←  2Chronicles (6/36)  →
1. Solomon chun, "Aw LALPA, 'Sum sa mupah cheng ka tih' i ti a.
2. Tu hin kumkhuoa i chengna ding, i ta dingin tempul mawi tak ka bawlpek ta che ie" a ta.
3. Chun, a ngha kir a, a hmaa ngir Israel mi pungkhawmhai po po chu mal a sawm a:
4. "LALPA, Israelhai Pathienin ama bau ngeia ka pa Davida kuoma thu a lo tiem tah chu ama kut ngeia a hung hlen suok tah leiin inpakin um raw se.
5. Ama chun, 'Aigupta rama inthoka ka mihai ka thuoi suok nia inthok khan Israel hnamhai laia a ieng khuo khom hi ka hming umna ding Tempul bawlna dingin ka la thlang ngai naw a; ka mi Israelhai chunga lukhaitu ding tu khom ka la thlang ngai bok nawh.
6. Amiruokchu, ka hming umna dingin Jerusalem hi ka lo thlang ta a, ka mi Israelhai chunga roreltu dingin Davida hi ka lo thlang ta bok a nih' tiin a lo hril a.
7. "Ka pa Davida chun LALPA Israelhai Pathien hminga ding Tempul bawl a lungril hlak a.
8. Amiruokchu LALPAN a kuomah, 'Ka hminga ding Tempul bawl nuomna lungril i nei hi i thaw tha ngot el.
9. Sienkhom, nang chu ka Tempul bawltu ding i ni nawh, i naupa, i thalbea inthoka suok ngei chu ka hminga ding Tempul bawltu ding chu a nih' tiin a lo hril a.
10. Chun, LALPAN a thutiem chu a hung suknghet a, a tiem tah ang ngeiin kei chun ka pa Davida lalna ka hung hluo a, tu hin Israelhai lalthungphaah ka hung inthung ta a, LALPA Pathien, Israelhai Pathien hminga ding Tempul chu ka lo bawl ta ngei bok a.
11. Chu taka chun Israel thlahai kuoma a lo thlung, LALPA Thuthlungna Bawm chu ka sie tah a nih" a ta.
12. Chun, Israel mi pungkhawmhai chu hma sonin LALPA maicham hmaa chun Solomon chu a ngir a, kut a phar a.
13. Dar dawkan, a dung meter hni le centimeter hnia sei le a khang meter hni le centimeter hnia lien, a'n sangzie meter khat le centimeter thum a siem a, Tempul tuolzawl laili taka a'n thut chunga chun a lawn kai a, Israel thla pungkhawm po po hmaah a dingthathuon a, van tieng nghain ban a phar a.
14. Chuongchun hieng hin a tongtai a: "Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vana le hnuoi tieng leihnuoiah Pathien dang hrim an um nawh.
15. Ka pa, i siehlaw Davida kuoma bau ngeia thu i tiem chu nangma kut ngeiin i hung hlen a, chu chu voisuna kan hmu hih a nih.
16. "Tu hin aw LALPA, Israelhai Pathien, ka pa Davida kuoma, 'Ka mithmua i um dan anga i thlahai khom ka mithmua fimkhur taka ka dan an zawm ve phot chun, Israel lalthungpha hluotu ding mi chu invai ngai naw ti nih' tia thu i lo tiem kha vong ngei dingin ka ngen che.
17. Aw Israelhai Pathien, ka pa Davida kuoma thu i tiem kha hung hlen ngei rawh.
18. "Amiruokchu aw LALPA, hnuoia mihriemhai lai chu i cheng tak tak ding am a ni? Van insang tak hmanin a keng naw che a, hi ka Tempul bawla lem hin chu i va hang inleng naw nasa zuol awm de aw!
19. Chuong sa khom chun aw LALPA Pathien, zangaina hnia i siehlaw tongtaina hi lo ngaisak la, voisuna i hma ngeia tongtaia i siehlaw hung kona che hi lo ngaithlapek hram rawh.
20. Chu taka chun ka hming chu um a tih' i lo tina hmun tieng hi ngha a, i siehlaw hung tongtaina chu i lo ngaithlak theina dingin, hi tempula hin sun le zanin mit inlen zing hlak rawh.
21. Hi hmun tieng hi nghaa i siehlaw le i mi Israelhai kan hung tongtai pha chun mi lo ngaithlapek rawh. A nih, i chengna vana inthok chun lo ngaithla la, i hriet pha leh kan suolnahai lo ngaidam hlak rawh.
