←  2Kings (10/25)  →
1. Samaria khuoah Ahab naupahai sawmsari an um a. Jehu chun lekha a ziek a, Samaria khawpuia upahai, hotuhai le Ahab nauhai lo enkol tleituhai kuomah a thon seng a.
2. , A lekhaa chun, "In pu naupahai enkoltu niin, tawlailirhai le sakorhai neiin, kula inhuon khuoah chengin, ralthuom koltu in ni bok a.
3. Hi lekha hi in hmu charin in pu naupahai laia fel tak le tlak tak dinga in ngai chu a pa lalthungphaah inthungtir unla, in pu ta ding chun dopui ro" tiin.
4. Nisienlakhom, anni chu an ti ta em em a, "Lal pahni hmana an ngam naw chu einin iengtin am ei ngam lul ding a na?" an ta.
5. Chuongchun, lal in enkoltu, khawpui optu, upahai le naupanghai enkol tleituhai chun, "I siehlawhai kan ni a, thaw dinga i mi hril taphot chu thaw pei kan tih. Tu khom lalah siem nawng kan tih. Nangin tha i ti ang angin thaw lem rawh" ti thu chu Jehu kuoma hril dingin mi an tir a.
6. Chu phing leh Jehu chun lekha a thon nawk a, "Keima tienga thang in ni a, ka thu in zawm takzet ding a ni chun, in pu naupa in kolhai seng lu hung la un la, zingah hieng tik huna hin ka kuomah Jezreel-ah hung ro" tiin. Lal naupa sawmsarihai chu khawpuia mi lien ruol, anni enkol tleituhai kuoma um an nih.
7. Lekha an hmu chun lal nauhai chu an man a, sawmsari chu an that a, an luhai chu bawmrangah an sie a, Jezreelah Jehu kuomah an thon a.
8. Zuolko a hung tlung chun Jehu kuomah, "Lal naupahai lu chu an hung lak tah" tiin a hril a. Ama chun, "Kul kotkhar bulah hmun hniah intieng khawm unla, zingkar chen um raw se" a ta.
9. A tuk zingkar chun Jehu chu a va suok a, mipui hmaa chun a ngir a, an kuomah, "Poi intawk nawh. Kei ruok chun ka pu ka phierruk a, ka that a. An leh, hienghai po po hi tu that am ni tang an ta?
10. Ahab sungkuo chungthua LALPA thu hrim hrim mal khat khom inkhel a um nawh ti tu hin hre ta ro. A siehlaw Elija hmanga LALPAN thu a hril kha a hung intlungtir tah a ni hi" a ta.
11. Jehu chun Jezreel khuoa Ahab sungkuo la um po po, ama hnuoia lu tak nina chelhai, a ruol thahai le a thiempuhai po po chu a that ram a, tu khom hla hrim a nei nawh.
12. Chun, Jehu chu a'n thok suok a, Samaria tieng a fe a.
13. Lampuia berampuhai beram hmul vawna Beth Eked a va tlung chun Juda lal Ahazia unauhai laia a then a hmu a. Ama chun, "Tuhai am in na?" a ta, anni chun, "Ahazia unauhai kan nih. Lal nauhai le lalnu Jezebel zu chibai dinga hung kan nih" an ta.
14. Jehu chun, "A hringin man tawl ro" a ta, a hringin an man a, beram hmul vawnaa tuikhur bul khura chun an that a, an rengin sawmli le pahni an na, pakhat khom damin an hla nawh.
15. Chu taka inthoka a suok chun ama hmuok dinga hung Rekab naupa Jehonadab chu a'n tuokpui a. Jehu chun chibai a buk a, a kuomah, "I chunga lungril indik ka put ang hin ka chungah i put ve am?" a ta, Jehonadab chun, "Put ve e" a ta. Jehu chun, "Chuong an leh i kut kha mi hang pe ta" a ta, a hang pek a, tawlailira chun a kei kai a.
16. Jehu chun, "Ka kuomah hung la, LALPA ta dinga thahnem ka ngaizie hung hmu ve hrim hrim rawh" a ta. Chuongchun, a tawlailira chun an chuongtir a.
