←  2Chronicles (20/36)  →
1. Chu hnunga chun Moab mihai le Amon mihai chu Meunhai iemani zat leh inthukopin Jehosafat do dingin an inthok suok a.
2. Mi tuhaiin amanih Jehosafat kuomah, "Nangma do dingin Tuipui Thi ral Edom rama inthokin sipai tam tak an hung a, tu hin Hazazon Tamar-ah an um tah" tiin an hung hril a (chu hmun chu Engedi an ti bok hlak).
3. Jehosafat chu a ti hle a, LALPA thuoina hniin a tongtai a. A ram pumpuia bu nghei dingin thu a pek bok a.
4. LALPA thuoina hni dingin Judai ram hmun tina inthokin Judahai chu Jerusalemah an hung tlan khawm a.
5. Jehosafat chu LALPA tempul inhuonna tuolzawl thara chun Judai rama inthok le Jerusalema inthoka hung mipui pungkhawmhai hmaa chun a ngir a.
6. Chuongchun Pathien kuomah, "Aw LALPA, kan pi le puhai Pathien, vana um Pathien chu i ni naw am a ni? Nang chu hnam le ram po po chunga roreltu i nih. Thilthawtheina le hratna chu i kutah a um a, tu khom ngam ruol i ni nawh.
7. Aw kan Pathien, hi rama chenghai hi i mi Israelhai hmaah hnot suokpekin, ruola i nei Abraham thlahai kuomah kumkhuoa dingin i pek tah a ni naw am a ni?
8. Hi rama hin khawsain i hming umna ding hmun thienghlim khom an indin ta a.
9. Chun, i kuomah, 'Sietnain a mi tlak buok a, kawlhnama hremna amanih, hripui inleng amanih, tam tlak amanih kan tuok pha hi Tempul, i hming umnaa hin i hmaah ngirin hung ko kan ti che a, nangin mi lo ngaithlapekin mi hung sandam rawh' tiin dawvan an lo kai ta kha.
10. "Chuongchun, ngai ta, tuhin Aiguptaa inthoka Israelhai an hung laia an run ding i phal naw leia sukbohmang loa an fesan Amon thla hai, Moab thla hai le Seir tlanga mihai khan an mi hung bei tum a ni hi.
11. En ta, an mi hang thungrul tum dan hrim hrim hi! Kan rochan dinga ram i mi peka inthoka mi hnot suok an tum a ni hi.
12. Aw kan Pathien, an chungthu i hung rel naw ding am a ni? Mi chuong zozai mi bei dinga hung inthokhai chu hang do hne ziezang ding kan ni nawh. Thaw ngaina hrim kan hriet naw a, nangma tieng kan hung ngha lem a ni hi" tiin a tongtai a.
13. Chun, Judahai po po chu nu le nau leh LALPA hmaa chun an ngir a.
14. Chuongchun, mipui laia ngir ve zing Jahaziel chungah LALPA thlarau a hung tlung a. Ama chu Zekaria naupa a na, ama chu Benaia naupa a na, ama chu Jeiel naupa a na, ama chu Matania naupa a na, ama chu Levi chia mi Asaf thla a nih.
15. Ama chun, "Lal Jehosafat le Judai ram le Jerusalema chenghai, lo ngaithla ro. LALPA chun hieng hin a tih: 'Ti naw unla, chuong sipai tam tak lei chun zam bok naw ro. Indona chu nangni indona a ni naw a, Pathien indona a ni lem.
16. Zinga hin zu bei ro. Ziz kawna an hung kai tung lai ning a ta, Jeruel thlalera ruom tawp tieng zu hmung in tih.
17. Hi indonaa hin in chet ve ngai naw nih. Thanghmun khaw unla, nghet takin ngir unla, aw Juda mihai le Jerusalem mihai, LALPA sansuokna chu thlir ringot el ro. Ti naw unla, zam bok naw ro. Zingah bei dingin inthok ro, LALPA chu nangni tieng a thang ding a ni si a" a ta.
