2Chronicles (22/36)  

1. Kha hmaa Jerusalem hung runtu Arab mihai le an inkoppuihaiin Jehoram naupahai laia an mi tlum tak Ahazia ti lo chu an that fai vong leiin, Jerusalem mihai chun Jehoram nau mi tlum tak Ahazia chu Judai ram lalah an siem a, a hung inlal tan ta a.
2. A hung inlal chun Ahazia chu kum sawmhni le kum hnii mi a na, Jerusalemah kum khat a'n lal a, a nu hming chu Athalia a na, Omri tunu a nih.
3. Ahazia khom chun Ahab sungkuohai lampui chu a hraw ve a, thil suol thaw dinga keithuoitu chu a nu a nih.
4. Ahab sungkuohai ang bokin LALPA mithmuah thil suol a thaw a, a pa thi hnungin Ahab sungkuo danghai chu thurawn a lakna le a chunga sietna intluntu an nih.
5. Gilead biel Ramot khuoa Aram lal Hazael do dinga Ahazia-in Israel lal Ahab naupa Joram a fepuina san khom anni thurawn a lak lei a nih. Chu taka chun Joram chu Aram mihaiin an lo inhliem a.
6. Chuongchun, Aram lal Hazael a va donaa Ramot-a an lo inhliem chu insukdam dingin Jezreel-ah a hung kir a. Chun, Juda lal Jehoram naupa Ahazia chu Ahab naupa Joram hliem kan dingin Jezreel-ah a zu fe a.
7. Ahazia-in Joram a zu kan lai chun a chungah Pathienin sietna a hung intlungtir a. Ahazia a hung tlung chun Ahab sungkuo suksetu dinga LALPA hriek nal Nimsi naupa Jehu chu tuok dingin Joram chun Ahazia chu a fepui a.
8. Jehu-in Ahab sungkuo chunga kut a thlak lai chun Joram damnaw en dinga fe Ahazia mihai- Juda hotuhai le Ahazia sungkuohai chu a hmu a, a that vong a.
9. Chun, Ahazia chu an zong a, Samaria-a inbiruk chu an hmu a, an man a, Jehu kuomah an hung thuoi a, an that a. "A lungril po poa LALPA zong hlak Jehosafat naupa a ni si a" an ti leiin a phumin an phum a. Chuongchun, Ahazia sungkuoa inthokin lal nina chel theia hrat mi an nei ta naw a.
10. Ahazia nu Athalia chun a naupa thi a hriet charin Juda sungkuoa lalhai po po chu that chimit tumin hma a lak a.
11. Ahazia naupa Joash ruok chu lal Jehoram naunu Jehoseba chun lal nau a that dinghai laia inthok chun a lak hmang a, a dontunu leh a pindanah a thup a. Chuonga lal Jehoram naunu Jehoseba, Ahazia farnu le thiempu Jehoiada nuhmeiin Joash a thup lei chun Athalia-in a that ve thei ta naw a.
12. Athaliain ram rorelna kum ruk a chel sung po chun Pathien Tempulah anni kuomah a thup ruk a nih.

  2Chronicles (22/36)