17. Samaria a tlung chun Ahab sungkuohai Samariaa la um sunhai chu a that vong a; Elija hmanga LALPA thu ang ngeiin a sukchimit tawl tah a nih.
18. Jehu chun mipui po po chu a ko khawm a, an kuomah, "Ahab khan Baal rong hi a bawl met chauh a na, Jehu hin chu uor takin a bawl ding a nih.
19. Chuleiin, Baal zawlneihai po po, a betuhai po po le an thiempuhai po po ka kuoma hin hung ko khawm ro. Baal ta dingin inthawina ropui ka'n hlan ding a ni leiin tu khom a kim naw um naw raw hai se. A hung naw an um chun damin suok naw ni hai" a ta. Jehu chun Baal betuhai chu sukhlum tuma dawhaa a thaw tawl a nih.
20. Jehu chun, "Baal hmingin kutpui siem ro" a ta, chu chu nasa takin an hril thang a.
21. Israel ram po poah an hril dar a, Baal betuhai po po chu an hung a, a thang naw hrim hrim an um nawh. Baal tempula chun an lut a, kotkhara inthokin a chawr tieng chen an inthung sip hmur a.
22. Jehu chun tempula silfen enkoltuhai kuomah, "Baal rongbawltu po po bat ding puon hung lapek ro" a ta, an hung lak a.
23. Jehu chu Rekab naupa Jehonadab leh Baal tempula chun a lut a. Jehu chun Baal betuhai kuomah, "Hi taka hin Baal betu ni lo, LALPA betu lo um ve pal rawi an tih, zong unla, en fel ro" a ta.
24. Chuongchun, inthawina le pumraw thilhlan inhlan dingin an lut a. Jehu chun puo tieng mi sawmriet a lo sie ruk ta hrim a. An kuomah, "Hieng in kuta ka pek cheu hi tu khom in insuo vai chun, a'n suotu chun a'n suo aiin a hringna chan a tih" a ta.
25. Pumraw thilhlan an inhlan zoin Jehu chun vengtu sipaihai le an hotuhai kuomah, "Va lut unla, va that ro; tu khom insuo der naw ro" a ta, kawlhnamin an sat hlum ta vong a. Vengtu sipaihai le an hotuhai chun an ruong chu an deng suok a, chu zoah Baal tempul sungrila chun an lut a.
26. A sungrila Baal lim thingtum an phun chu an hung lak suok a, an raw a.
27. Baal lim lung an phunhai chu an vuok nawi vong a, Baal tempul chu an sukchim a, tu chen hin mihaiin inhnawmna hmunah an la hmang zing a nih.
28. Chuong ang chun Jehu-in Israel rama inthokin Baal biekna chu a sukbo a nih.
29. Sienkhom, Jehu chun Nebat naupa Jeroboam suolna, Bethel le Dan khuoa rangkachak bawngte lem biek chu a ban chuong naw a, chu thil lei chun Israelhai chu thilsuol an thawtir zing tho.
30. LALPA chun Jehu kuomah, "Ka mit tlung taka thil i thaw lei le ka dit dan anga Ahab sunghai chunga i thaw leiin i naupahai chu suon lina chenin Israel lalthungphaah inthung an tih" a ta.
31. Amiruokchu, Jehu chun LALPA, Israelhai Pathien dan chu a lungril po poin a zawm naw a, Jeroboamin Israelhai thil suol a'n thawtir anga inthawtir chu a bansan chuong nawh.
32. Chuong lai chun LALPAN Israel ram chu a sukchin tan ta a.
33. Aram lal Hazael chun Israel ram Jordan vadung sak tieng po po, sim tieng Arnon vadunga Aroer khuo chenin a hne vong a, chu chun Gilead le Basan biel, Gad hnam, Reuben hnam le Manase hnamhai chengna a huom vong a nih.
34. Jehu inlal laia thil tlung danghai le a thilthaw le a hlen suokhai chu Israel lalhai inlal lai chanchin inziekna lekhabuah a chuong.
35. Jehu chu a thlatuhai kuomah a chawl a, Samaria-ah an phum a, a naupa Jehoahaz chun a lalna chu a hung hluo a.
36. Samaria-a inthoka Israelhai chunga Jehu inlal sung chu kum sawmhni le kum riet a nih.
←  2Kings (10/25)  →