←  2Chronicles (29/36)  →
1. Hezekia chu kum sawmhni le panga a niin a hung inlal tan a, Jerusalemah kum sawmhni le pakuo a'n lal a. A nu chu Zekaria naunu, a hming Abija a nih.
2. Hezekia chun a thlatu Davida thaw dan zuiin Pathien mithmuah thil indik a thaw a.
3. A'n lal tan kum thla khatnaa chun LALPA Tempul kotkharhai chu a hong nawk a, a chei tha a.
4. Thiempuhai le Levihai chu a thuoi lut a, suo tieng tuolzawla chun a ko khawm a.
5. An kuomah, "Nangni Levihai, ka thu hi ngaithla ro. Tuhin nangni insukthienghlim phot unla, chu zoah LALPA, in pi le puhai Pathien Tempul hi inthien fai unla, Hmun Thienghlima inthokin thil porche po po inthiel fai vong ro.
6. Ei pi le puhai chu an lo ringum naw a, LALPA ei Pathien mithmuah thil suol an thaw a, ama an nghatsan a. LALPA chengna hmun chu an hnungson a.
7. Tempul kotkharhai chu an khar a, khawnvarhai chu an sukmit a. Israelhai Pathien Hmun Thienghlima chun rimtui an raw ta naw a, pumraw thilhlan an inhlan ta bok nawh.
8. Chuleiin, Judai ram le Jerusalem mihai chungah LALPA lungsenna chu a tla a, in mit ngeia in hmu ang hin, mi pangzat le makti le nuizatbur dingin a lo siem tah a nih.
9. Hieng lei hin an nawm ei pi le puhai kha kawlhnama sam thlukin an lo um a, an naupa le naunu le nuhmeihai chu mi salah an um chu nih.
10. A lungsen inling chu an kieng theina dingin, LALPA, Israelhai Pathien kuomah thuthlung thlung ka tum a nih.
11. Ka nauhai, LALPA chun a rongbawltu ni a, a hmaa ngira a rong bawl ding le rimtui inhlan dinga a ruot cheu in ni leiin, tu hin chu a rong bawl unla, inthlada ta hrim hrim naw ro" a ta.
12. Chuongchun, Levihai chu an inthok suok a. Chuonghai chu, Kohat thlaa inthokin Amasai naupa Mahat le Azaria naupa Joel hai; Merari thlaa inthokin Abdi naupa Kisa le Jehalelel naupa Azaria hai; Gerhon thlaa inthokin Zima naupa Joah le Joah naupa Eden hai;
13. Elizafan thlaa inthokin Simri le Jeiel hai; Asaf thlaa inthokin Zekaria le Matania hai;
14. Heman thlaa inthokin Jehiel le Simei hai; Jeduthan thlaa inthokin Semaia le Uziel hai an nih.
15. Anni chun an unauhai an ko khawm a, an insukthienghlim a, LALPA thua lal thupek angin LALPA Tempul chu sukfai dingin an lut a.
16. Thiempuhai chu LALPA Hmun Thienghlim inthiel fai dingin an lut a, LALPA Tempul sunga thil thieng lo an hmu po po chu LALPA Tempul tuolzawla chun an hung lak suok a, chu chu Levihaiin an lak a, Kidron vadungah an fepui a.
17. Thla khatna ni khat nia inthienna sin an bei tan chu a ni rietnaa chun LALPA hulhliep chen an phak hman a. Ni riet dang LALPA Tempul inthien chu an bei nawk a, thla khatna, ni sawm le ni ruk ni chun an zo fel ta a.
18. Chu zoa chun lal Hezekia kuomah an fe a, "LALPA Tempul chu kan inthien fai zo ta a, pumraw thilhlan inhlanna maicham hai, chu taka hmang bur le bel po po hai, hlanbei siena dawkan hai le hmangruo dang po po khom.
19. Chun, Ahaz inlal laia depde taka thil a lak hmang po po kan inchik vong a, kan inthien bok a, tu hin LALPA maicham hmaah a um" an ta.
