←  2Chronicles (23/36)  →
1. A kum sarinaah Jehoiada chun ngam takin, vengtu zakhat pawl pei kawmandar Jeroham naupa Azaria hai, Jehohanan naupa Ishmael hai, Obed naupa Azaria hai, Maaseia naupa Adaia hai, Zikri naupa Elishaphat hai chu thu a thlungpui a.
2. Anni chu Judai ram khaw tinah an fe a, Levihai le Israel sungkuoa lukhaituhai chu an ko khawm a, Jerusalemah an hung a.
3. Pungkhawm po po chun Pathien tempulah lal kuoma chun thu an thlung a.Thiempu Jehoiada chun an kuomah, "LALPA chun Davida thlahai chungchanga thu a lo tiem tah angin, lal naupa chu lalah a um ding a nih.
4. In thaw dan ding chu hieng hi a nih: Sabat nia diutia hung nangni thiempuhai le Levihai chu hmun thuma thea hmun khatin kotpui in veng ding a nih.
5. Hmun thuma thea hmun khat chu lal inah um in ta, hmun thuma thea hmun khat dang chun kul kotkhar veng in ta, mipui po po chu LALPA tempul inhuon sung tuolah an um ding a nih.
6. Rongbawla um thiempuhai le Levihai chauh naw chu tu khom LALPA Tempulah an lut ding a ni nawh. Anni chu lut le suok thei dinga ser thienghlim an ni a, mi dang ruok chun an chan dinga LALPA ruot hmun seng chu an veng ding a nih.
7. Levihai chu mani hriemhrei chawi sengin, inring sain lal bulah um an tih. Mi dang Tempula hung lut taphot chu in that pei ding a nih. Lal lut le suok chu in zui pei bok ding a nih" tiin thu a pek a.
8. Levihai le Judahai po po chun thiempu Jehoiada hril ang tak chun an thaw a, mani rawihai po, Sabat nia diuti ding pawl le awl ding pawl chu an thuoi a, thiempu Jehoiada kuomah an fe a, thiempu Jehoiada chun diuti zo tahai khom chu a'n tintir nawh.
9. Chun, kawmandarhai kuoma chun LALPA tempula um Davida feihai le phaw lien le phaw chinhai chu a pek a.
10. Vengtu sipaihai chun hriemhrei chawi sengin, tempul sim tieng panga inthoka hmar tieng chenin, maicham le tempul hrula chun an ngir huol mup a.
11. Jehoiada le a nauhai chun lal naupa Joash chu an hung thuoi suok a, lallukhum an inkhumtir a, lalhaiin thuthlung le Dan le thupek an kengkaw ding hai inziekna bu chu an pek a, lalah an puong a, hriek an nal a, "Lal chu dam sawt raw se" tiin an khek a.
12. Vengtu sipaihai le mipuihaiin lal chawimawia an inzi mur mur ri Athalia-in a lo hriet chun LALPA Tempula mipuihai lai chun a va fe a.
13. Chun, a hang en a, an thaw dan anga kotkhar ban hrula lal ngir chu a hmu a, sipai kawmandarhai le tawtawrawt muttuhai chu lal bula chun an ngir a, chu rama mihai chu an hlim em em a, tawtawrawt an mut an mut a, hla saktuhai chun rimawi tinreng tumin inpakna hla an sak a. Athalia chun a puonhai a pot thler a, "Phierrukna! Phierrukna!" tiin a khek a.
14. Thiempu Jehoiada chun chu minu chu man dingin sipai za chunga kawmandarhai chu thu a pek a, "LALPA ina chu that lo ding" a lo ti ta leiin, an kuomah, "Sipaihai kara khan hung thuoi suok unla, a zuitu taphot chu that sa ro" a ta.
15. Lal in huonga sakor lutna kot a tlung chun an man a, chu taka chun an that a.
16. Mipuihai chu LALPA mihai hung ni ngei dingin thiempu Jehoiada chun LALPA le lal le mipuihai inkarah thu a thlungpui a.
17. A ram mipuihai po po chu Baal an biekna tempulah an fe a, an sukchim a, maichamhai le milemhai chu an vuok nawi vong a, Baal thiempu Matan chu maicham hmaa chun an that a.
18. Mosie Dan bua ziek anga hlim taka hla sak puma LALPA tempula pumraw thilhlan inhlantu dinga Davida thupek anga Levi chia mi thiempu an lo hmang hlakhai thlahai ngei chu LALPA tempul enkaitu dingin Jehoiada chun a sie tawl nawk a.
19. Thiempu Jehoiada chun LALPA Tempulah mi porche tu khom an lut nawna dingin LALPA Tempul kotkhar vengtu dingin vengtu sipai a ruot bok a.
20. Chun, sipai kawmandar hai, khawnbawl hai, mipui chunga roreltu hai le a ram mipuihai po po chu a thuoi a, LALPA Tempula inthokin lal chu an hung thuoi thlak a, vengtu sipaihai lutna kot chuonchunga chun lutin lal inah an fe a, lal chu a lalthungphaah an inthungtir ta a.
21. Chuongchun, chu rama mi po po chu an lawm a, Athalia chu lal inah kawlhnama an that ta leiin khawpuia buoina chu a re ta a.
←  2Chronicles (23/36)  →