←  2Corinthians (10/13)  →
1. Kei Paula, 'hmai sana chu pa awm nem tak, ral kanga chu pa awm khauh tak' in ti ngei hin Krista thuhnuoirolna le nunnemna salin ka ngen cheu.
2. Tisa mi tak anga khawsaa mi hriltuhai lakah ka khauh ngam dingzie ka hriet si a, ka hung phaa chuong anga ka um a tul nawna dingin ka ngen cheu a nih.
3. Khawvela khawsa ni inla khom khawvel do dan angin ral kan do ve nawh.
4. Indona hriemhrei kan hmanghai hi khawvel ralthuom a ni naw a, kulpui thiek theina Pathien ralthuom thilthawthei chu a ni lem.
5. An thang hmun kan thiekpek pei a, Pathien hrietna lampui chapo taka dodaltu taphot kan tukdol a, ngaituona tinreng Krista salah kan man bok a nih.
6. Thu in awi zan pha leh a la awi nawhai chu hrem dingin kan inpei zing a nih.
7. Puo tieng inlang dan ringotin thil in thlir a. Tu khom Krista ta ni bika insie dam an um chun inngaituo non raw se; Krista ta a ni ang bokin keini khom kan ni ve.
8. . In sietna ding ni lo, nangni tungdingna dinga Lalpan thuneina a mi pek hi ka lo uongpui taluo khom a ni thei a, sienkhom ka'n zapui nawh.
9. Lekhathona nangni inthi tum angah mi ngai naw ro.
10. "A lekha thuhai chu a rikin a khauh vei leh, ama ei hmu hlak chun pa awm nem, a thuhril hlak insitum tak a ni bok si" ti tawk dam in um a.
11. Chuong anga ngaituhai chun hi hi hre raw hai se: in kuoma kan hung hmaa lekhathona ka hung hril ang tak khan ka hung pha chu thawng ka tih.
12. Mani inhril mawi hlakhai lai kan intiem sa ve ngam naw a, anni le inhrilkhi kan nuom bok nawh. Mani inkhina dinga bi an thliek fawm chun mani le mani an inkhi a, a va'n vetthlak de aw!
13. Keini chun kan biel huom sung baka mi chu uongpui naw ning ungah, Pathienin ri a mi khampek sunga mi chauh uongpui veng kan tih; chu chun nangni khom a huom sa cheu a nih.
14. Kan biel sunga mi in ni leiin Krista Chanchin Tha in kuoma kan hung intlun khan a khel tieng kan fe naw khah.
15. Kan biel puo tienga mi dang thaw inrimna kan uongpui nawh. In ringna hung inthanglien a ta, thil ropui lem nangni lai thaw la ning a ta, kan biel khom lien zuol pei a tih ti ruok chu kan beisei.
16. Chuongchun, in ram puo tieng Chanchin Tha chu la hril pei kan tih; nisienlakhom, mi thaw sa chu uongpui nawng kan tih.
17. 'A uong taphot chun Lalpa uongpui raw se'.
18. Mani inhril mawihai ni loin, Lalpan a chawimawihai chauh pom an ni hlak.
←  2Corinthians (10/13)  →