←  2Chronicles (30/36)  →
1. Hezekia chun Israel ram le Judai ram po poah mi a tir a, Efraim-hai le Manase-hai rama khom lekha a thon a, Jerusalema LALPA Tempulah hung a, LALPA, Israelhai Pathien Fekan kut hung hmang dingin a fiel a.
2. Lal le a mi lienhai le Jerusalema pungkhawmhai po po chun a thla hninaa Fekan kut hmang an rot a.
3. Chuong lai chun thiempua ser thienghlim an la tam tawk naw bakah Jerusalemah mipui an la pung khawm tam tawk naw leiin a hun pangngaiah an la kut thei hri naw a.
4. Lal le pungkhawmhai chun an thil rot chu tha hlein an ngai a.
5. Chuleiin, Israel ram po poah, Beershebaa inthoka Dan chenin LALPA, Israelhai Pathien ta dinga Fekan kut Jerusalema hung hmang dinga inhriettirna chu thon dar an rel thluk a. Dan ang chun tam tak pungkhawma hmang ding a na, sienkhom chuong ang chun hmang a la ni hri nawh.
6. Chuongchun, lal thupekin Israel ram le Judai ram hmun tinah lal le a mi lienhai lekhathon chu thu phurtuhaiin an tlanpui a. Chu lekhathona chun, "Nangni Israel thlahai, Asuria lalhai kuta inthoka tlan suok la dam sunhai tieng LALPA a hung ngha nawk theina dingin, LALPA, Abraham Pathien, Isak Pathien le Israel Pathien tieng hung ngha kir nawk ro.
7. In pi le puhai le in unauhai chu LALPA, in pi le puhai Pathien chunga an ringum naw leia mihai pangzata a siemzie nangni ngeia in hmu ang hin nangni ruok chu um ve naw ro.
8. In pi le puhai ang khan lulul ve naw unla, LALPA kuomah tlu lut unla, kumkhuoa dinga a ser thienghlim, a hmun thienghlima chun hung ro. LALPA, in Pathien rong chu bawl ro, chuongchun in chunga a lungsenna nasa tak chu nangni lakah a lak kieng ding a nih.
9. LALPA kuom tieng in hung kir chun, in unauhai le in nauhai chu sala mantuhai inlungsiettir a ta, hi rama hin hung kir nawk an tih; LALPA in Pathien chu ngilnei tak le zangai thei tak a ni si a. Ama tieng in ngha phot chun nghatsan hrim hrim naw ni cheu" tiin.
10. Lekhathon tlanpuituhai chu khaw tinah, Efraim le Manase hai ram po poah, Zebulun ram chenin an fe a, sienkhom anni chun hmusitin an lo nuizat a.
11. Amiruokchu, Aser hai, Manase hai Zebulun hai laia thenkhat ruok chu inphahnuoiin, Jerusalemah an fe a.
12. Judai rama lem chu LALPA thu anga lal le mi lienhai thupek chu hlen suok ngei dingin Pathien kut chu mipuihai chungah a um a, lungril hmun khat a'n puttir a.
13. A thla hninaa chun chol thang lo bei kut hmang dingin mipui tam tak Jerusalemah an pung khawm a.
14. Jerusalem khaw sunga maicham an lo siemhai po po chu an thiek vong a, rimtui rawna maichamhai po po khom an suksiet a, Kidron vadungah an dehawn a.
15. A thla hnina ni sawm le ni linaa chun Fekan kutna beramte chu an that a. Thiempuhai le Levihai khom an inzak em leiin an lo insukthienghlim ta a, pumraw thilhlanhai chu LALPA tempula chun an hung lak lut a.
16. Pathien mi Mosie dana a hril ang takin mani thawna ding hmun senga chun an um a, thiempuhai chun Levihai hung chawi thisen chu an the a.
17. Mipuihai lai chun ser le sang thaw dinga insukthieng hman lo le chu leia LALPA kuoma Fekan kut beramte inhlan thei lo an um a, chuonghai chu LALPA ta dinga inthienna dingin a thienghlim lohai puolin Levihai chun Fekan kutna beramtehai chu an that a.
18. Efraim mihai, Manase mihai, Isakar mihai le Zebulun mihai laia tam tak chu insukthienghlim lo an ni a, sienkhom dan lo angin fekan kutna ruoi chu an fak ve a. Anni ta ding chun Hezekia-in a hnipek a,
19. "Tu khom lungril taka Pathien, an pi le puhai LALPA Pathien zongtu taphot chu Hmun Thienghlim dan ang takin insukthienghlim naw hai sienkhom LALPA thatna chun ngaidam tawl raw se" tiin a tongtai a.
20. Hezekia tongtaina chu LALPAN a lo ngaithlak a, mipuihai chu a sukdam a.
21. Jerusalema um Israelhai chun chol thang lo bei kut chu hlim takin ni sari sung an hmang a; Levihai le thiempuhai chun LALPA chawimawina rimawi hmangruohai chu inring taka tumin ni tinin LALPA kuomah inpakna hla an sak a.
22. Levihaiin thiem taka LALPA chawibiekna rong an bawlna chungthuah Hezekia chun Levihai chu a'n pak tawl a. Chuong ang chun, LALPA an pi le puhai Pathien kuomah inremna thilhlanhai chu inhlana LALPA chawimawiin, an chan seng faa dawnin, ni sari sung kut ruoi an the a.
23. Pungkhawmhai po po chun ni sari dang kut sunzom an rot a, chuongchun ni sari dang chu hlim takin an kut nawk a.
24. Juda lal Hezekia chun an kutna dingin mipuihai kuomah bawngchal sangkhat le beram sangsari a pek a; mi lienhai khomin bawngchal sangkhat le beram le kel singkhat an hung thaw bok a. Thiempu tam tak chu an lo insukthienghlim ta bok a.
25. Juda mipui po po chu, thiempuhai le Levihai leh, Israel rama inthoka hunghai le hnam dang, Israel rama inthoka hung le Judai rama umhai chu an hlim hle a.
26. Jerusalema mihai khom nasa takin an hlim a, Israel lal Davida naupa Solomon thi hnungah chuong ang hrim hrima hlimna chu Jerusalemah a la um ngai nawh.
27. Thiempuhai le Levihai chun ngirin mipuihai chu mal an sawm a, Pathienin a lo ngaithlak a, an tongtaina chun a chengna Hmun Thienghlim van chu a tlung si a.
←  2Chronicles (30/36)  →