←  2Corinthians (12/13)  →
1. A hlawkna a um nawa chu hang uong zui pei ka tih. Ka kuoma Lalpa inlarna le a thupuong hang hril ka tih.
2. Kum sawmpali liem tah khan, Kristaa um mi pakhat ka hriet chu van thumnaah thuoi tungin a um a, a hringhranin amani ruok chu ka hriet nawh, Pathienin a hriet.
3. Chu mi ngei chu Paradis-a lak tungin a um a, a takin am an naw leh zelin a um ti khom ka hriet nawh, Pathienin a hriet.
4. Chu mi chun thil hril thei ruol lo le mihriemhai hril thieng lo a hriet.
5. Chuong ang mi chu uongpui ka tih; keimaa ruok chu uongpui ding ka hriet nawh, ka hrat nawna chauh naw chu.
6. Uong nuom khom lo ni hrim lang, thutak ka hril ding a ni leiin thil invetthlak ni naw nih. Nisienlakhom, insum ka tih, chuong naw chun miin ka thilthaw an hmu le ka hril an hriet neka nasain kei mi ngai ropui lem hlauh rawi an tih.
7. Thil inhriettira ka um chu a ropui em leia ka'n ngaihlu taluo nawna dingin ka taksaa hin hling pekin ka um a, chu chu Setan tirtawn, mi sun zingtu chu a nih.
8. Chu chu mi la hmangpek dingin voi thum Lalpa ka hni a.
9. Ama chun, "Ka lunginsietna hi i ta dingin a huntawk; ka thilthawtheina hi hrat nawnaa inthokin annawm sukfamkima a um hlak chu" a mi ti a. Chuleiin, Krista thilthawtheina chu keimaah a cheng theina dingin ka hrat nawna hi lawm takin ka uongpui ta lem a nih.
10. Krista leiin hrat nawnaa hai, cheksolnaa hai, harsatnaa hai, sukdudanaa hai le sietnaa hai ka lawm hlak. Ka hrat naw pha leh ka hrat chauh hlak a nih.
11. Ka'n vet zo an ta hi, nangnin lo thei loah in mi siem si a. Nangni hi mi hril mawitu lem ding ni awm tak in na. Ieng ni naw lang khom, 'tirko lien' intihai hi ieng konga khom ka tluk naw bik nawh.
12. Nangni lai kong iengkimah dawthei takin inchikna thilmakhai le entirna danghai thawin tirko ka nizie ka'n langtir hlak a.
13. Ieng konga khom ka sukkhawk ngai naw cheu ti ngot naw chu kohran dang neka ka ngainep lemna cheu iem a um a? Ka lo thaw dik naw a ni chun mi ngaidam ro.
14. Ngai ta u, tu hi in kuoma hung dinga ka'n siem voi thumna a ni tah. Nangni ta dinga phurrik ni ka tum naw a, in thil nei ka ngiet naw a, nangni a nih ka dit chu. Nauhaiin nu le pa ta dingin an inkhawlpek ngai naw a, nu le pahaiin nauhai ta dingin an inkhawlpek lem hlak.
15. Kei chu in thlarau ta dingin lawm takin inhmang zo ka ta, inpe zo thak ka tih. A chuongliema ka hmangai cheu leiin in mi hmangai nep sot di'm a ni?
16. In mi'n khawkpui naw chu thukhat ni ta sien, dawha vervek hmanga ka simbu dawi cheu anga lo hril thang pawl dam maw in um chu?
17. Nangni laia ka hung tirhai amani bek hmangin nangnia inthokin hlawkna ka hmu am a ni?
18. In kuoma hung dingin Tita ka ngen a, ama ruolin unau pakhat ka hung tir bok a, Tita chun hlawk phanain a hmang cheu am a ni? Thlarau hmun khat puta rongbawl le lampui thuhmun hrawa kal chawi tlang kan ni naw am a ni?
19. Kha hma po po kha mani inhril mawiah in mi lo ngai zing a ni maw? Pathien mit hmuin Kristan hril dinga a ti thu chu kan hril hlak. Dittakhai, iengkim hi nangni sukhratna dinga kan thaw a nih.
20. Ka hung pha leh ka tum angin hmu nawng ka ti cheu a, nangni khomin in tum angin mi hmu nawng in tih ti hi ka thil inlau a nih. Inhalna dam, inthikna dam, lungsen inhrawtna dam, pawla inthena dam, inhrilsietna dam, indemna dam, chapona dam le buoina dam hung hmu ka'n lau bakah,
21. ka hung nawk pha leh, tuta hmaa thil suol le tirdakum in thaw hlak inngainahai le in chet pornahaia inthoka la sim si lo mi tam tak leiin tap pal ka ta, ka Pathienin in hmaah mi sukmuolpho hlauh rawi a tih ti ka'n lau bok a nih.
←  2Corinthians (12/13)  →