2Kings (1/25)  →

---

1.

Ahab thi hnungin Israelhai chungah Moab mihai an hel a.

2.

Ahazia chu Samaria-a a pindan chunghnung tukver zawngdaikal awnga chun a tla a, a'n tet sil leiin mi a tir a, "Fe unla, ka natna hi ka dam suokpui ding le ding naw Ekron khuoa an pathien Baal-Zebub va rawn ro" tiin thu a'n cha a.

3.

Nisienlakhom, LALPA vantirkoin Tisbe mi Elija kuomah, "Tho la, Samari khaw lal mi tirhai lo be dingin hang fe la, an kuomah, 'Israel rama hin Pathien a um ta naw leia Ekron khaw pathien Baal-Zebub rawn dinga fe in ni?

4.

Hi lei hin LALPAN hi hi a ti a nih: i khuma inthok khan tho kang ta loin thi ngei ngei i tih' tiin hril rawh" a ta.

5.

A mi tirhai an hung kir chun lalin, "Ieng tiziea in hung kir nawk am a na?" a ta.

6.

Anni chun, "Mi pakhat mi be dingin a hung a, kan kuomah, "Fe nawk ta unla, lal kuoma chun LALPAN hieng hin a tih: Israel rama hin Pathien a um ta naw leia Ekron khaw pathien Baal-Zebub rawn dinga fe in ni? Hi lei hin LALPAN, 'I khuma inthok khan tho kang ta loin thi ngei ngei i tih' a ti a nih" an ta.

7.

Lal chun, "Nangni be dinga hung, chuong ang thu hriltu cheu chu mi ieng ang am a na?" a ta.

8.

Anni chun, "Sahmulin a'n thuom a, savun kawngchun a chun bok" an ta. Lal chun, "Tisbe mi, Elija a ni chu" a ta.

9.

Chuongchun, lal chun Elija kuomah a sipai kapten chu mi sawmnga thuoiin a tir a. Tlang sipa inthung Elija kuoma chun kapten chu a hang fe a, "Nang Pathien mi, lalin hung thla nghal raw se a ti che a nih" a ta.

10.

Elija chun, "Pathien mi ka ni takzet chun vana inthokin mei hung tla sienla, nang le i rawihai sawmnga le khan kang hlum vong raw se cheu" a ta. Chuongchun, vana inthokin mei a hung tla a, kapten le a rawihai sawmnga chu a kang hlum ta vong a.

11.

Lal chun kapten dang, mi sawmnga bok thuoi chu a tir nawk a. Kapten chun Elija kuomah, "Nang Pathien mi, lalin hung thla nghal raw se' a ti che a nih" a ta.

12.

Elija chun, "Pathien mi ka ni takzet chun vana inthokin mei hung tla sienla, nang le i rawihai sawmnga kha kang hlum vong raw se cheu" a ta. Chuongchun, vana inthokin Pathien mei a hung tla a, kapten le a rawihai sawmnga chu a kang hlum ta vong a.

13.

Lal chun a voi thumnaah sipai kapten dang, mi sawmnga bok thuoiin a tir nawk a. Kapten chu a hang fe a, Elija hmaa chun dingthathuonin, "Pathien mi, lunginsiet takin ka hringna le hieng i siehlaw mi sawmngahai hringna hi mi hlutpek hram rawh.

14.

En ta, vana inthoka mei hung tla chun ka hmaa kapten pahnihai le an rawihai a kang hlum zo vong a ni kha. Tu ruok hin chu ka hringna hi mi hlutpek hram rawh" a ta.

15.

LALPA vantirko chun Elija kuomah, "Ama ruol hin fe thla rawh, ti der naw rawh" a ta. Chuongchun, Elija chu a tho a, ama ruol chun lal kuomah a zu fe a.

16.

Lal kuoma chun, "LALPAN hi hi a ti a nih: Israel rama hin rawn ding Pathien a um ta naw leia Ekron khaw pathien Baal-Zebub rawn dinga mi i tir a ni? Hi lei hin LALPAN, 'I khuma inthok khan tho kang ta loin thi ngei ngei i tih' a ti a nih" a ta.

17.

Chuongchun, Elija hril Pathien thu ang chun a thi ta a. Ahazia chun naupa a nei naw leiin a unaupa Joram chu ama hmunah, Juda lal Jehosafat naupa Jehoram inlal kum hninaa chun a hung inlal ta a.

18.

Ahazia inlal laia thil tlunghai le a thilthawhai chu Israel lalhai inlal lai chanchin inziekna lekhabuah a chuong a ni naw am a ni?

---

2Kings (1/25)  →