2Corinthians (2/13)  

1. Chuleiin, in lungril sukna ding chun in kuomah hung ta naw el lang tiin lungril ka siem a.
2. In lungril ka sukna chun, nangni ka suknathai bok naw chu mi suklawmtu ding tu dang am an um a?
3. Ka hung phaa mi suklawmtu ding haiin ka lung in suknat nawna dingin kh� lekha khah ka hung thon cheu a ni khah. Ka lawmna chu nangni khomin in mi lawmpui seng ka ring tlat a nih.
4. Mitthli tam tak sengin, lungril beidong le rinum ti pumin, in lung suknatna ding ni loin, ka hmangaina cheu inthukzie in hriet theina dingin, ka hung ziek a ni khah.
5. Lungngaina intluntu chun kei chauh a mi suklungngai naw a, iemani chenah in rengin a suklungngai cheu a nih ti inla ka uor taluo ni kher naw nih.
6. Mi tam lemin hienga ama in hrem hi a huntawk.
7. Tu hin chu lunginsietin thlamuong ta lem ro, chuong naw chun lungngaina tuor ruol loin tlakbuok hlauh rawi a tih.
8. Chuleiin, ama chu in hmangai takzetzie inlangtir dingin ka ngen cheu.
9. Kong tinrengah thu awiin fie in dawl am ti hrietna dingin lekha khah ka hung thon cheu a ni khah.
10. Tu khom in ngaidam taphot chu kei khomin ka ngaidam ve. Ngaidamna ding a um a, ka lo ngaidam tah chu nangni leia Krista mit hmua ka ngaidam a nih,
11. chuong naw chun Setanin mi tlakkhal rawi a tih, a dawha thiem dan ei inhmai si naw a.
12. Krista Chanchin Tha hril dinga Troas ka tlung khan Lalpan rongbawlna lampui a mi hongpek a.
13. Sienkhom ka unaupa Tita ka hmu naw leiin ka bei a dong hle a. Chuongchun anni chu chibai ka buk a, Makedonia ramah ka fesan tah a nih.
14. Nisienlakhom, Kristaa a hnena lampuia mi thuoi roptu le keini hmanga ama hrietna rimtui hmun tina thedartu Pathien kuoma chun lawmthu um raw se.
15. Keini hi bohmang mekhai le sandam mekhai laia Pathien ta dinga Krista rimtui chu kan nih.
16. Bohmang mekhai ta ding ruok chun thina rimsie kan na, sandam mekhai ta ding chun hringna rimtui kan nih. Chu sin chu tuin am tlin zo a ta?
17. Mi tam takin Pathien thu sumdawngnaa an hmang ang hin kan hmang ve nawh. Chu nek hmanin, Pathien mi tir angin, Pathien mit hmuah Kristaa chun titakzetin thu kan hril lem hlak.

  2Corinthians (2/13)