2Chronicles (31/36)  

1. Chuong po po chu an thaw zo hnungin chu taka um Israel mihai chu an inthok suok a, Judai ram po po le Benjamin ram le Efraim ram le Manase ram sunga an lungserhai po po chu an vuok koi a, Asera lem thinghai chu an phur a, hmun sanga an bawlhmun le maicham po po chu an sukchim vong a. An suksiet vong hnung chun Israelhai chu anni khuo seng le an in le lo sengah an kir nawk ta a.
2. Hezekia chun thiempuhai le Levihai chu an pawl inthe dan le thaw ding chan an insem ang peia pumraw thilhlan le inremna thilhlan inhlantu ding dam, rongbawltu ding dam, lawmthu hriltu ding dam le LALPA chengna in kotkhara inpakna hla saktu ding dam a ruot a.
3. Lal chun ama ran ruola inthokin zing le zana pumraw thilhlan ding dam, LALPA danin a tuk anga Sabat ni dam, thla thar lawm ni dam le hunbi nei kut hmang changa inhlan dinghai chu a tum a.
4. Thiempuhai le Levihai chu LALPA dana an inpek zo theina dingin an chanpuol dinghai chu pe dingin lal chun Jerusalema chenghai chu thu a pek a.
5. Thupek a suok charin Israel thlahai chun phal takin an bu le bal tharsuok hai, uoiin hai, hriek hai, khuoizu hai le an lo tharsuok hmasa tak hai chu an hung pek tuk tuk a; chun, an iengkima sawma pakhat chu an hung pek bok a.
6. Israel mi le Juda mi, Judai rama chenghai chun an ranhai sawma pakhat le LALPA an Pathien chanpuola thilpek an inhlan thienghlim tahai laia sawma pakhat chu an hung chawi khawm a, an intieng khawm hner hnur el a.
7. A thla thumnaa an lak khawm tan kha a thla sarinaah an lak khawm zo a.
8. Hezekia le a thoktuhaiin chuong thilpek vum thur el an hang hmu chun LALPA an chawimawi a, Israel mipuihai chu an inpak hle a.
9. Hezekia chun an thil sie khawm chungchang thu chu thiempuhai le Levihai chu a'n don a.
10. Zadok sungkuoa mi thiempu laltak Azaria chun, "Mihaiin LALPA Tempula an thilpek an hung chawia inthok hin chu fak ding kan nei zing ta a, LALPAN a mipuihai mal a sawm a, hieng zozai hi fak seng lo a la vum thur el a nih" a ta.
11. Chuongchun, LALPA Tempula chun a sie khawmna ding hmun siem dingin Hezekia chun thu a pek a, chuong ang tak chun an thaw a.
12. Chu zoah indik takin an thilpek hai, sawma pakhathai le Pathien puola thilpek an inhlan hai chu an hlu lut a. A enkoltu lu tak chu Levi mi Konania a na, a dottu chu a unaupa Simei a nih.
13. Konania le a unau Simei inrawina hnuoia thok dinga lal Hezekia le Pathien Tempula hotu Azaria haiin enkaitu mi an ruothai chu Jehiel hai, Azazia hai, Nahat hai, Asahel hai, Jeromot hai, Jozabad hai, Eliel hai, Iskamia hai, Mahat hai le Benaia hai an nih.
14. Levi mi Imna naupa Kore, sak tieng kotkhar vengtu chu mani nuom thua Pathien kuoma thil an hung inhlanhai lo dongtu le LALPA kuoma thawlawm le thilpek an hung inhlanhai semtu a nih.
15. Thiempuhai umna khaw tina ringum taka lo thangpuituhai chu Eden hai, Miniamin hai, Jesua hai, Semaia hai, Amaria hai le Sekania hai an nih; anni chun an unauhai chu a pawl pawlin, a chin a lien kuomah an chanvo ding seng an sempek hlak.
16. Chun, thlatu inzieknaa hming chuong pasal, kum thumj le a chung tieng mi, an pawl inthe dan le mawphurna insem dan ang dungzuia LALPA Tempula ni tina fe tulhai ruok chu an inthangtir sa ve nawh.
17. Thiempuhai sinthaw dan ding chu an chi inthla dan ang dungzuiin an ruot a, Levihai ruok chu, kum sawmhni chung tieng po, an sinthaw dungzuiin, an thangna ding pawl an ruot a.
18. Thiempuhai chu an nuhmei hai, ieng anga naupang khom an naunu le naupa hai le an sungkuoa thang mi danghai leh ringum taka an insukthienghlim zing leiin an sungkuo inziekna anga tiem sa vong an nih.
19. Chun, Aron thla thiempuhai, khaw se vel phula chenghai le khaw hrang hranga cheng le Levi thlahai hming inzieknaa chuong taphothai chanvo semtu ding mi ruot bik an um bok a.
20. Chuong ang chun Judai ram po poah Hezekia chun a thaw a, LALPA a Pathien mithmuah tha le indik le ringum takin thil a thaw hlak a.
21. Pathien Tempula rongbawlna thua dam, dan le thupekhai a zawmna konga dam le Pathien a zongnaa dam iengkim a lungril po poin a thaw a, a hmuingil pei a.

  2Chronicles (31/36)