←  2Chronicles (3/36)  →
1. Solomon chun Jerusalema Moria Muol, a pa Davida kuoma LALPA a hung inlarna, Jebu mi Arauna hrizawl, Davidan hmun a lo buotsaia chun LALPA tempul chu a bawl a.
2. Lal a nia inthoka kum lina, thla hnina le ni hninaa chun a bawl tan a.
3. Pathien tempul thut dinga Solomon rem chu a dung meter sawmhni le pasari le a khang meter kuo a nih.
4. Tempul tuolpuk bathlar chu tempul khang le intiet char, meter kuo a na, a'n sangzie chu meter sawmpathum le a chenve a nih. A sung chu rangkachaka inluon vong a nih.
5. Chun, pindan lien lem banga chun far thing a hmang a, chu chu rangkachak hlir hlakin a'n luon khum a, chu taka chun tum thing le khaidiet lim a'n chuongtir a.
6. Tempul chu lunghlu chi hrang hrangin a cheimawi a; rangkachak khom Parvaim rangkachak ngot a hmang a.
7. Tempul kalkhanghai, banghai, kotkhar le tuong hai chu rangkachaka inluon vong a na, a banga hai chun cherub lim a ker a.
8. Hmun Thienghlim Tak chu a dung le a khang meter kuo ve ve a na, a sung chu rangkachak hlir hlaka inluon vong a na, chu taka ding chun rangkachak kilogram singhni le sangkhat vel a hmang a.
9. A kilna khom rangkachak thirkil vong a hmang a, thirkil pakhat chu gram zanga le sawmsari peia rik a nih. Pindan siling po po khom rangkachak tuia inluon vong a nih.
10. Chun, Hmun Thienghlim Taka sie dingin cherub lim pahni a'n siemtir a, chuonghai chu rangkachaka inluon vong a nih.
11. Cherubhai chun thla an zar a, meter kuo an zar khum a. Cherub pakhat thla chu meter hni le centimeter hnia sei a na, a thla ki pakhat chun tempul bang a va sun phak a; a thla khing tieng khom chu meter hni le centimeter hnia sei bok a na, cherub pakhat thla ki chu a va hawl phak a.
12. Chuong ang bokin cherub dang thla khom chu meter hni le centimeter hnia sei a na, a thla ki pakhat chun tempul bang a va sun phak a, a thla khing tieng chu meter hni le centimeter hnia sei bok a na, cherub pakhat thla ki chu a va hawl phak a.
13. Chuong cherubhai chun meter kuo inkhumin thla an zar a, kea ngirin in sung tieng an ngha ve ve a.
14. Hmun Thienghlim Tak lutna puonzar chu a dumpawl le senduk le sen lar inpol, pat zai inhmi taka khawng a na, chu taka chun cherub lem an zep chuoi a.
15. Chun, tempul hmaa phun ding dar ban pahnih, meter riet ve vea insang le a sipa inchuon ding, a lu thut mum meter hni le centimeter hni ve vea insang chu a siem bok a.
16. A lu thut mum khei par chu khaidiet inher thlopin a vet kuol a, khaidieta chun theibufai lim zakhat a khai tlar bok a.
17. Chu dar banhai chu tempul kota chun sim tieng pakhat, hmar tieng pakhat a phun a. Sim tienga ban chu Jakin a'n buk a, hmar tienga mi chu Boaza a'n buk bok a.
←  2Chronicles (3/36)  →