←  2Corinthians (8/13)  →
1. Unauhai, Makedonia rama kohranhai lungrila Pathienin lunginsietna a'n neitir dan hi kan hril nuom cheu a nih.
2. Rinumna nasa taka fie an ni zing pum khomin an lawmna a luong liem a, rethei mong tol ni siin an tik a tlai em em a.
3. Anni lungril puok suok ngatin, nei thinglung khawngin an pek a, an tlin baka tam daih an pek ti khom ka hrietpui.
4. Mi thienghlimhai somdawlna ding rongbawlnaa hin thang ve an hni rak a.
5. Kan lo beisei phak lo zawng daiin, anni ngei chu Lalpa kuomah an inhlan phot a, chu hnungah Pathien dit dan angin kan kuomah an hung inpek a.
6. Chuongchun, nangni laia somdawlna thilpek lak khawmna, kha hmaa in lo tan tah kha hung thaw zopui nghal dingin Tita kan ngen a.
7. Ringnaa dam, thuhrila dam, hrietnaa dam, thahnemngai tulna tinrenga dam le in mi hmangainaa dam mi in khum hlak ang khan, somdawlna thilpeka khom hin mi khum ngei dingin thahnem ngai ro.
8. Hieng hi thupek anga ka hung hril a ni nawh, in hmangaina chu a tak ngei a nizie fiena dinga thilpek tienga mi danghai thahnemngaizie thu ka hung hril a nih.
9. Ei Lalpa Isu Krista lunginsietna hauzie chu in hriet a; a retheina leia in hung hausak theina dingin, hausa hle sien khom nangni leiin a hung rethei tah a ni kha.
10. Hi thua hin in ta dinga thaa ka hriet chu hi hi a nih: ni kum khan a thaw hmasa tak chauh khom ni loin a thaw nuom hmasa tak in nih.
11. A tira in inhuom ang khan, in nei dan le inphu tawk ang peia pein, tu hin thahnemngai takin hlen suok ro.
12. Miin a nei naw sa ni loin, a thil neia inthoka phal taka pek nuomna lungril neia a pek a ni chun lawm a um.
13. Nangnin mi dang rimsi takin sawk zangkhai inla kan ti a ni naw a, insawk tuo a tul thu kan hril a nih.
14. Tu hin nangnin in nei laiin an tlaksamna in phuhrukpek a, anni khomin an nei ve hunah in tlaksamna la phuhrukpek an ti cheu; chuong ang chun in insawk tuo ding annawm.
15. A rut tamtu chun a nei tam chuong naw a, a rut tlawmtu chun a tlasam bok nawh' ti ziek ang khan.
16. In ta dinga thahnem ka ngaina ang Tita lungrila sietu Pathien kuomah lawmthu um raw se.
17. Ama chun ka ngenna a pom el chauh khom ni loin, thahnem a ngaina lei lemin in kuoma hung a tum a.
18. Ama ruolin unau pakhat ka hung tir sa ve a, ama hi Chanchin Tha hril thuah kohranhai po poin an inpak hle a.
19. Chu chauh khom chu ni loin, Lalpa ropuina dinga thahnemngai taka hi somdawl rongbawlna sin kan thawnaa kan inzinpui dinga kohranhaiin an thlang suok a nih.
20. Mihaiin phal taka tam tham tak an pek khawm hi kan buoipuinaah dem kai naw hram hram kan tum a nih.
21. Lalpa hmua mawi chauh ni loin mihriem hmua mawi khom ei ngaituo bok ding a nih.
22. Chun, kan unaupa khom hi anni ruolin ka hung tir bok a nih. Ama khom hin thahnem a ngaizie kong tam takah a suklang rop tah a, tu lem hin chu a ring em cheu leiin hung a chak nawkzuol a.
23. Tita hi ka ruolpa, nangni laia rong mi bawlpuitu a na, unau danghai khom hi kohranhai palai, Krista ropuina an ni hi.
24. Kohranhaiin hmangaina in hauzie an hmu a, kan inpakna cheu hi a'n dikzie an hriet theina dingin, an chungah in hmangaina lo inlangtir ro.
←  2Corinthians (8/13)  →