←  2Chronicles (8/36)  →
1. LALPA tempul le ama in ding kum sawmhni sunga Solomonin a bawl zo hnung chun,
2. Hiramin khuo a pekhai chu a bawl tha a, chuong khuoa hai chun Israelhai chu hmun a'n khuortir a.
3. Chu zoah Solomon chun Hamat Zoba a bei a, a lak a.
4. Thlalera khuo Tadmor chu a bawl tha a, Hamat biela hmangruo siekhawmna khuo po po khom a'n din tha bok a.
5. Beth Heron chuonchung le Beth Heron chuonhnuoia khuohai chu a bawl tha a, kul bang nei, kotkhar le a kalna nei vongin a siem a.
6. Chuong ang bokin Baalat khuo le Jerusalem le Lebanon le a lalram sung po poa hmangruo sie khawmna le sakor-tawlailir le indosakor sie khawmna khawpui po po hai chu a'n din thar vong bok a.
7. Israel mi ni lo hnam danghai, Israelhaiin sukbohmang loa an hla Hit hai, Amor hai, Periz hai, Hiv hai le Jebu hai thlahai chu
8. Solomonin suoka neiin sinthawah a sor lui a, tu chen hin chuong ang chun an la um a.
9. Israel thlahai ruok chu Solomonin siehlaw anga sor ve loin, sipaia dam, sipai hotua dam, tawlailir le sakor chung chuong mihai hotua dam a sie lem a.
10. Chuonghai chu mipuihai inrawitu, Solomon thoktu luhai an na, an rengin zahni le sawmnga an nih.
11. Solomon chun "Ka nuhmei chu Israel lal Davida inah a um ding a ni nawh, LALPA Bawm lutna hmun taphot chu hmun thienghlim a ni si a" a ta, Faraw naunu chu Davida Khawpuia inthokin ama puola a chengna dinga a bawlpek ina chun a thuoi tung a.
12. Solomon chun tempul hulhliep hmaa LALPA maicham a siema chun inthawinahai a'n hlan hlak a.
13. Mosie thupek anga ni ser bik Sabat hai, thla thar lawmna nia hai, kut bi nei huna hai, kum khata kut pathum- chol thang lo bei kuta dam, chawlkar kuta dam le bawkte kuta dam pumraw thilhlan inhlan dinga bitukhai chu a'n hlan a.
14. A pa Davida lo ruot tah angin thiempu pawl le Levi pawlhai chu an chanpuol seng ni tina thaw tul ang peia thaw ding, hlaa inpakna thuoitu pawl dam le ni tina an mamaw ang peia thiempuhai thangpuitu ding dam a ruot a. Kotkhar hrang hrang vengtu ding a pawl pawlin a ruot bok a. Chuong anga an thaw ding seng chu Pathien mi Davidan a lo ruot sa diem a nih.
15. Lal Davidan thiempuhai le Levi-hai thaw ding le rosum siena an enkol dan dinga thu a pek iengkim chu a pek ang thlapin an thaw vong a.
16. Solomonin bawl dan dinga a riruong ang thlapin LALPA Tempul chu a thut an rema inthoka an zo fel chenin an bawl a, chuongchun LALPA Tempul chu zo fel a lo ni ta a.
17. Chu zoah Solomon chu Edom rama Agaba litengsawla um Ezion Geber le Elath a chun a fe a.
18. Chu taka chun Hiramin a longpuhai, tuinfinrieta che thang mihai chu long leh a tir a, Solomon siehlawhai leh Ofir-ah an fe a, chu taka mi chu rangkachak kilogram singkhat le sangrukc laia tam an va phur a, lal Solomon kuomah an inhlan a.
←  2Chronicles (8/36)  →