←  2Corinthians (11/13)  →
1. Ka'n vet deu a ni khomin in mi dom thiem ka beisei a, chu chu in thaw ta zing hrim a nih.
2. Pasal pakhat, Krista chu ka huolpek tah cheu a, a kuoma nunghak thienglam anga ka'n hlan theina ding cheuin, Pathien thikthu a siet leiin, in lakah keikhom ka thikthu a sie a nih.
3. Rulin Evi dawhaa a zawr thluk ang khan Krista tienga in lungril thienghlim le mawi tak kha iemani tiin sukkhawhlopek an ti cheu ti ka'n lau a nih.
4. Kan hril hlak ni lo Isu dang chanchin hrila hung chu lawm a, Thlarau in lo chang tah ang kha ni lo chu pom a, in pom tah ang ni lo Chanchin Tha dang khom in lo pom el a ni chun in dol zor inhma taluo ning a tih.
5. 'Tirko lien' intihai chu ieng konga khom ka tluk tawl nawna a um ka ring nawh.
6. Thuhril thiem ve naw lang khom hrietna tienga chu ka duoi bik nawh ti in kuomah kong tinrengin, ieng huna khom suklangin a um ta hlak kha.
7. An naw leh, Pathien Chanchin Tha a thlawna hril a, nangni chawisanga in um theina dinga ka'n pha hnuoi khan thil suol ka lo thaw am a ni?
8. Nangni laia rong ka bawl theina dingin kohran dang ka pur a, anni laka inthokin thangpuina ka lak hlak kha.
9. In kuoma ka um lai khan ka tlaksamna thuah tu khom ka sukkhawk ngai naw a, ka mamawhai chu Makedonia rama inthoka hung unauhaiin an mi hung phuhrukpek a ni kha. Tu laka khom phurrik ni ka tum ngai naw a, ni tum ngai bok naw ning.
10. Krista thutak chu keimaah a um leiin, hi ka thil uongpui hi Akaia ram sungah tu khomin mi khap thei naw ni hai.
11. Ieng leiin am ie? Ka hmangai naw lei cheuin maw? Ka hmangaizie cheu chu Pathienin a hriet.
12. Ka thaw ang char thaw ve anga inhril sathauhaiin uongpui ding remchang ieng khom an nei nawna dingin, ka thaw hlak ang char hin thaw zom pei ka tih.
13. Chuong mihai chu tirko tehlem, mi hlem tuma ramtang, Krista tirko anga mani insiem fawm an nih.
14. Chu chu a mak nawh, Setan meuh khom var tirkoah a'n siem fawm hlak si a.
15. Chuleiin, Setan rongbawltuhai chu felna rongbawltu anga insiem fawm a harsa nawh, an tawpna ding ruok chu an thilthawin hril a tih.
16. Hang hril nawk pei ka tih. Tu khomin invetah mi lo ngai naw unla, in mi ngai a ni khomin invet angin mi sie unla, hang uong ve met ka tih.
17. Ka thil hril hi Lalpa mi'n hriltir a ni naw a, inring zo taka ka thil uongpui hi invet angin ka hril a nih.
18. Mi tam takin khawvel thil an uongpui hlak a, kei khomin hang uongpui veng ka tih.
19. Nangni chu in var a, mi invethai khom in daw thiem a.
20. A'n dik tak chun, bawia siemtuhai cheu dam, mani hlawkna ding le invor sangna dinga hmangruoa hmangtuhai cheu dam, hmusita uongkhumtuhai cheu le hmaia bentuhai cheu khom in daw thei pei hlak.
21. Chuong ang chu thaw ve dingin kan awm an nem taluo ti hi inzakum hle sienkhom ka pom a nih. Amiruokchu, invet takin hang hril nawk pei lang, tu khomin uongpui ngam an nei chun kei khomin ka ngam ve.
22. Hebrai mi an ni maw? Kei khom ka nih. Israel mi an ni maw? Kei khom ka nih. Abraham thlahai an ni maw? Kei khom ka nih.
23. Krista rongbawltuhai an ni maw? Invet takin hang hril lang,- kei lem hi chu ka ni nawkzuol. Ka thok inrim lem dai a, lung inah ka'n tang rawn lem a, na taka vuok ka tuok rawn lem dai a, thi el theina ngirhmun khom ka tuok zing zing a nih.
24. Judahai thaw dan angin voi sawmli vuoka voi khat pei tling loi vuok tum nga ka tuok a,
25. tum thum hmolin an mi vuok a, tum khat lungin an mi deng a, tum thum long siet ka tuok a, ni khat le zan khat tuifinrietah ka'n lang a.
26. Sienkhom inzin ka thul chuong nawh. Lampuiah tium tam tak vadunga dam, suomhmang laka dam, ka chipuihai laka dam, Jentelhai laka dam, khawpuia dam, ram hnuoia dam, tuinfinrieta dam le unau tehlemhai laka dam ka tuok rop a.
27. Imu hmu lo khopa thokin, sin inrimin ka buoi a; fak ding tlasamin phingtam le dangcharin ka um a; sil ding nei loin, saruokin khaw dei ka tuor a.
28. Hieng baka hin Kohranhai po po ka ngaituona chun a mi hnaw zing a nih.
29. Mi hrat nawhai ka tuorpui naw hlak am a ni? Suola tlu mi ka hmuin ka'n voi ngai naw hlak am a ni?
30. Uong ding ka ni rau rau chun ka hrat nawzie suklangtu thilhai hi a nih ka uongpui lem ding.
31. Ei Lalpa Isu P� le Pathien chun khel ka hril nawzie a hriet. Ama chu chatuonin inpakin um raw se.
32. Damaska khuoa ruok khan chu Lal Areta hnuoia roreltu chun mi man tumin Damaska khuo chu a'n vengtir a;
33. sienkhom kul bang tukvera inthokin bawmin an mi thlak thla a, a kuta inthokin ka suok tah a nih.
←  2Corinthians (11/13)  →