←  2Chronicles (19/36)  →
1. Jehosafat chu him takin Jerusalema a inah a kir nawk ta a.
2. Zawlnei Hanani naupa Jehu chun a lo hmuok a, a kuomah, "Mi rilo thangpuiin, LALPA theidatu chu i'n thloppui ding maw? Hi lei hin LALPA lungsenna chu i chungah a fu a nih.
3. Amiruokchu, hi rama inthoka Asera lem thinghai inthiel fai a, LALPA chu i zong leiin thatna kong iemani chu i la nei hih" a ta.
4. Jehosafat chu Jerusalemah a um a, a mihai kanin Beershebaa inthokin Efraim tlangram chen a'n zin a, LALPA, an pi le puhai Pathien tieng a thuoi kir tawl nawk a.
5. Khaw tinah, Judai rama kul nei khuo po poa chun roreltuhai a sie a.
6. Roreltuhai kuoma chun, "In thilthaw taphot ngun taka ngaituoin thaw hlak ro. Mihriem ta dinga ro rel in ni naw a, LALPA aia roreltu in ni lem. Ama chu ro in rel pha in kuomah a um zing a nih.
7. Chuleiin, LALPA chu tiin, fimkhur takin ro rel hlak ro, LALPA ei Pathiena chun indiknawna dam, thlei bik neina dam le thamna fak dam a um si nawh" a ta.
8. Jehosafat chun Jerusalema khom LALPA danhai kengkawtu ding le thubuoihai ching feltu dingin Levihai, thiempuhai le Israel sungkuoa lukhaituhai laia thenkhat chu a ruot bok a, chuonghai chu Jerusalemah an um a.
9. An kuoma chun, "LALPA ti dekin, ringum tak le lungril po poin a rong in bawl ding a nih.
10. In khuo le tui chanpuihai, khawpuia um mi tu khomin thubuoi an hung intlun a, tuolthat dam le Dan thupek hai, thuruot hai le thusuok hai bawsietna chungthu dama inkhing an ni chun LALPA chunga thil suol thaw lo dinga fimkhur dingin hril ro, chuong naw chun nangni le in unauhai chungah LALPA lungsenna hung tlung hlauh rawi a tih. Indik taka in thaw chun thiem naw chang ngai naw ti niu.
11. LALPA tieng thil hrim hrima hotu tak chu thiempu Amaria ning a ta; lal tieng le inzom thil hrim hrima hotu tak chu Juda sungkuoa lukhaitu, Ismael naupa Zebadia ning a ta; Levihai chu roreltuhai thusuok kengkawtu ning an tih. Huoi takin thaw unla, indik taka thawtuhai kuoma chun LALPA chu um raw se" a ta.
←  2Chronicles (19/36)  →