2Chronicles (7/36)  

1. Solomon tongtai zo chun vana
2. LALPA ropuinain LALPA tempul a sip lei chun thiempuhai chu an lut thei naw a.
3. Israel thlahai po poin vana inthoka mei hung tla le Tempul chunga LALPA ropuina inzam an hmu chun tempul tuolzawl lungrema chun bawka hnuoi sikin an bokkhup a,"Ama chu a tha si a,A ngilneinan kumtluong a dai"tiin lawmthu an hril a, LALPA chu an chawibiek a.
4. Chuongchun, lal le mipuihai chun LALPA hmaah inthawinahai an inhlan a.
5. Lal Solomon chun inthawinain bawngchal singhni le sanghni le beram le kel nuoikhat le singhni a'n hlan a. Chuong ang chun lal le mipuihaiin Pathien Tempul chu an inhlan a nih.
6. Thiempuhai chu an hmun sengah an ngir a, Levi-hai khom, "A hmangainan kumtluong a dai" tia LALPA an chawibiek changa an tum hlak dinga Davidan LALPA rimawi hmangruo a'n siemtirhai chu chawiin an ngir a. Levihai epa chun thiempuhaiin tawtawrawt an mut a, Israel mipui po po chu an ngir thup a.
7. Dar maicham a siem chun pumraw thilhlan dam, bu le bal thilhlan dam le sathau an inhlanhai chu a keng naw leiin Solomon chun LALPA tempul hmaa tuolzawl inhuon sung khom chu a'n hlan thienghlim a, chu taka chun pumraw thilhlan le inremna inthawina thilhlana a thauhai chu an inhlan a.
8. Chu tum chun Solomon le Israel mi po po, Hamat Kawna inthoka Aigupta Varuom chena mi pungkhawmhai chun ni sari sung kut an hmang a.
9. A ni riet ni chun inkhawmna ropui tak an nei a, chuong ang chun ni sari sung Tempul inhlan lawmna an hmang bakah ni sari dang kutb an hmang bok a.
10. Chun, thla sarina ni sawmhni le ni thum ni chun mipui chu a'n tintir a, LALPAN Davida le Solomon le a mi Israelhai chunga a thatna a'n langtir lei chun hlim tak le lawm takin mihai chu an in tieng an kir nawk ta a.
11. Solomonin LALPA Tempul le ama in chu a nuom ang taka bawl zo a, LALPA Tempula ding le ama ina dinga thaw ding a lungrila a lo phan po pohai a hlen suok zo chun,
12. zanah Solomon kuomah LALPA a hung inlar a, a kuomah "I tongtaina ka lo hriet a, hi hmun hi ka kuoma inthawina in hung inhlanna ding tempulah ka ruot tah.
13. Vanhai ka khar leia hnuoiah ruo hrim a sur naw chang amanih, khau hon ka hung tir leia a ram an fak ram chang amanih, ka mihai laia hripui ka hung inlengtir chang amania,
14. ka hming puttu ka mihaiin inpha hnuoia ka kuomah an hung tongtai a, an mi zong a, an um dan suolhai an nghatsan chun, vana inthokin lo ngaithlang ka ta, an suolhai ngaidam ka ta, an ram chu thawi dam nawk ka tih.
15. Hi hmuna tongtaia in hung hnina laka chun ka mit phong ka ta, ka na sit bok ka tih.
16. Kumkhuoa ka hming umna dingin hi Tempul hi ka ruot a, ka sukthienglim ta a, chutaka chun ka mit le ka lungril fu zing hlak a tih.
17. "Nang khom i pa lungril ang put a, ringum tak le ngil taka ka hmaah i khawsa ve a, ka thupekhai po po zui a, ka thusuokhai le Danhai po po i zawm ve chun,
18. i pa Davida kuoma. 'Israelhai lalthungpha hluotu ding chu mi invai naw ti nih' ti a ka lo tiem tah angin, Israelhai chungah i lalthungpha chu kumkhuoin suknghet ka tih
19. "Amiruokchu, nangnin mi nghatsan a, ka thupekhai le thusuokhai zawm lo a, pathien dang rong bawla in biek chun,
20. ka pek tah hi rama inthok hin Israelhai chu phawi hmang ka ta, ka hminga dinga ka sukthienghlim tah hi Tempul hi hnawl bok ka ta, hnam tin nuizatbur le hmusit hung ning a tih.
21. Tu hin hi Tempul hi ropui hlein inlang sienkhom, a fe pel taphotin pangzatin, "Iengti lawm lawma hienga LALPA an Pathienin a thaw el am a na?" la ting an tih.
22. Mihai chun, 'Aigupta rama inthoka an pi le puhai thuoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih' tiin la don an tih" a ta.

  2Chronicles (7/36)