22. "Mi tu khomin a tuolbawm poi a tawk a, hi Tempula i maicham hmaa a thiem thu inkham meua a hung intlun pha chun,
23. vana inthokin lo ngaithla la, che nghal la, i siehlawhai chungah ro hung rel la, a thiem naw lem lu chunga chun a thil suol thawna maw chu intlaktir la, poi tawk nawtu chu thiem inchangtir la, a thiemzie chu namnghet rawh.
24. "Nangma lakah an suol leia hmelmahaiin i mi Israelhai an hne changin, nangma tieng hung ngha kir a, i hming lam a, hi Tempula hin ngaidam an hung inhni pha chun,
25. vana inthokin lo ngaithla la, i mi Israelhai suolna chu ngaidampek la, an pi le puhai kuoma ram i peka chun thuoi kir nawk rawh.
26. "I mihaiin i lakah thil suol an thaw leia vanin ruo hrim a'n surtir ta naw changin, hi hmun tieng hi nghaa hung tongtai a, i hming lam a, i hrem leia an suolhai an sim pha chun,
27. vana inthokin lo ngaithla la, i siehlaw, i mi Israelhai suolna chu lo ngaidam la, an khawsak dan ding lampui indik kawkhmu la, i mihai rochana i pek rama hin ruo hung insurtir rawh.
28. "A ramah tam tla a, hripui dam, inlawngna dam le hmonna hri dam inleng a, khauthikthi le tuktulung dam intam a, hmelmahan an khuohai inhuol a, sietna le hri le hrai ieng khoma a tlak buok changin,
29. i Tempul tieng kut hung phar a, hrem an tuor dan chit chu mani lungril sengah pai a, i mi Israelhai laia mi tu khomin i kuomah tongtaia hnina an hung intlun chang chun,
30. i chengna vana inthokin lo ngaithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a.
31. Chuongchun, kan pi le puhai kuoma ram i peka hin an um sung chun ieng lai khomin nangma ti nachang hung nei pha tang an tih.
32. "Ram dang mi, i mi Israelhai ni ve lo, sienkhom i hming leia ram hla taka inthoka hung pantu che khom, (i hming ropui tak le kut hrat tak phara i thawpekzie hi mihaiin an la hung hriet pei ding a ni si leiin) Tempul tieng nghaa an hung tongtai pha chun,
33. i chengna vana inthokin lo ngaithla la, ram dang mi thil hni chu lo thawpek la, chuongchun i mi Israelhai ang boka khawvela hnam tinin i hming hung hrein, tiin, hi ka Tempul bawl hin i hming a put ngeizie hung hre thei an tih.
34. "I mihaiin hmelmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi nghaa LALPA kuoma an hung tongtai chun,
35. i chengna vana inthokin an tongtaina le hnina chu lo ngaithlapek la, an hnina chu lo pompek rawh.
36. "I lakah thil suol an thaw a, (tu khom suol lo an um bok si naw a), an chungah i lung a sen a, hmelma kutah i pek a, an ram tieng, hnai te amanih hla tak amaniah sala an thuoi pha,
37. sala an thuoina hmunah inngaituo suok a, insir a, an intangna rama inthokin hung ngen a, 'Thil suol kan lo thaw a, poi kan lo tawk a, rilo takin kan lo khawsa a nih' an ti pha,
38. an hmelmahai, sala thuoituhai rama inthoka lungril le thlaraua nangma tieng hung ngha kir a, an pi le puhai i pek ram tieng, i khawpui thlang le i hming dinga ka bawl Tempul tieng hi nghaa an hung tongtai pha chun,
39. i chengna vana inthokin an tongtaina le hnina chu lo ngaithlapek la, an hnina chu lo pompek la, i laka i mipuihai thil suol thaw chu lo ngaidam rawh.
40. "I siehlaw hnina le i mi Israelhai hnina lakah i mit insim ngai naw la, hi hmuna inthoka an hung ko pha che chun lo ngaithlapek hram rawh.
41. Tuhin hung tho la LALPA Pathien,I thilthawtheina Thuthlung Bawm leh,I tempula hin hung cheng ta rawh.I thiempuhai chu LALPA Pathien,Sandamnain inthuom tawl la,An chunga i thatna leiin,I mi thienghlimhai chu hlim raw se.
42. I hriek nal hi LALPA Pathien,Hnawl hmang ngai hrim hrim naw la,I siehlaw Davida kuomaI tiem hmangaina ropui kha,Theinghil ngai hrim hrim naw rawh"a ta.
←  2Chronicles (6/36)  →