2Chronicles (9/36)  

1. Seba lalnuin Solomon hming inthangzie a lo hriet chun zawna khir tak taka fie dingin Jerusalemah a hang inzin a. Hnung zuitu tam tak leh, rimtui le rangkachak le lunghlu tam tak phurtu sanghawngsei ruol leh Solomon kuom a hang tlung a, a lungrila a pai po po chu phorin a titipui a.
2. A thil indon po po chu Solomonin a don vong a, hriet naw le hrilfie harsa ti hrim a nei nawh.
3. Solomon varzie dam, a lal in bawl ropuizie dam,
4. dawkana fak ding an siehai dam, a khawnbawl thung khup el hai dam, rongbawltuhai le an inchei dan hai dam, uoiin semtuhai dam le LALPA tempula pumraw thilhlan a'n hlanhai dam Seba lalnu-in a hmu chun mak a ti hiel a.
5. Lal kuoma chun, "I thilthawhai le i varziehai ka rama inthoka ka lo hriet kha a lo indik khop el.
6. Keima hunga mit ngeia ka hmu hma chun ka lo awi ngai naw a, a chenve khom an mi lo hril naw lem a ni hi tie! Varna le hausaknaah an hung hril nek daiin i lo insang lem a nih.
7. I mihai hi ieng ang lawma hamtha am an na! I bula cheng, i varna thu ngaithla roptu i siehlawhai hi an va hang hamtha ngei de aw!
8. Nangma chunga lawmtu LALPA i Pathien ta dinga roreltua a lalthungphaa sietu che chu inpakin um raw se. LALPAN kumkhuoin Israelhai tungding a nuom leiin fel tak le indik taka an roreltu dingin a sie che a ni hi" a ta.
9. Chuongchun, lal kuomah thilpek rangkachak kilogram sangli le rimtui le lunghlu tam tak a pek a. Seba lalnuin rimtui Solomon a pek ang zozaia tam chu tu khomin an pek nawk ta ngai nawh.
10. (Hiram long ruol Ofira rangkachak tam tak phura fehai chun almuk thing tam tak le lunghlu an hung phur teu bok a.
11. Lal chun almuk thinghai chu LALPA tempul kailawn le ama lal in kailawn siemnan a hmang bakah rimawi tumtuhai hmang ding tingtang le perkhuong siemnain a hmang bok a. Chuong ang zozaia tam almuk thing chu a hnungin Judai ramah an hmu ta ngai nawh.)
12. Lal Solomon chun Seba lalnu dit le hni taphot chu a thawpek bakah a lal ina rosum tam tak chu amanu hung chawi neka tam a pek bok a, chuongchun a rawihai leh ama ram tieng a kir nawk ta a.
13. Kum tina Solomon kuta rangkachak lut zat chu kilogram singhni le sangthum a nih.
14. Chu baka chun sumdawnghai le dawrkaihaiin sie an pek bakah Arabiaa lalhai le a ram optuhaia inthokin sie le leiman a hmu teu bok a.
15. Lal Solomon chun rangkachak sut phekin phaw lien zahni a siem a, phaw pakhat peiah rangkachak kilogram sari vel an hmang a.
16. Chun, rangkachak sut phek bokin phaw chin lem zathum a siem bok a, phaw pakhat peiah rangkachak kilogram hni an hmang a. Chuonghai chu a lal in 'Lebanon Ngawpui Run' a chun a sie a.
17. Chun, lal chun saiha ngotin lalthungpha ropui tak a siem a, chu chu rangkachak tuiin a'n luonkhum vong a.
18. Lalthungpha kai tungnaa chun kailawn paruk a um a, kailawn thut le inzomin rangkachak tlanga siem ke nghatsan a um a. Lalthungpha sir ve vea chun kut innghatna chelban a um a, chu sir ve vea chun sakeibaknei pahnih an ngir a.
19. Kailawn paruk sir tona chun sakeibaknei sawmpahni, sir tinah pakhat pei an ngir a, chuong ang chu khaw lai rama khom an la siem ngai nawh.
20. Lal Solomon no po po chu rangkachaka siem vong a na, Lebanon Ngawpui Runa a bur le belhai chu rangkachak hlir hlaka siem vong a nih. Solomon dam lai chun tangkaruo chu ieng thama ngai a ni naw leiin a bur le belhai chu tangkaruoa siem hrim a um nawh.
21. Lal chun tuifinrietah sumdawng long ruol a nei a, chu chu Hiram longpuhaiin an khal a, chuonghai chun kum thum dan peiah rangkachak dam, tangkaruo dam, saiha dam, zawng le ngau lien chi dam an hung phur hlak a.
22. Hausakna le varnaah Solomon chun khawvela lal dang po po a khum a.
23. Pathienin a lungrila varna thu a siepekhai chu ngaithla dingin khawvela lal po poin Solomon chu an hung pan huoi huoi hlak a.
24. Chun, kum tinin a kuoma hung taphotin thilpek tangkaruo le rangkachaka siem thil dam, silfen dam, ralthuom dam, rimtui dam, sakor dam le sabengtung dam an hung chawi hlak a.
25. Solomon chun sakor-tawlailir le sakor siena hmun sangli a nei a, indo sakor khom singkhat le sanghni a nei a, chuonghai chu tawlailir siena khuoa hai a sie a, a then Jerusalemah a kol a.
26. Solomon chu Eufretis vadunga inthoka Filistinhai ram chen le Aigupta ramri chena lalhai po po chunga lal tak a nih.
27. Lal chun Jerusalemah thil a hau em leiin tangkaruo dam chu lungte ang hiel le sidar thing khom tlang thuta theichang bil ang hiela ngai khopin a siem a nih.
28. Solomon sakorhai chu Aigupta rama inthok le hmun hrang hranga inthoka a lak a nih.
29. Solomon inlal laia thil tlung danghai chu a bula inthoka a tawp chenin zawlnei Nathan thu zieka hai, Silo mi Ahija hril lawkna thu inziekna bua hai, Nebat naupa Jeroboam chungthua zawlnei Ido-in inhriettirna a donghai inziekna bua hai a chuong.
30. Solomon chu Jerusalemah Israel mihai po po chungah kum sawmli a'n lal a.
31. A pi le puhai kuoma a chawl chun a pa Davida khuoah an phum a, a naupa Rehoboam chun a lalna chu a hung hluo ta a.

  2Chronicles (9/36)