←  2Chronicles (2/36)  →
1. Solomon chun LALPA hminga ding tempul le ama ta ding lal in bawl dingin thupek a'n suo a.
2. Thil phurtu mi singsari le tlanga lung sertu ding mi singriet le anni inrawitu ding mi sangthum le zaruk a ruot a.
3. Solomon chun Tura lal Hiram kuomah, "Ka pa Davidan a in a bawl laia sidar thing i lo thon hlak ang khan sidar thing mi hung thon ve raw khai.
4. LALPA ka Pathien hminga ding tempul bawl tan ka tum mek a. Chu chu kei le ka mihai ta dinga hmun serh, LALPA hmaa rimtui rawna ding dam, chatlak loa hlanbei kan sie zingna ding dam, zing le zan le Sabat le thla thar hun le LALPA kan Pathien hminga hunbi ruot kuthai kan hmang changa pumraw thilhlan kan inhlan zingna ding chu a nih. Chu chu Israelhai thaw dinga kumkhaw thu ruot a ni si a.
5. "Ka tempul bawl ding chu ropui tak a nih, kan Pathien chu pathien danghai po po neka rapthlak le ropui lem a ni si a.
6. Sienkhom, van zau tak le insang tak hmana a keng zo lo chu tuin am a tempul ding bawlpek thei a ta? A hmaa inthawina thilhlanhai rawna ding chauh naw chu kei telul hin iengtin am a ta dingin tempul chu bawlpek thei ka ta?
7. "Chuleiin, Judai ram le Jerusalema mi themthiem, ka pa Davidan a lo ruoi hlakhai le thok tlang ding mi pakhat, rangkachak le tangkaruo, dar le thir them tienga chemkal, pat senduk le sen lar le dumpawl nam thiem le thil ker thiem mi hung tirpek raw khai.
8. Chun, Lebanon-a inthokin sidar thing, far thing le algum thing mi hung lapek bok rawh, i mihai chu thing phur thiem an nih ti ka hriet si a.
9. Tempul ka bawl ding chu lien tak le ropui tak a ni ding a ni leiin, thing ka mamaw tawk ka hmu theina dingin ka mihai chu i mihai lai thok ve raw hai se.
10. I siehlawhai le thing phurtuhai chu huit beiphit kilogram maktaduoi hni, barli beiphit kilogram maktaduoi hni, uoiin litar nuoi li le oliv hriek litar nuoi li peng ka tih" tiin lekha a thon a.
11. Tura lal Hiram chun, "LALPAN a mihai a hmangai leiin an lalah a siem che a.
12. Lal Davida kuoma nau var tak, lungvar nei le hriet thiemnaa inthuom, LALPA tempul le ama lal in bawltu ding petu LALPA, Israel Pathien, hnuoi le van siemtu chu inpakin um raw se.
13. Mi themthiem tak el Huram-Abi ka hung tir ding a nih.
14. A nu chu Dan hnama mi a na, a pa chu Tura mi a nih. Rangkachak le tangkaruo, dar le thir, lung le thing, pat senduk le senlar le dumpawl le zai inhmi tinreng a ieng ieng khom them thiem a nih. Thil ker tienga chemkal le ieng ang ruongam khom a lim an pek taphot chu ker thiem vong a nih. I mistiri themthiem ruol le ka pu Davida ruoi mi themthiemhai leh thok tlang raw hai se.
15. "Ka lalpain a siehlawhai hung thon dinga a tiem huit le barli hai, uoiin le oliv hriek hai chu hung thon sien la,
16. keinin Lebanona thing chu i dit zat zat lo phur kan ta, tuifinrietah Jopa khaw kai chen hung tolpek kan ti che a, chu taka inthokin nangin Jerusalem tieng i lo tol tung pei ding annawm" tiin donna lekha a thon a.
17. A pain intiemna a thaw ang khan Solomon khomin Israel rama ram dang mi um po po chu a tiem a, an rengin mi nuoi khat singnga sangthum le zaruk an nih.
18. Chuonghai laia mi singsari chu thil phurtu ding, singriet chu tlanga lung sertu ding le sangthum zaruk chu sinthawhai inrawitu ding an nih.
←  2Chronicles (2/36)  →