←  2Chronicles (25/36)  →
1. Amazia chu kum sawmhni le kum nga mi a niin lal a hung ni a, Jerusalemah kum sawmhni le pakuo ro a rel a. A nu chu Jerusalem mi, a hming Jehoaddin a nih.
2. LALPA mithmuah thil tha a thaw a, a lungril ruok chu a pek vong nawh.
3. A ramah a lalna a suknghet hnung chun a pa thattuhai chu a that ve a.
4. An nauhai ruok chu a that sa ve nawh; Mosie Dan bua LALAPA thu, "Nauhai leiin pahai sukhlum ding an ni naw a, pahai leiin nauhai sukhlum ding an ni bok nawh, mi tin mani suol leiin an thi ding a nih" ti kha a zawm a nih.
5. Amazia chun Judahai chu a ko khawm a, Juda le Benjamin mi po po chu an sungkuo dungzui peiin sangkhat chunga kawmandara dam le zakhat chunga kawmandara dam a'n umtir a, pasal kum sawmhni le chung tieng, fei le phaw chawia ral do thei chin chu mi nuoithum an nih.
6. Chu bakah, Israel rama mi hrat le huoisena hril nuoi khat chu tangkaruo kilogram sangthum le zali sengin a ruoi bok a.
7. Nisienlakhom, a kuomah Pathien mi, mi pakhat a hung a, "Aw lalpa, Israel sipaihai hi thuoi sa naw rawh. Israel mihai lai LALPA a um ta naw a, Efraimhai lai khom a um ta bok nawh.
8. Fein huoisen takin va bei khom ni ta hrim la, i hmelmahai hmaah Pathienin suktlawm tho a ti che, hne theitu le suktlawm theitu chu Pathien a ni si a" a ta.
9. Amazia chun Pathien mi kuomah, "An leh, Israel sipaihai ka ruoina tangkaruo zozai kha iem ka law ta ding a na?" a ta. Pathien mi chun, "LALPAN a neka tam lem dai a pek thei che" a ta.
10. Chuongchun, Amazia chun Efraimhai rama inthoka sipai hung po po chu an in tieng a tirkir ta vong a. Anni chu Judahai chunga chun an lung a sen hle a, lungsen takin an kir a.
11. Amazia chun zam loin a sipaihai chu Chi Ruom tieng a panpui a, chu taka chun Seir mi singkhat an that a.
12. A hringin mi singkhat an man bok a, chuonghai chu rawl khoah an thuoi a, rawla chun an nam thlak a, an tla dar pheng phung a.
13. Chuong lai chun Amazia-in sipai a tir kirhai khan Judai rama khuohai, Samaria inthoka Bet Horon chenin an bei a, mi sangthum an that a, rallak tam tak an hawn bok a.
14. Edomhai run zoa Amazia a hung kir chun Seir mihai pathienhai chu a hung hawn a, a pathiena dingin a'n din a, chibai a buk a, rimtui dam a'n hlan a.
15. Chu lei chun Amazia chungah LALPA lung a chok a, a kuomah zawlnei a tir a, ama chun, "Hieng hnam danghai pathien, i kuta inthoka a mihai khom san suok thei hlei lo chu ieng ding hrima i biek am a na?" a ta.
16. A hril lai zing chun lalin, "Lal kuoma thurawn petu dingin tuin am a siem che a? To vat rawh! Ieng leiin am i hringna i chan ding?" a ta. Zawlnei chun, "Hienga i thaw lei le ka thu i ngaithlak nuom naw leiin Pathienin sukbohmang che a tum a nih ti ka hriet" a ta, a to ta a.
17. Juda lal Amazia-in a remruotpuituhai a rawn hnungin Israel lal Jehu naupa Jehoahaz naupa Joash kuomah, "Hung la, pa le pa inhmatonin hang inbei ei tih" tiin chona thu a thon a.
18. Israel lal Joash chun Juda lal Amazia kuomah, "Lebanon tlanga hlingin Lebanon tlanga sidar thing kuomah, 'I naunu kha ka naupa nuhmeiah inneitir raw khai' tiin thu a'n cha a. Lebanon tlanga chun ram sa a hung a, hling chu an hung chil thluk ta der a.
19. Nang hin 'Ngai ta, Edom ka hne ban der' tiin i uong a ni hi tie. I inah intom tok tok lem rawh. Ieng dinga nang le Judai ram chopa sietna ding chok suok i tum am a na?" tiin mi a tir ve a.
20. Nisienlakhom, Amazia chun a lo ngaithlak nuom nawh; Edomhai pathien a biek leia Pathienin Judai ram chu a hmelmahai kuta a pek theina dinga a thaw a ni si a.
21. Chuongchun, Israel lal Joash chu a hang fe a, Juda lal Amazia le chun Judai ram Bet Semes khuoah hmaisanah an inbei ta ngei a.
22. Israelhai chan chu a tha lem leiin Judahai chu mi tin mani in tieng an tlan kir ta vong a.
23. Israel lal Joash chun Juda lal, Ahazia naupa Joash, chu naupa Amazia chu Bet Semes-a chun a man a, Jerusalemah a thuoi a, Jerusalem kul chu Efraim kotkhara inthoka kul bang meter zahni vela sei chu a sukchim a.
24. Obed-Edom enkolna hnuoia um LALPA Tempul kudama rangkachak le tangkaruo le bur le bel um po po le lal ina um po po chu a lak a, mi hren ding a man bok a, Samaria khuo tieng a kir nawk ta a.
25. Juda lal Joash naupa Amazia chu Jehoahaz naupa Israel lal Jehoash thi hnungin kum sawm le kum nga a la dam a.
26. Amazia inlal laia thil tlung danghai chu, a bula inthoka a tawp chenin, Juda lalhai le Israel lalhai chanchin inziekna buah a chuong.
27. Amazia-in LALPA zui a bansana inthokin Jerusalema chun that tuma phierruk an um zing leiin a tawpa chu Lakis khuoah a tlan a, sienkhom a hmelmahai chu an hnot zui a, chu taka chun an that a.
28. A ruong chu sakorin an inphur kirtir a, a pi le puhai kuomah Davida khawpuiah an phum ta a.
←  2Chronicles (25/36)  →