2Chronicles (21/36)  

1. Jehosaafat chu a pi le puhai kuomah a chawl a, anni lai Davida khawpuia chun an phum a, a naupa Jehoram chun a lalna chu a hung hluo a.
2. Jehoram unauhai, Jehosafat naupahai chu Azaria, Jehiel, Zekaria, Azariahu, Mikael le Sefatia an nih. Chuonghai chu Judai rama Israel lalh Jehosafat naupahai chu an nih.
3. An pa chun a nauhai chu thilpek tam tak, tangkaruo le rangkachak le thil hlu tam tak bakah Judai rama kul nei khuo tam tak rochung sienkhom, ram ruok chu Jehoram kuomah nau upa tak a nina zarin a pek a.
4. A pa ram chungah a lalna a suknghet phing leh a unauhai po po le Israel hnamhai laia lukhaitu tam tak chu kawlhnamin a sukhlum vong a.
5. Jehoram chu kum sawmthum le kum hni a niin a'n lal tan a, Jerusalemah kum riet a'n lal a.
6. Israel lalhai ang bokin Ahab sungkuohai lampui chu a hraw ve a, Ahab naunu chu nuhmeiah a nei a, LALPA mithmuah thil tha lo a thaw a.
7. Amiruokchu, LALPAN Davida kuoma ama le a thlahai chena kumkhuoa lal inneitir zing dinga a lo tiem tah leiin, Davida sungkuo chu sukbohmang a nuom nawh.
8. Jehoram inlal laiin Edomhai chu Judahai lakah an hel a, lal an insiem chop a.
9. Jehoram chu a sipai hotuhai le a tawlailir po po leh anni chu bei dingin a suok a. Edomhai chun ama le a tawlailir hotuhai chu an inhuol vong a, sienkhom zanah a bei a, an tawn tlang a.
10. Tu chen hin Edomhai chu Judahai lakah an la hel ta zing a nih. Jehoram chun LALPA, a pi le puhai Pathien chu a nghatsan leiin, chuong hun lai bok chun Libna khuo khom an hel a.
11. Chun, Judai ram tlanga hai chun hmun sanghai a siem a, Jerusalem mihai chu inuiretirin, Judahai chu a thuoi suol a.
12. Jehoram chun zawlnei Elijaa inthokin lekhathon a hmu a: "LALPA, i pu Davida Pathien chun hieng hin a tih: 'I pa Jehosafat lampui i hraw naw a, Juda lal Asa lampui khom i hraw bok nawh.
13. Chu nek hmanin Israel lalhai lampui i hraw lem a, Judahai le Jerusalema umhai chu Ahab sungkuohai angin i'n uiretir a, nang neka tha lem i pa sungkuoa mi i unauhai i that a.
14. Chuleiin, tu hin i mipuihai, i naupahai le nuhmeihai le i thil nei po po chungah LALPA chun na takin kut a thlak ding a nih.
15. I ril po po a suok vong chenin ril natna re thei lo invoi bok i tih" tiin.
16. Chun, LALPA chun Kush mihai vela um Filistinhai le Arabhai lungril chu Jehoram do dingin a chok tho a.
17. Chuongchun, Judai ram an hung bei a, an run a, lal ina thil tha po po chu, a naupahai le a nuhmeihai chenin, an lak vong a, a nau mi tlum tak Jehoaza (Ahazia) chauh naw chu a naupahai lai tu khom maksan an nei nawh.
18. Chu hnunga chun sukdam thei lo ril natnain LALPAN a hrem a.
19. Chun, hieng ang hin a hung tlung a, a kum hninaa chun a natna leiin a ril chu a suok vong a, na tak tuorin a thi a. A pa inzana le sunnaa a mihaiin meipui an seppek ang khan an seppek ve nawh.
20. Kum sawmthum le kum hni a niin Jehoram chu a'n lal tan a, Jerusalemah kum riet a'n lal a. Inrotu nei loin a thi a, Davida khawpuiah an phum a, lalhai thlana ruok chu a ni nawh.

  2Chronicles (21/36)