2Chronicles (33/36)  

1. Manase a hung inlal chun kum sawm le pahni mi a ni a, Jerusalemah kum sawmnga le kum nga a'n lal a.
2. Israelhai hmaa LALPAN a hnot suok hnamhai ching dan tirdakum tak chu zuiin LALPA mithmuah thil suol a thaw a.
3. A pa Hezekia-in a sukchim hmun sanghai chu a'n din thar nawk a, Baal maichamhai a bawl a, Ashera lem thinghai a phun a, vana um po po khi a biek a, an rong a bawl a.
4. Chun, LALPAN "Jerusalem-ah kumkhuoin ka hming um a tih" a tina LALPA Tempula ngei chun pathien danghai maicham a bawl a.
5. LALPA Tempul tuolzawl ve vea chun vana um po po ta dingin maicham a siem a.
6. Ben Hinom ruomah a naupahai meiah a'n hlan a, aisan a ching a, dawi a hmang a, ramhuoi zawlhai le rau ko thiem hai a rawn a, LALPA suklungsen dingin a mithmuah thil suol tam tak a thaw a.
7. Pathienin Davida le a naupa Solomon kuoma, "Hi tempul le Israel thlahai hmun laia ka thlang Jerusalema hin ka hming chu kumkhuoin inumtir ka ta,
8. Mosie hmanga thu ka pek hai, dan hai, thusuok hai le thuruot po po hai chu fimkhur taka an zawm phot chun, an pi le puhai ka pek tah hi rama inthok hin Israelhai ke chu inpen suoktir ta naw ning" a lo tina Pathien tempula chun ama milem inkertir chu hung chawiin a sie a.
9. Manase chun Judahai le Jerusalema mihai chu thuoi suolin, LALPAN Israelhai hmaa a sukbohmang hnamhai neka nasa lemin thil suol an thaw a.
10. Manase le a mihai kuoma chun LALPAN thu a hril hlaka chu an ngaisak nawh.
11. Chuleiin, LALPAN Asuria sipai kawmandarhai a tir a, Manase chu an man a, a hnarah khaidiet an inbuntir a, dar kol an inbuntir bok a, Babulon tieng an thuoi a.
12. Beidong taka a um lai chun LALPA a Pathien ditsakna chu a zong a, a pi le puhai Pathien hmaa chun nasa takin a'n phahnuoi a.
13. Chuonga tongtaia a hang hni chun LALPA lung a tawk a, a hnina chu LALPAN a ngaithlak a, Jerusalemah a rama chun a thuoi kir nawk a. Chu phing leh Manase chun LALPA chu Pathien a nizie a hung hriet ta a.
14. Chu hnung chun Davida khawpui inhuonna tuol bang, Gihon vadung thlang tieng ruoma inthoka Nga Kotkhar lutna chenin, a siem tha a, Ofel muol inhuol velin insang takin a rem a. Chun, Judai rama kul umna khaw tinah sipai kawmandar a sie vong a.
15. Ram dang pathienhai le milemhai po po chu LALPA Tempula inthokin a'n thiel fai vong a, LALPA Tempul muol le Jerusalema maicham a siemhai po po chu khuoa inthokin an pei hmang vong a.
16. LALPA maicham a siem tha a, inremna thilhlan inthawina le lawmthu hrilna thilhlanhai a'n hlan a, Judahai chu LALPA Israelhai Pathien rong bawl dingin a hril a.
17. Mipuihai chu hmun sanga an inthawi hlak chu an la thaw zing a, sienkhom LALPA an Pathien kuoma chauh a ni ta lem.
18. Manase inlal laia thil tlung danghai le Pathien kuoma a tongtai thu hai, LALPA, Israelhai Pathien hminga a kuoma zawlneiin thu a hrilhai chu Israel lalhai chanchin inziekna buah a chuong.
19. A tongtaina thu le a hninain Pathien lungril a tawk thu hai, a'n phahnuoi hmaa a khawsak dan hai, a suolna le ringum nawna hai, hmun sang a bawlna hmun hai le Asera lem thing le a milem siem fawmhai a siena hmun po po chanchin chu Hozaiin a chanchin a ziekna buah a chuong.
20. Chuongchun, Manase chu a pi le puhai kuomah a chawl a, ama inah an phum a, a naupa Amon chun a lalna chu a hung hluo ta a.
21. Amon chu kum sawmhni le kum hni a ni kumin a'n lal tan a, Jerusalemah kum hni a'n lal a.
22. A pa Manase thaw ang bokin LALPA mithmuah thil suol a thaw a, a pa Manase siem fawm milem po po kuomah a'n thawi a, an rong a bawl a, a suol zuol sauh lem a nih.
23. A pa Manase inphahnuoi ang khan LALPA hmaah a'n phahnuoi ve nawh.
24. Chun, a siehlawhaiin an phierruk a, ama inah an that a.
25. Nisienlakhom. Amon phiertu po po chu mipuiin an that vong a, mipui chun a naupa Josia chu lalah an siem a.

  2Chronicles (33/36)