2Corinthians (5/13)  

1. Ei chengna hnuoi in hi tiek sien khom, kuta bawl lo chatuon in hlun, Pathien buotsai chu vanah ei nei ti ei hriet.
2. Tuhin van thuom ei inbel hun ding nghakhlain ei inrum takzet a,
3. ei inbel pha chun saruokin leng ta nawng ei tih.
4. Hi taksa ina ei la cheng sung hin thawpikin ei inrum a, ei sil lai hlip thlak ei nuom lei ni loin, van thuom sil thuo vat vat ei chak lei a nih; chu pha chun thi thei hi hringnain lem zo tang a tih.
5. Chu dinga mi buotsaitu chu Pathien a ni a, thil la hung tlung ngei dinga a tiem zakhamna dingin Thlarau a mi pek a nih.
6. Chuongchun, taksa ina cheng ei la ni lei chauha Lalpa kuoma la um hri lo ei nih ti hrein ngai muong takin ei um rop hlak.
7. Hmu thei hin a mi thuoi naw a, ringnain a mi thuoi lem a nih.
8. A nih, ei ngai a muong a, hi taksa hi maksana Lalpa kuoma um chu ei thlang lem hrim a nih.
9. Chuleiin, taksa ina cheng ei la ni amanih ei ni ta naw amanih khomin ama chu suklawm ei tum tlat a nih.
10. Hi dam sunga ei thil thaw man a sie a tha hmu dingin, ei rengin Krista rorelna hmaah ei la inlang vong ding a ni si a.
11. Chuongchun, Lalpa tiumzie hrein, ti nachang hre dingin mihai hne kan tum hlak a nih. Pathienin a mi hriet fai vong a, nangni khomin in lungril tak chun in mi hriet chieng ka ring.
12. In kuomah hung inhril mawi kan tum naw a, lungril tieng ni loa puo tieng inlang dan ringot suongtuhai chu remchang taka in don let theina dingin, keinia suong ding tha chu kan hung hril cheu a ni lem.
13. Kan invet a lo ni khomin Pathien ta ding a na, kan var a ni chun nangni ta ding a nih.
14. Mi po po ta dingin mi pakhat a thi a, chuleiin mi po po khom an thi a nih ti hin a mi hne em leiin, chu Krista hmangaina chun thaw dingin a mi tur a nih.
15. A hringhai chu anni ta dinga hring ni ta loa, an ta dinga thia thonawk ta dinga hring an ni theina dingin, mi po po ta dingin a thi a nih.
16. Chuleiin, tuta inthok hin chu mihriem thlir danin tu khom kan en ta nawh. Chuong ang chun kha hma khan Krista chu lo hre hlak inlang khom, tu hin chu chuong ang chun kan ngai ta nawh.
17. Mi tu khom Kristaa um chu thilsiem thar a hung ni ta a, a mihriem hlui chu a bo a, ngai ta, mi thar a hung ni tah!
18. Hieng po po hi Pathiena inthok vong a nih; ama chun Isu Krista zarah ama leh a mi'n remtir a, inremna rongbawl sin a mi pek a.
19. Pathienin Kristaah khawvel hi ama leh a'n remtir a, an bawsietnahai chu bawsietnaah a tiem ta naw a, chu inrem nawkna thucha chu a mi'n koltir a nih.
20. Chuleiin, Krista ta dinga palai kan ni a, Pathienin keini hmanga a ngen cheu angin, "Pathien leh inrem ro" tiin Krista aiawin kan ngen cheu a nih.
21. Ama zara Pathien felna ei lo chang ve theina dingin, suol hrim hrim nei lo chu, eini leiin Pathienin suol thawinaah a siem tah a nih.

  2Corinthians (5/13)