| ← 2Chronicles (5/36) → |
| 1. | LALPA tempul ding Solomonin a bawl zo chun a pa Davidan thil a lo inhlan ta po po tangkaruo le rangkachak le in cheina hmangruo po po chu a hung lak a, LALPA tempula rosum sie khawmnaa chun a sie a. |
| 2. | Solomon chun Israel upahai, Israel thlahai laia hnam tin thuoituhai le sungkuo tina lukhaituhai chu Davida Khawpui Zion-a inthoka LALPA Thuthlungna Bawm chu Tempul tienga zawn tung dingin Jerusalemah a'n cha khawm a. |
| 3. | Chuongchun, Israel mihai po po chu thla sarinaa kut lai chun lal kuomah an hung khawm a. |
| 4. | Israel upahai an hung tlung chun thiempu Levi-hai chun Thuthlung Bawm chu an zawn tung a, |
| 5. | Intuokna Puon in le a cheina le a hmangruo thienghlimhai po po khom chu an zawn tung bok a. |
| 6. | Lal Solomon le a kuoma Israel mi pungkhawmhai po po chu Thuthlung Bawm hmaa chun an hung a, beram le bawngchal tam tak, a zat khom inchik le tiem seng ruol lo chu inhlanin an inthawi a. |
| 7. | Chuongchun, thiempuhai chun LALPA Thuthlungna Bawm chu a umna ding Tempul sungril, Hmun Thienghlim Taka chun an lak lut a, cherubhai thla zar hnuoia chun an sie a. |
| 8. | Cherubhai chun Thuthlung Bawm chungah thla zarin, bawm le a zawnfunghai chu an zar khum a. |
| 9. | Bawm zawnfung chu a sei leiin a hmawr chu Hmun Thienghlim kota inthok khomin a'n lang phak a, sienkhom hmun danga inthok ruok chun hmu thei a ni nawh; chuong ang chun tu chen hin a la um zing. |
| 10. | Bawm sunga chun Aigupta rama inthoka Israelhai an hung suok hnunga Horeb tlanga LALPAN an kuoma thu a thlungna lung phek pahni Mosien a sie chauh naw chu ieng dang khom a um nawh. |
| 11. | Chun, hmun thienghlima inthokin thiempuhai chu an hung suok a. Chu taka thiempu umhai chu ieng ang pawla mi khom ni hai sien, an insukthienghlim vong a. |
| 12. | Levi-hai laia rimawi tumtu le hla saktu Asaf hai, Heman hai, Jeduthan hai le an naupahai le sungkuohai po po chu puon zai inhmia khawng thuom inbelin, darbenthek dam, perkhuong dam le tingtang dam chawiin maicham sak tieng pangah an ngir a. Tawtawrawt muttu thiempu za le sawmhni an thang sa bok a. |
| 13. | LALPA inpakna le a kuoma lawmthu hrilna hla an sak le tawtawrawt an mut ri chu zai khatin a luong a. Chuongchun, tawtawrawt le darbenthek le rimawi danghai leh rema,"Ama chu a tha si a,A ngilneinan kuomtluong a dai"tia rawl tawp insuoa LALPA inpakna hla an sak lai chun LALPA tempul chu sumin a hung baw sip ta mup a. |
| 14. | Sum lei chun thiempuhaiin rong an bawl thei ta naw hiel a, Pathien tempul chu LALPA ropuinain a sip si a. |
| ← 2Chronicles (5/36) → |