←  2Corinthians (13/13)    
1. Tu hi in kuoma ka hung voi thumna ding a nih. 'Thuhretu pahni amanih pathum amanih baua inthok chauhin thubuoi hrim hrim chu sukfel chauh ding a nih' ti a na.
2. In kuoma ka hung voi hninaa khan thilsuol thawtuhai le mi dang po po kuomah ka hril tah a, tu hin nangni lai um hri naw lang khom ka hril nawk cheu a nih: ka hung pha chu thilsuol thawtuhai chu hla naw ning.
3. Keima ngei mi hmangin Kristan thu a hril ti fie in tum chu la hmung in tih. Nangni lai chau taka thil thaw loin, thil nasa tak a thaw lem hlak kha.
4. Ama chu hratnawna leia hemdein a um a, sienkhom Pathien thilthawtheina leiin a hring tah a nih. Keini khom amaa chun hrat naw inlang khom, in ta dinga rong kan bawlnaah Pathien thilthawtheina leiin amaa chun kan hring a nih.
5. Ringnaah in um le um naw inen chiengin, mani ngei infie hlak ro. Krista Isu chu nangniah a um ti hrietna in nei naw am a ni? Inhrietna in la nei naw a ni chun a lem el in la nih.
6. Keini ruok chu ringnaah kan um ngei a nih ti in hung hriet chieng pei ka beisei.
7. Thil in thaw suol nawna dingin Pathien kuomah kan tongtaipek hlak cheu a, chu chu kan hlawtlingzie tar langna ding ni loin, hlawsam anga kan inlang khoma nangni bekin thil tha in thaw theina dinga kan hnipek cheu a nih.
8. Thutak do zawngin ieng khom kan thaw thei naw a, thutak ta ding chauin a nih kan thaw thei.
9. Keini kan hrat naw chang khoma nangni in hrat phot chun kan lawm. In that famkimna dingin kan hni rop hlak.
10. Sukse ding cheu ni loa siem tha ding cheuin Lalpan thuneina a mi pek a, in kuoma ka hung pha leh chu thuneina chu ka vilik rak a tul nawna dingin ka hung hmain hieng thu hi ka hung ziek a nih.
11. A tawp taka chun unauhai, dam takin um ro. Famkimna hnot unla, ka ngenna cheu hi poisa unla, lungril hmun khat put unla, inrem takin um ro; chuongchun, hmangaina le inremna Pathien chun umpui a ti cheu.
12. Fawp thienghlimin chibai inbuk ro.
13. Mi thienghlimhai po po hin chibai an buk cheu.
14. Lalpa Isu Krista lunginsietna hai, Pathien hmangaina hai, Thlarau Thienghlim pawlna hai chu in renga kuomah um raw se.
←  2Corinthians (13/13)