←  2Chronicles (32/36)  →
1. Chuonga ringum taka Hezekia-in thil a thaw hnung chun Asuria lal Senakerib-in Judai ram a hung run a, lak tumin kul nei khuohai chu a'n huol a.
2. Jerusalem run dingin Senakerib a hung inthok ti Hezekia-in a hriet chun a mi lienhai le sipai hotuhai chu a rawn a,
3. khaw puo tienga tuikul po po chu khar a rot a, anni chun an thangpui a.
4. Chuongchun, mi tam tak an pung khawm a, "Ieng leiin am Asuria lal chun tui tam tak a nei ding?" an ta, a rama luong lut vadungte tui hnar po po chu an dang chat vong a.
5. Chu zoah Hezekia chun inrim taka thokin kul bang chim tah po po chu a siem tha a, kulbing insanghai a'n din thar a, kul puo tieng kul dangin a'n huon thuo a, Davida khawpui thut chu a suknghet a, hriemhrei le phaw tam tak a siem bok a.
6. Chun, indonaa mipuihai inrawitu ding hotu a siem a, khawpui kotzawla chun a ko khawm a,
7. "Hrat tak le huoi takin um ro. Asuria lal le a sipai tam takhai chu ti naw unla, zam bok naw ro, ama neka thil thaw thei lem ei kuomah a um si a.
8. Ama kuoma chu mihriem ban chauh a um a, eini kuoma ruok chu mi thangpuitu ding le ei ral dotu ding LALPA ei Pathien a um a nih" tiin a thlamuong a. Juda lal Hezekia thu hril chun mipuihai chu a sukhuoi a.
9. Senakerib-in Lakis khuo a'n huol lai chun Jerusalema Juda lal Hezekia le Juda mipuihai po po kuomah a ofisarhai a tir a, hi thu hi a'n cha a:
10. "Asuria lal Senakerib chun hieng hin a tih: 'Jerusalem inhuol a ni ta hnung khoma in um zing ngamna san chu iem ni tang a ta?
11. Hezekia-in, 'LALPA ei Pathien chun Asuria lal kuta inthokin mi san suok a tih' tia a hril cheu kha, phingtam le dangchara in thina dinga a hlem bawlna cheu a ni kha.
12. Hezekia ngei hi hmun sanga maichamhai sukchim a, Judai ram le Jerusalema mihai kuoma, 'Maicham pakhatah Pathien bein, a chungah pumraw thilhlan in inhlan ding a nih' titu kha a ni naw am a ni?
13. Ram danghai chunga kei le ka pi le puhaiin kan thaw dan in la hriet naw a ni maw? Chuong hnamhai pathienhai chun ka kuta inthokin an ramhai chu an humpek thei am a ni?
14. Ka pi le puhaiin an sukbohmang ta hnung a tu hnam pathien hin am ka kuta inthokin an san suok tah ti in hriet ta hlak a? In Pathien chun ieng tin am ka kuta inthokin a san suok thei bik ding cheu?
15. Hieng ang hin Hezekia chun hlemin thuoi suol naw raw se cheu. Ama chu ring naw ro; tu hnam pathien le ieng ram pathien khom ka kuta inthok le ka pi le puhai kuta inthoka san suok thei an um nawh. In Pathien lem lem chun ka kuta inthokin san suok naw nawkzuol a ti cheu" tiin.
16. Senakerib mihai chun chu neka nasa lem chun Pathien le a siehlaw Hezekia chu an biek sisaw a.
17. Chun, Asuria lal chun Israelhai LALPA Pathien hmusit zawngin, "Ram dang mi pathienhaiin ka kuta inthoka an mipuihai an san suok thei naw ang bokin, Hezekia Pathien khomin ka kuta inthokin san suok naw top a tih" tiin a ziek bok a.
18. Khawpui chu an lak theina dinga Jerusalem mipuihai rikrap le sukthlabar dingin kul chunga umhai chu Hebrai tongin an khek khum a.
19. Jerusalem Pathien chu mihriem kuta siem, khawvela mi danghai pathien ang mei meiin an hril a.
20. Chuong ang thil lei chun, lal Hezekia le Amoz naupa zawlnei Isai chu van tieng nghain an tongtai a.
21. Chuongchun, LALPAN vantirko a tir a, Asuria lal riekhmuna mi hrat huoisen po po le an hma thuoitu le hotuhai po po chu a sukhlum vong a, hmai thumin a ram tieng a kir nawk a. A pathien tempula a fe chu ama nauhai ngeiin kawlhnamin an lo sathlum a.
22. Chuong ang chun LALPAN Hezekia le Jerusalema mihai chu Asuria lal Senakerib kuta inthok le mi dang po po kuta inthokin a sanhim a, an kawl le kienga mihai lakah a veng a.
23. Chun, mi tam takin LALPA ta dingin Jerusalemah thilpek an hung chawi a, Juda lal Hezekia chu thil hlu tak tak an hung pek a. Chu taka inthok chun nasa taka hnam tin ngaisang a hung hlaw ta a.
24. Chuong lai chun Hezekia chu thi ngamin a na a, LALPA kuomah a tongtai a, a lo don a, inchikna mak a pek a.
25. Nisienlakhom, Hezekia lungril chu a chapo a, a chunga zangaina inhmutira a um angin a thaw ve naw leiin ama le Judai ram le Jerusalem chunga chun LALPA lung nasa takin a sen a.
26. Hezekia chun a lungril chapona chu a'n sir a, chuong ang bokin Jerusalem mipuihai chun an insir ve leiin Hezekia dam sung chun LALPA lungsenna chu an chungah a tlung ta nawh.
27. Hezekia chun sum le pai a hung hau a, a hung ropui ta hle a, tangkaruo hai, rangkachak hai, lunghlu hai, rimtui hai, phawhai le thil hlu tam tak sie khawmna in a bawl a.
28. Bu le uoiin le hriek sie khawmna in a bawl bok a. Ran ruol tinreng sie khawmna ding buk le beram huong hai a bawl a.
29. Khuohai a siem a, bawng ruol le beram ruol tam tak a nei a, Pathienin hausakna nasa takin a vur a.
30. Hezekia bok hin Gihon vadung chuonchung lem chu a khar a, Davida khawpui thlang tieng pangah an luong thlaktir a. Chuongchun, Hezekia chu a thilthaw po poah a hmuingil pei a.
31. Amiruokchu, Babulon lalin a rama inchikna mak hung tlung chu indon dinga palai a hung tir chun, a lungrila thil um po po a hriet theina dinga fie dingin Pathienin a thlathlam a.
32. Hezekia inlal sunga thil tlung danghai le a thilthaw thathai chu Amoz naupa Isai inlarna bu, Juda lalhai le Israel lalhai chanchin inzieknaah a chuong.
33. Hezekia chu a pi le puhai kuomah a chawl a, Davida thlahai thlanmuola chun an phum a. Juda mi po po le Jerusalema mihai po poin a thi ni chun ropui takin an sun a. A naupa Manase chun a lalna chu a hung hluo ta a.
←  2Chronicles (32/36)  →