18. Chuongchun, Jehosafat chu hmaia hnuoi sikin a kun a, Juda mi po po le Jerusalem mi po po chun LALPA chawibiekin a hmaah an kun a.
19. Kohat thla le Kora thla Levihai chu an ngir a, rawl inring takin LALPA, Israel Pathien chu an inpak a.
20. A zinga chun inhma takin an inthok suok a, Tekoa thlaler an pan a. An suok ding chun Jehosafat chu a ngir a, "Aw Juda mihai le Jerusalem mihai, ka thu hi lo ngaithla ro. LALPA in Pathien chu ring zo unla, sukdingchang a ti cheu; a zawlneihai chu ring zo unla, hmuingil in tih" a ta.
21. Mipuihai a'n fui zo chun sipaihai hmaah fe a, lawn puma,"LALPA kuomah lawmthu hril ro,A ngilneinan kumtluong a dai"tia LALPA inpakna hla sak a, a thienghlimna mawizie chawimawitu ding mi a ruot a.
22. Chuonga inpakna hla an hang sak tan char chun Judai ram run dinga hung Moab hai, Amon hai le Seir tlanga mihai lo lambuntu ding LALPAN a sie a, chuongchun anni rawi chu intlawmin an um ta a.
23. Amon mihai le Moab mihai chun Seir tlanga um Edom mihai chu that chimit le sukbohmang vong tumin an bei rak el a; Edom mihai an that zo hnung chun anni le anni chu insukchimit tumin an inbei nawk rak a.
24. Judahaiin thlaler zuk thlir theina hmun an tlung chun sipai tam tak inkulna tieng chu an zuk thlir a, hnuoiah an tlu thal phung a, dama tlan suok hrim an um nawh.
25. Chuongchun, Jehosafat le a rawihai chu rallak thil inkhawm dingin an fe a, hmangruo le silfen le thil man tam, phur seng lo an lak a, a tam em leiin a sek khawmna dingin ni thum top a lak a nih.
26. A ni li ni chun Beraka ruomah an inkhawm a, LALPA an chawimawi a, chu lei chun voisun ni chen hin Beraka Ruomg tia ko a la ni zing.
27. Chu zoah Jehosafatin hma a thuoi a, LALPAN an hmelmahai a hnepek leiin hlim takin Jerusalem tieng an kir nawk ta a.
28. Chuongchun, perkhuong le tingtang rem a, tawtawrawt mutin Jerusalem an lut a, LALPA Tempulah an fe a.
29. LALPAN Israel hmelmahai a do ti an hang hriet chun ram tina mihai chun Pathien chu an ti ta hle a.
30. Sir tinah Pathienin muongna a pek leiin Jehosafat ram chu a ralmuong ta hle a.
31. Chuongchun, Jehosafat chun Judai ram chungah ro a rel a. A hung inlal chun kum sawmthum le kum nga mi a na, Jerusalemah kum sawmhni le kum nga a'n lal a. A nu hming chu Azuba a na, Silhi naunu a nih.
32. A pa Asa lampui hraw chu pensan loin a hraw ve a, LALPA mithmuah thil indik a thaw a.
33. Hmun sanghai ruok chu sukbo loin a la um zing a, mipuihai khomin an pi le puhai Pathien tieng lungril an la pek bok nawh.
34. Jehosafat inlal sunga thil tlung danghai chu a bula inthoka a tawp chenin Hanani naupa Jehu chanchin zieknaah a chuong a, chu chu Israel lalhai chanchin inziekna buah a chuong.
35. A hnungin, Juda lal Jehosafat chun ritlona leia thiem naw chang tah Israel lal Ahazia chu a'n thuruolpui a.
36. Sumdawng long ruol siem a remtipui a, chu chu Ezion Geber-ah an siem tlang a.
37. An siem zo chun Maresa mi Dodavahu naupa Eliezer chun Jehosafat kuomah, "Ahazia leh in inkop leiin LALPA chun i thil siemhai hi suksepek a ti che" a ta. An longhai chu a koi dar vong leiin sumdawng dingin an suok thei ta nawh.
←  2Chronicles (20/36)  →