←  2Corinthians (4/13)  →

---

1.

Chuleiin, hi rongbawlna sin hi Pathien lunginsietna zara dande kan ni leiin kan zam nawh.

2.

Zam nek hmanin thil inzapuium, a ruka an thaw hlakhai chu kan hnawl a; dawha hmanga, Pathien thu a'n dik naw zawnga hril kan ching bok nawh. Tlang takin thutak kan tar lang a, Pathien hmaah mi tin sie le tha hrietna mit tlunga um kan tum lem hlak.

3.

Chun, kan Chanchin Tha hril hi a chieng naw a ni khomin bohmang mekhai ta ding chauha chieng naw ning a tih.

4.

Krista chu Pathien angpui ngei a na, sienkhom Krista ropuina Chanchin Tha eng chu an hmu thei nawna dingin tu lai khawvel pathien chun ringnawtuhai lungril mit a sukdel si a.

5.

Keini chanchin hril loin, Isu Krista chu Lalpa a ni thu le keini hi Isu zara in siehlawhai kan ni thu kan hril lem hlak.

6.

Pathien ropuina, Isu Krista hmela hung inlang chu kan hriet chieng theina dingin, "Thimah var hung eng raw se" titu Pathien chun kan lungrilhai hi a sunvar ta si a.

7.

Nisienlakhom, hi thilthawtheina nasa tak hi keinia inthoka suok ni loin Pathiena inthoka suok a nizie a'n lang chiengna dingin chu ro chu pil belaha kan kol a nih.

8.

Sir tinah hnaw chepin kan um a, sienkhom hneng ter kan ni nawh; chanhaiin kan um a, sienkhom kan beidong nawh;

9.

suknomnatin kan um a, sienkhom maksanin kan um nawh; vuok thlukin kan um a, sienkhom sukhlum kan ni nawh.

10.

Lalpa Isua hringna chu kan taksaa hin a'n lang theina dingin Isu thina khom kan taksaa hin kan put zing a nih.

11.

Isu hringna chu ei taksa thi theia hin a'n lang theina dingin eini hring le dama la umhai khom hi Isu leia thi dinga ti ei ni rop a nih.

12.

Chuongchun, thinain keiniah sin a thaw laiin nangnia ruok chu hringnain sin a thaw thung a nih.

13.

"Ka ring a, chuleiin ka hril a nih" ti ziek ang khan, chuong ang ringna lungril chu putin keini khomin kan ring a, thu kan hril hlak a nih.

14.

Chuleiin, mithi laia inthoka Lalpa Isu keithotu chun keini khom Isu leh mi keitho veng a ta, nangnihai leh a kuomah mi'n umtir a tih ti kan hriet.

15.

Hieng po po hi in thatna ding a na; chuongchun, Pathien lunginsietna chu mi tam tak lai sukpunga a um pei ruolin, Pathien ropuina dingin lawmthu hrilna khom nasa takin luong liem a tih.

16.

Chuleiin, kan zam nawh. Puo tieng taksa hi zur tiel tiel sienkhom kan sung tieng nun ruok chu a ni telin siem tharin a um pei lem a nih.

17.

Sawt naw te sunga kan rinum tuor nep tak hin buk khi ruol lo chatuon ropuina chang dingin a mi buotsai a.

18.

Chuleiin, hmu thei thil thlir loin, hmu thei lo thil chu kan thlir lem a nih. Hmu thei thil chu bo el ding a na, hmu thei lo thil ruok chu chatuona ding a nih.

---

←  2Corinthians (4/13)  →