2Corinthians (1/13)  →
1. Paula, Pathien dit zawnga Krista tirko le ei unaupa Timothe chun Korinth khuoa Pathien kohran le Akaia biel pumpuia mi thienghlim po pohai chibai kan buk.
2. Pathien, ei Pa le Lalpa Isu Krista kuoma inthoka lunginsietna le inremna chu in kuomah um raw se.
3. Ei Lalpa Isu Krista Pa le Pathien, lunginsietnaa sip P�, thlamuongna petu Pathien chu inpakin um raw se.
4. Pathiena inthoka thlamuongna ei dong chu hmanga harsatna tinreng tuortuhai ei thlamuong ve theina dingin Ama chun ei harsatna po poa chun a mi thlamuong hlak.
5. Krista tuornahai chu ei nunah ei tuor rawn po leh ei thlamuongna khom Krista z�rin a pung hlak.
6. Rinum kan tuor chun in thlamuongna le in sandamna ding a na; thlamuonga kan um chun nangni thlamuongna ding bok a nih, rinum kan lo tuor tah ang chu sel tak le thlamuong taka in tuor ve theina dingin.
7. Rinum mi tuorpuitu in ni angin thlamuongna mi'n tawmpuitu ding in nih ti kan hriet leiin in chungah beiseina nghet tak kan nei.
8. Unauhai, Asia rama harsatna kan tuokhai kha in hriet naw kan nuom nawh; kh�ng ang khopa tuor zo ruol lo phur rikin mi del a, dam hrim khom kan inbeisei ta naw hiel thuhai kha.
9. Kan lungril tak chun thi ngei dingin kan inngai a. Sienkhom chu thil chu keiniah ni loin mithi keithotu Pathiena mi'n nghattirtu a lo ni tah lem hlauh a nih.
10. Chuong ang thi el theina ti-um laka inthok chun a mi san suok a; ama chun mi la san suok nawk pei a tih ti hi kan beisei innghatna a nih.
11. Tongtainan mi san unla, mi tam tak in tongtaina zarin lunginsietna dong kan ta, keini leiin mi tam takin Pathien kuomah lawmthu hril thei an tih.
12. Kan uongpui chu hi hi a nih: khawvel varna ang ni loin Pathien lunginsietna lei chauh lemin Pathiena inthoka suok nun thienghlim le tlang tak chu putin mihai lai kan khawsa hlak a, chu chu nangni lai hin a ni nawkzuol ti mi hrepuitu chu kan sie le tha hrietna hi a nih.
13. Kan lekhathona khan in tiema in hriet thiem naw ding ieng khom kan ziek naw kha.
14. Tu hin in la hriet thiem vong nawa chu, Lalpa Isu Ni-a kan uongpui ding in ni ang bokin in uongpui ding kan nizie hi a kimin in la hung hriet chieng pei ka beisei.
15. Chu chu ka ring tlat leiin hlawkna tum hni in chang theina dingin sir hmasak phot cheu ka tum a.
16. Makedonia ka fe malamin sir cheu a, Makedonia rama inthoka ka hung kir tieng sir nawk cheu ka tum a, chu taka inthok chun Judai ram tienga ka'n zin peina dinga khom in mi san ka beisei.
17. Hi hi ka remruot lai hin tum mumal nei lo ka hoi am a nih? An naw leh rem ka ruot lai hin khawvel mihai thaw dan hmangin, a chang leh "A nih, a nih" ti a, a nawkah "A ni nawh, a ni nawh" ti mei mei am ka nih?
18. Pathien chu a ringum leiin in kuoma kan thucha khom a changin "A nih" ti le a changin "A ni nawh" ti ang hi a ni nawh.
19. Kei le Silvan le Timothe haiin in kuoma a chanchin kan hril, Isu Krista, Pathien Naupa chu "A nih" le "A ni nawh" a ni kop ve si nawh; amaa chun "A nih" ti chauh a um.
20. Pathien thu tiem chu ieng zat khom ni sien, Kristaa chun "A nih" ti vong a nih. Chuleiin, Pathien ropuina dingin Isu Krista zarah "Amen" ei ti hlak a nih.
21. Keini le nangni mi siemtu, Kristaa mi suknghettu le hriek mi naltu chu Pathien a nih.
22. Ama ta ei nizie suoi nama mi'n chiktu le ei lungrila zakhamna thlarau mi petu a nih.
23. Nangni hla ding cheuin Korinth khuo ka hung sir nawk ta naw a nih ti mi hrepuitu chu Pathien a nih.
24. In ringna chungah insuklal kan tum naw a, in lawmna dinga nangni le thok tlang ei ni lem, ringnaa chun in ngir nghet si a.
      2Corinthians (1/13)  →