20. Hezekia chu zing inhma takin a tho a, khawpuia mi lienhai chu a ko khawm a, LALPA Tempulah a hang fepui a.
21. Ram le Hmun Thienghlim le Judahai ta dinga suol thawina dingin bawngchal pasari, beramchal pasari, beramchal te pasari le kelchal pasari an kei a, Aron thla thiempuhai kuoma chun LALPA maichama inhlan dingin a pek a.
22. Bawngchalhai chu an that a, thiempuhai chun a thisen chu an lak a, maicham chu an the a. Beramchalhai khom chu an that a, a thisen chun maicham chu an the a. Chun, beramtehai khom chu an that a, a thisen chun maicham chu an the a.
23. Suol thawina ding kelchalhai chu lal le pungkhawmhai hmaa chun an hung kei a, an chungah kut an innghat a.
24. Thiempuhai chun an that a, lalin Israel mihai po po ta dinga pumraw thilhlan le inremna thilhlan inhlan dinga thu a pek angin, kel thisen chu Israel mi po po ta dinga inremna siemna dingin maichama chun suol thawinaah an inhlan a.
25. Chun, Davida le lal zawlnei Gada le zawlnei Nathan thupek angin, LALPA tempula chun Levihai chu darbenthek hai, perkhuong hai le tingtang hai tum dingin lal chun a sie a; chu chu a zawlneihai hmanga LALPA thupek a nih.
26. Levihai chun Davida insiemtir rimawi hmangruohai chu chawiin inring zingin an ngir a, thiempuhai chun tawtawrawt an chawi bok a.
27. Hezekia chun pumraw thilhlan chu inhlan ta dingin thu a pek a. An inhlan tan chun tawtawrawt le Israel lal Davida insiemtir rimawihai leh remin LALPA hla chu an sak tan ve a.
28. Hla sak pawlin hla sak a, tawtawrawt muttuhaiin an mut lai chun LALPA chawibiekin mipuihai chu an kun a, chuong ang chun pumraw thilhlan chu an zo chenin an thaw a.
29. Inthawina thilhlanhai an inhlan zo chun lal le a kuoma um po po chun dingthathuonin Pathien an chawibiek a.
30. Lal Hezekia le a thoktuhai chun Davida phuok le zawlnei Asaf phuok inpakna hla hai chu sak dingin Levihai chu thu an pek a. Chuongchun, hlim takin inpakna hla chu an sak a, kunin Pathien an chawibiek a.
31. Hezekia chun, "Tuhin LALPA kuomah nangni in inhlan ta a. Hung hnai unla, LALPA tempulah inthawina le lawmthu hrilna thilhlan hung inhlan ta ro khai" a ta. Mipuihai chun inthawina hai le lawmthu hrilna thilhlanhai an hung inhlan a; a nuom taphotin pumraw thilhlan an hung inhlan bok a.
32. Mipuiin pumraw thilhlan an hung inhlan zat chu bawngchal sawmsari le beramchal za le beramte zahni a na, chuonghai po po chu LALPA ta dinga pumraw thilhlan vong a nih.
33. Thilhlan po po chu bawngchal zaruk le beram sangthum a nih.
34. Amiruokchu, thiempu an indai naw leiin pumraw thilhlanhai chu a vun an inhlip seng naw a. Thiempu danghai an insukthienghlim hma po le an sin an zo hma po chu an unau Levihai chun an thangpui a (Levihai chu insukthieng thuah thiempuhai nek hmanin an khermei lem si a).
35. Pumraw thilhlan chu a tam hle a, pumraw thilhlan le inkopa inhlan hlak inremna thilhlana ding thau hai, dawn ding thilhlana ding uoiin hai khom chu a tam em em el a. Chuong ang chun LALPA Tempula rongbawlna chu an tan thar nawk a nih.
36. LALPA thangpuina zara chuong po po hun sawt nawte sunga an thaw thei leiin Hezekia le mipuihai chu an hlim em em a.
←  2Chronicles (29/36)  →