la, chuong an lak khawmhai chu hmangin Tempul sietna lai po hi siem tha raw hai se" a ta.
6. Amiruokchu, Joash chu kum sawmhni le kum thum a'n lal hnung khomin thiempuhai chun Tempul siem that sin chu an la thaw naw zing a.
7. Chuleiin, Joash chun thiempu Jehoiada le thiempu danghai chu a ko khawm a, an kuomah, "Ieng leia tempul riper sin hi in la thaw naw zing am a na? Tempul siemnaa hmang dingin tuta inthoka tangka in lak khawm taphot chu hung inhlan pei ta ro" a ta.
8. Thiempuhai chun mihaia inthoka tangka khon ta lo ding le anniin tempul riper sin khom la ta lo dingin an remti a.
9. Chuongchun thiempu Jehoiada chun thingrem bawm a hung lak a, a sin chu an ver pop a, LALPA Tempul lutna chang tieng, maicham bula chun an inthut a, LALPA Tempula tangka an hung chawi po po chu kotkhar vengtu thiempu chun thingrem sungah a lo thlak pei a.
10. Bawma chun tangka a tam ti an hriet pha leh lal lekha ziektu le thiempu laltak chu an fe a, an tiem a, ipah an thun a.
11. Hmang zat ding an sukfel hnung chun tangka chu Tempul bawlhai inrawitua ruothai kuomah an pek suok a,
12. anni chun LALPA Tempul bawla thoktuhai, mistirihai, lung sertuhai le cho suoktuhai hlawah dam, LALPA Tempul sietna lai siemna ding thing le lung ser sa inchawkna ding dam le Tempul siemna dinga an mamaw taphot inchawkna damin an hmang a.
13. LALPA Tempula sum hung luthai chu LALPA Tempula thleng dam, khawnvar phita chepna dam, maihun dam, tawtawrawt dam, rangkachak amanih tangkaruo bur le belhai dam siemnaah hmang ta loin,
14. Tempul siemtuhai hlawah an hmang lem ta a.
15. Ringum tak le indik taka an thaw hlak leiin an sum hmangnahai chu en fel zui dinga zieka inchik ngai ieng khom a um nawh.
16. Bawsiet inthawina thilhlan le suol inthawinaa thilhlan tangkahai ruok chu thiempu chan a ni leiin LALPA Tempulah an hung chawi lut ve nawh.
17. Hieng hun lai vel hin Aram lal Hazael chun Gath khuo a hang bei a, a lak a, chu zoah Jerusalem bei dingin fe pei a tum a.
18. Amiruokchu, Joash chun Juda lal a pu Jehosafat hai, Jehoram hai le Ahazia hai le ama ngeiin a lo inhlan tah thil ser po po chu LALPA tempula mi le lal ina ro siekhawmnaa mi rangkachak um po po chu a lak suok vong a, Aram lal Hazael chu a thon a, chuongchun Jerusalem chu run ta loin a'n hnuk kir tah a nih.
19. Joash inlal sunga thil tlung dang po po le a thilthawhai chanchin chu Juda lalhai inlal lai chanchin inziekna lekhabuah a chuong.
20. A mihaiin an phierruk a, Sila pan sukna, Jerusalem sak tienga hnuoi an vur ruol chunga in an bawlna hmuna chun an that a.
21. Thoktu a thattuhai chu Simeat naupa Jozakar le Somer naupa Jehozabad an nih. Chuongchun a thi a, a thlatuhai lai Davida khawpuia chun an phum a, a naupa Amazia chun a lalna chu a hung hluo ta a.
←  2Kings (12/25)  →