←  2Corinthians (7/13)  →
1. Dittakhai, chu thutiem chu ei nei leiin ei taksa le thlarau sukporche thei taphot lakah invong thienghlimin, Pathien tina tieng thienghlim famkim ni tum ei tiu.
2. In lungrilah hmun mi'n kien ro. Tu poi khom kan tawk naw a, tu khom kan thuoi suol naw a, mani chan thatna dingin tu khom kan hmang ngai bok nawh.
3. Thiem naw inchangtir ding cheuin chu chu ka hril naw a, ka hril tah ang cheu khan kan lungrilah in um tlat a, nangni le chuh thi leh thi tlang, dam leh dam tlang kan inhuom a nih.
4. Ka ring zo em em cheu a, ka suong bok cheu a nih. Nasa takin in mi sukphur a, rinum tinreng kan tuornaah khom lawmin ka sip liem hlak.
5. Makedonia kan hung tlung khom khan kan sawl a la dam chuong nawh, sir tinah mi beiin, puo tienga inthoka mi do pawl le a sung tienga inthoka mi'n thi pawl an um bok a.
6. Sienkhom, mi chanhai-hai thlamuongtu Pathien chun Tita a hung khan a mi thlamuong tah a nih.
7. A hung tlung lei chauh khom ni loin, nangni leia a thlamuongna lei khomin a mi sukthlamuong bok a; in mi ngaizie dam, nasa taka in insirzie dam, kan ta dinga thahnem in ngaizie dam a mi hril a, chu chun a mi suklawm zuol a nih.
8. Ka lekha khan in lung a sukna ti ka lo hrietin ka'n sir hman vang a, sienkhom ka lekha khan sawt naw te chauh a sukna cheu ti ka lo hriet nawk nghal leiin ka'n sir nawk ta nawh.
9. Tu hin chu ka lawm tah, in lung ka suknat lei ni loin, poitia in sim ta leiin. Pathien ditzawnga lungngai in ni leiin keini suknat in ni nawh.
10. Pathien tienga lungngaina chun sandamna dinga simna insirum lo a'n tlungtir a; khawvel thil taka lungngaina ruok chun thina a'n tlungtir hlak.
11. Ngai ta u, Pathien ditzawnga in lungngai hin thahnem a va'n ngaitir nasa cheu de aw! In indikzie suklang nuomna hai, mi suol theidana le suol thaw inlaunahai in hung nei a; mi ngainat nachang dam, mi invoi nachang dam le mi suol hrem nuomna dam in hung nei thar ta hi! Hieng thil po poa hin in lo inkei zap ve der nawh ti nangni ngeiin in suklang chieng tah a.
12. In kuoma ka lekhathon kha thil suol thawtu amani le a thaw suolna tuortu lei amania ka ziek a ni naw a, Pathien mithmua kan ta dinga thahnem in ngaizie nangni ngeiin in hmu suok theina dinga ka hung ziek a ni lem.
13. Hi lei hin kan thla a muong tah a, chu el bakah, in renga Tita lungril in sukhar leia a lawm hmel kan hmuin kan hlim nawk zuol a nih.
14. Tita kuoma hin ka suong hle hlak cheu a, in mi sukhmaimawk naw hrim a. In kuoma thu kan lo hrilhai po po kha a'n dik ang bokin, Tita bula kan lo suongna cheu khom chu a'n dik ngeizie a hung inlang chieng tah a ni hih.
15. Chun, in renga a thu in awizie dam, ti le inthin puma in lo lawmzie dam hre zingin a ngaina nawk zuol cheu a nih.
16. Kong tinrengah ka ring ngam cheu leiin ka lawm a nih.
←  2Corinthians (7/13)  →