←  2Corinthians (6/13)  →

---

1.

Ama rong kan bawlpuihai in ni leiin, Pathien lunginsietna chu tangkaipui loa in dong nawna dingin kan ngen cheu a nih.

2.

Ama chun,'Ka lungawi hunah ka ngaithlak che a,Sandamna niah ka thangpui che'b a ti si a. Ngai ta u, tu hi Pathien lungawi hun chu a na, ngai ta u, tu hi sandamna ni chu a nih.

3.

Kan rongbawlna hi mihaiin an hril siet nawna dingin tu lampuia khom dalna kan siem ngai nawh.

4.

Siem nek hmanin, kan thaw taphotah Pathien rongbawltu kan nizie suklangin, sukdudana hai, rinumna hai le hnawchepna hai sel takin kan tuor a.

5.

Vuok kan tuor a, lung inah kan intang a, tlang chil kan tuok a, imu khom hmu loin sin kan inrim a, phingtam kan tuor a;

6.

thienghlimnaa dam, hriet thiemnaa dam, dawtheinaa dam, ngilneinaa dam, Thlarau Thienghlima dam, hmangaina tak taka dam,

7.

thudik hril konga dam, Pathien thilthawtheina hmang konga dam Pathien rongbawltuhai ni awm hrimin kan um a; voi le changah felna ralthuom kan chawi hlak.

8.

Chawimawi kan hlaw a, ngainep kan hlaw bok a; inpak kan hlaw a, dem kan kai bok a; thudik kan hril a, hlemtuah an mi ngai a;

9.

mi hriet hlaw vieu sia tu hriet hlaw loa ngai; thi vang vang, sienkhom hring bok si; vuok hrep tuok, sienkhom thi si lo;

10.

lungngaina tuok hlak, sienkhom lawm rop si; rethei hle sia mi tam tak sukhausatu le ieng khom nei loa iengkim hau bok si kan nih.

11.

Aw Korinth khuoa mihai, lungril inhong takin in kuomah thu tlang takin kan hril hi.

12.

Keini chun kan ngaina zing cheu a, nangni ruok chu keini lakah in inhong si nawh.

13.

Mani nauhai angin ka hril cheu hi, keini ang bokin lungrilah inhong ve ro.

14.

Ringnawhai leh ringkol bat hmunkhat naw ro. Felna le ritlonain iem inzawlna an nei a? Var le inthim an inkop thei am a ni?

15.

Krista le Belialc khom an inrem thei am a nih? Ringtu le ringnawtuhai khomin iem inthuhmunna an nei a?

16.

Pathien tempul le milemhai khomin iem inthuhmunna an nei? Eini ruok chu Pathien hring tempul ei ni si a. Pathienin,"Anni leh chengin intlon kan ta,An Pathien ning ka ta,Anni chu ka mihai ning an tih"da ti ang khan.

17.

Chuleiin, LALPAN hieng hin a tih:"Anni laia inthokin hung suok unla,A tumin um ro;Thil thieng lo tawk naw ro.Chuongchun, lawm ka ti cheu a,e

18.

In ta dingin Pa ning ka ta,Nangni khom ka ta dingin,Naunu le naupa ning in tih'Iengkim Lalpa chun a tih"f

---

←  2Corinthians (6/13)  →